ຍີ່ປຸ່ນເລັ່ງຟື້ນຟູລະບົບໂຄງລ່າງພື້ນຖານ ໃນພື້ນທີ່ປະສົບອຸທົກກະໄພ
ລັດຖະບານຍີ່ປຸ່ນທຸ້ມງົບປະມານໃນເບື້ອງຕົ້ນ 70.000 ລ້ານເຢັນ ເລັ່ງສ້ອມແປງ ແລະ ຟື້ນຟູລະບົບໂຄງລ່າງພື້ນຖານໃນພື້ນທີ່ປະສົບອຸທົກກະໄພຄັ້ງຮຸນແຮງທີ່ສຸດໃນຮອບ 36 ປີ ເຊິ່ງມີຜູ້ເສຍຊີວິດແລ້ວເກືອບ 180 ຄົນ.
ສຳນັກຂ່າວຕ່າງປະເທດລາຍງານໃນວັນທີ 11 ກໍລະກົດວ່າ: ທ່ານ ໂຢຊິຮິເດະ ຊີກະ ເລຂາທິການຄະນະລັດຖະບານຍີ່ປຸ່ນ ກ່າວເຖິງຄວາມຄືບໜ້າຂອງພາລະກິດຄົ້ນຫາ ແລະ ກູ້ໄພໃນພື້ນທີ່ປະສົບອຸທົກກະໄພຄັ້ງຮຸນແຮງທີ່ສຸດນັບແຕ່ປີ 1982 ເຊິ່ງພື້ນທີ່ປະສົບໄພສ່ວນຫລາຍຢູ່ບໍລິເວນເບື້ອງຕາເວັນຕົກຂອງເກາະຮົນຊູ ວ່າຈຳນວນຜູ້ສູນຫາຍນັບແຕ່ສະຖານະການເກີດຂຶ້ນໃນອາທິດຜ່ານມາມີປະມານ 50 ຄົນ ສ່ວນຫລາຍຢູ່ແຂວງຮິໂຣຊິມະ ເຊິ່ງໜ່ວຍງານທີ່ກ່ຽວຂ້ອງຍັງດຳເນີນການຄົ້ນຫາຢ່າງສຸດຄວາມສາມາດຕະຫລອດ 24 ຊົ່ວໂມງ. ຂະນະທີ່ຈຳນວນຜູ້ເສຍຊີວິດມີຢ່າງໜ້ອຍ 179 ຄົນ.
ກອງປະຊຸມລັດຖະບານຍີ່ປຸ່ນມີມະຕິຈັດສັນງົບປະມານສຸກເສີນເບື້ອງຕົ້ນ 70.000 ລ້ານເຢັນ ຈາກກອງທຶນດ້ານລະບົບໂຄງລ່າງພື້ນຖານ ເພື່ອເລັ່ງສ້ອມແປງ ແລະ ຟື້ນຟູສິ່ງກໍ່ສ້າງທີ່ເສຍຫາຍໃນທຸກແຂວງ. ທັງນີ້ ມີລາຍງານວ່າ: ນາຍົກລັດຖະມົນຕີ ຊິນໂຊ ອາເບະ ສັ່ງສຳຮອງງົບປະມານໄວ້ເພື່ອຟື້ນຟູສູງເຖິງ 350.000 ລ້ານເຢນ ແລະ ອາດມີການເພີ່ມງົບປະມານອີກຖ້າມີຄວາມຈຳເປັນ.
ນາຍົກລັດຖະມົນຕີ ຊິນໂຊ ອາເບະ ລົງພື້ນທີ່ຢ້ຽມຢາມ ແລະ ໃຫ້ກຳລັງໃຈຜູ້ປະສົບອຸທົກກະໄພ ທີ່ເມືອງມາບິ ທາງຕອນໃຕ້ຂອງແຂວງໂອກາຢາມະ ໃນພາກຕາເວັນຕົກຂອງເກາະຮົນຊູ ໂດຍຜູ້ປະສົບໄພໃນພື້ນທີ່ແຫ່ງນີ້ປະມານ 300 ຄົນ ເຂົ້າໄປອາໄສຊົ່ວຄາວທີ່ໂຮງຮຽນ.
