ກອງປະຊຸມສະໄໝສາມັນ ເທື່ອທີ 5 ຂອງສະພາປະຊາຊົນນະຄອນຫລວງວຽງຈັນ
ກອງປະຊຸມສະໄໝສາມັນ ເທື່ອທີ 5 ຂອງສະພາປະຊາຊົນ ນະຄອນຫລວງວຽງຈັນ ໄດ້ໄຂຂຶ້ນໃນວັນທີ 16 ກໍລະກົດ ນີ້, ໂດຍການເປັນປະທານຂອງ ທ່ານ ອານຸພາບ ຕຸນາລົມ ປະທານສະພາປະຊາຊົນ ນະຄອນຫລວງວຽງຈັນ, ເປັນກຽດເຂົ້າຮ່ວມຂອງທ່ານ ສິນລະວົງ ຄຸດໄພທູນ ເຈົ້າຄອງ ນະຄອນຫລວງວຽງຈັນທ່ານ ອານຸພາບ ຕຸນາລົມ ກ່າວເປີດກອງປະຊຸມວ່າ: ຕະຫຼອດໄລຍະ 6 ເດືອນຜ່ານມາ ບັນດາອົງການຈັດຕັ້ງລັດ ອ້ອມຂ້າງນະຄອນຫລວງວຽງຈັນ ໄດ້ສູມໃສ່ຜັນຂະຫາຍມະຕິກອງປະຊຸມ ສະໄໝສາມັນ ເທື່ອທີ 4 ສະພາປະຊາຊົນ ນະຄອນ ຫລວງວຽງຈັນ, ເຮັດໃຫ້ ນະຄອນຫລວງພວກເຮົາ ສືບຕໍ່ມີສະຖຽນລະພາບດ້ານ ການເມືອງ, ສັງຄົມມີຄວາມສະຫງົບ ເປັນລະບຽບຮຽບຮ້ອຍ, ເສດຖະກິດມີສະຖຽນລະພາບ, ສາມາດສ້າງສະພາບແວດລ້ອມ ແລະ ເງື່ອນໄຂທີ່ເອື້ອອຳນວຍໃຫ້ ແກ່ການພັດທະນາ ນະຄອນຫລວງວຽງຈັນ ໃຫ້ນັບມື້ພົ້ນເດັ່ນ ດີຂຶ້ນເທື່ອລະກ້າວ.
ທ່ານ ອານຸພາບ ກ່າວວ່າ: ກອງປະຊຸມຄັ້ງນີ້ ຈະໄດ້ພ້ອມກັນຄົ້ນຄ້ວາ ພິຈາລະນາ ແລະ ຮັບຮອງເອົາບັນຫາສຳຄັນພຶ້ນຖານຄື: ພິຈາລະນາ ແລະ ຮັບຮອງເອົາບົດລາຍງານຂອງທ່ານ ເຈົ້າຄອງນະຄອນ ຫລວງວຽງຈັນ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ 6 ເດືອນຕົ້ນ ແລະ ທິດທາງແຜນວຽກຈຸດສຸມ 6 ເດືອນທ້າຍ ປີ 2018, ບົດສະຫລຸບການເຄື່ອນໄຫວວຽກງານ 6 ເດືອນຕົ້ນປີ ຂອງຄະນະ ປະຈຳສະພາປະຊາຊົນ ນະຄອນຫລວງວຽງຈັນ, ພິຈາລະນາຮັບຮອງເອົານິຕິກຳ 2 ສະບັບຄື: ຮ່າງຂໍ້ຕົກລົງຂອງເຈົ້າຄອງນະຄອນຫລວງວຽງຈັນ ວ່າດ້ວຍການ ກຳນົດຫົວໜ່ວຍລາຄາທົດແທນຄ່າເສຍຫາຍໃຫ້ຜູ້ຖືກກະທົບຈາກໂຄງການທາງດ່ວນວຽງຈັນ, ຮ່າງຂໍ້ຕົກລົງວ່າດ້ວຍມາດຕະການຫລຸດຜ່ອນອຸປະຕິເຫດ ແລະ ຮັກສາຄວາມປອດໄພຕາມທ້ອງຖະໜົນ ທົ່ວນະຄອນຫລວງວຽງຈັນ, ແລະ ບັນຫາສຳຄັນອື່ນໆອີກ.
