ຢາບາງຊະນິດເຮັດໃຫ້ມີອາການຊຶມເສົ້າ

ເມື່ອເວົ້າເຖິງຜົນຂ້າງຄຽງຂອງການໃຊ້ຢາ ທ່ານອາດຄິດເຖິງຕຸ່ມຜື່ນຄັນ ຫລື ອາການເຈັບຫົວ, ແຕ່ວຽກງານວິໄຈຫລ້າສຸດ ໃນສະຫະລັດອາເມລິກາ ພົບວ່າ ຢາທີ່ແພດສັ່ງໃຫ້ໃຊ້ເປັນປະຈຳຫລາຍຊະນິດອາດເພີ່ມຄວາມສ່ຽງໃຫ້ຜູ້ໃຊ້ມີອາການຊຶມເສົ້າ.

ສ່ວນໜຶ່ງຂອງຢາເຫລົ່ານີ້ແມ່ນຢາປິ່ນປົວພະຍາດຫົວໃຈ, ຢາຄຸມກຳເນີດ ແລະ ຢາແກ້ປວດ ເຊິ່ງເປັນຢາທີ່ຄົນຈຳນວນຫລາຍໃນປະເທດອື່ນໆໄດ້ຮັບການສັ່ງຈ່າຍຈາກແພດເຊັ່ນກັນ.

ຫລາຍກ່ວາ 1 ໃນ 3 ຂອງຢາທີ່ຜູ້ເຂົ້າຮ່ວມການສຶກສາ 26 ພັນຄົນ ມີອາການຊຶມເສົ້າເປັນຜົນຂ້າງຄຽງມາຈາກຢາທີ່ກິນ.

ວາລະສານສະມາຄົມການແພດອາເມລິກາຕີພິມຜົນການວິໄຈກຸ່ມໂຕຢ່າງໃນສະຫະລັດອາເມລິກາ ເຊິ່ງມີອາຍຸ 18 ປີຂຶ້ນໄປ ແລະ ກຳລັງຮັບຢາຢ່າງໜ້ອຍ 1 ຊະນິດ ລະຫ່ວາງປີ 2005 – 2014  ເຊິ່ງພົບວ່າ 37%  ຂອງຢາທີ່ສັ່ງຈ່າຍໂດຍແພດ ເຊິ່ງລວມເຖິງຢາແກ້ປວດບາງຊະນິດ ແລະ ຢາຫລຸດກົດໃນກະເພາະອາຫານມີຜົນຂ້າງຄຽງອັນຕະລາຍຢ່າງໜຶ່ງຄື ການມີອາການຊຶມເສົ້າ.

ຜົນການສຶກສາຈາກກຸ່ມໂຕຢ່າງພົບວ່າ ຍິ່ງໃຊ້ຢາຫລາຍຊະນິດຍິ່ງມີໂອກາດມີອາການຊຶມເສົ້າຫລາຍຂຶ້ນ, 7% ໃນກຸ່ມຜູ້ທີ່ ກິນຢາເຫລົ່ານີ້ 1 ຊະນິດ, 9% ສຳລັບຄົນທີ່ກິນຢາ 2 ຊະນິດ, 15% ສຳລັບຄົນທີ່ກິນຢາ 3 ຊະນິດຂຶ້ນໄປ. ປະເມີນກັນວ່າ ປະມານ 5% ຂອງຜູ້ໃຫຍ່ໃນສະຫະລັດພະເຊີນກັບການມີອາການຊຶມເສົ້າ.

ຜູ້ຊ່ວຍສາສະດາຈານ ດີມາ ກາໂຕ ຫົວໜ້າຄະນະຜູ້ສຶກສາຈາກມະຫາວິທະຍາໄລອິນລີນອຍ ກ່າວວ່າ :  ຫລາຍຄົນອາດແປກໃຈທີ່ຮູ້ວ່າຢາທີ່ພວກເຂົາກິນຢູ່ເຖິງຈະບໍ່ໄດ້ກ່ຽວຂ້ອງກັບການປິ່ນປົວອາການວິຕົກກັງວົນ ຫລື ດ້ານອາລົມ ອາດເພີ່ມຄວາມສ່ຽງຂອງການມີອາການຊຶມເສົ້າໄດ້ ແລະ ອາດນຳໄປສູ່ການບົ່ງມະຕິວ່າມີອາການຊຶມເສົ້າໃນທີ່ສຸດ.

ແນວໃດກໍໍຕາມ ຍັງບໍ່ເປັນທີ່ຈະແຈ້ງວ່າຢາເຫລົ່ານີ້ເປັນສາເຫດຂອງອາການຊຶມເສົ້າຫງ່ວມເຫງົາຫລືບໍ່  ເມື່ອທ່ານຮູ້ສຶກບໍ່ສະບາຍຮ່າງກາຍ ທ່ານຍ່ອມຮູ້ສຶກບໍ່ສະບາຍໃຈ ແລະ ເປັນໄປໄດ້ທ່ີຜູ້ເຂົ້າຮ່ວມການສຶກສາບາງສ່ວນອາດຈະມີປະຫວັດການມີອາການຊຶມເສົ້າມາກ່ອນແລ້ວ.

ຜູ້ຊ່ຽວຊານອັງກິດເຕືອນວ່າ ການສຶກສານີ້ສະແດງໃຫ້ເຫັນເຖິງການກ່ຽວຂ້ອງກັນລະຫ່ວາງການຮັບຢາເຫລົ່ານີ້ ແລະ ຄວາມສ່ຽງຂອງການມີອາການຊຶມເສົ້າ ແຕ່ບໍ່ໄດ້ລະບຸວ່າເປັນເຫດຜົນຂອງກັນ ແລະ ກັນ.

ຢາບາງຊະນິດໃຫ້ຜົນຂ້າງຄຽງຄືອາການຊຶມເສົ້າ ເຊັ່ນ : ຢາຄຸມກຳເນີດບາງຊະນິດ ແຕ່ສຳລັບຢາຊະນິດອື່ນບໍ່ຄ່ອຍພົບຜົນຂ້າງຄຽງແບບນີ້.

ຫາກຜົນຂ້າງຄຽງທີ່ພົບໄດ້ຫລາຍກ່ວາ 10% ຂອງຜູ້ໃຊ້ຢາຖືວ່າເປັນຜົນຂ້າງຄຽງທີ່ພົບໄດ້ຫລາຍ. ສ່ວນຜົນຂ້າງຄຽງທີ່ບໍ່ ຄ່ອຍພົບຈະສົ່ງຜົນຕໍ່ຄົນໃນອັນຕາ 1 ໃນ 10.000 ຂໍ້ມູນນີ້ສາມາດຄົ້ນພົບໄດ້ທງອອນລາຍ ແລະ ຖືກຕິພິມຕິດໄວ້ກັບກ່ອງຢາ. ໂຕຢ່າງການກິນຢາຄຸມກຳເນີດມີຄວາມກ່ຽວຂ້ອງທີ່ຈະແຈ້ງລະຫ່ວາງລະດັບຮໍໍໂມນ ແລະ ອາລົມ, ແຕ່ໃນຢາອື່ນ ເຊັ່ນ : ຢາປົວພະຍາດຫົວໃຈເປັນເລື່ອງຍາກກ່ວາທີ່ຈະວິເຄາະວ່າຢາ  ຫລື ອາການຂອງພະຍາດທີ່ເປັນສາເຫດໃຫ້ເກີດອາການຊຶມເສົ້າຂຶ້ນ.

ແພດແນະນຳວ່າຫາກທ່ານກຳລັງກິນຢາເຫລົ່ານີ້ຢູ່ ແລະ ບໍ່ມີສັນຍານຂອງອາການຊຶມເສົ້າກໍບໍ່ຕ້ອງກັງວົນຫຍັງ. ແຕ່ສຳລັບຜູ້ທີ່ຮັບຢາເຫລົ່ານີ້ມີອາການຊຶມເສົ້າ ແນະນຳວ່າໃຫ້ປຶກສາແພດທົ່ວໄປ ຫລື ແພດຜູ້ຊ່ຽວຊານ ຫລື ຫາຢາອື່ນທີ່ບໍ່ມີຜົນຂ້າງຄຽງດ້ານນີ້. ຖ້າທ່ານຈຳເປັນຕ້ອງຮັບຢາເຫລົ່ານີ້ກໍຄວນລະມັດລະວັງໄວ້ແດ່ ໂດຍສະເພາະຫາກທ່ານກຳລັງຮັບຢາອີກຊະນິດໜຶ່ງຢູ່ທີ່ກ່ຽວຂ້ອງກັບອາການຊຶມເສົ້າຢູ່ແລ້ວ.