ຊາຂີງດີຕໍ່ສຸຂະພາບຂອງແມ່ຍິງໂດຍກົງ

ເຄັດລັບຈາກແພດແຜນບູຮານເຊື່ອວ່າ : ການດື່ມນຳ້ຊາຂີງຊ່ວຍຫລຸດອາການປວດປະຈຳເດືອນ, ຫລຸດຮອຍສິວ ແລະ ຮອຍຝ້າໄດ້, ແຕ່ເມື່ອເວົ້າເຖິງຄຸນປະໂຫຍດ ຫລື ສັບພະຄຸນຂອງຂີງແລ້ວ ບໍ່ໄດ້ມີພຽງເທົ່ານັ້ນແນ່ນອນ ເພາະຈາກຜົນການສຶກສາວິໄຈໄດ້ພົບຕື່ມວ່າ : ຂີງ ຫລື ນຳ້ຊາທີ່ເຮັດຈາກຂີງມີສັບພະຄຸນຊ່ວຍຟື້ນຟູສະພາບຮ່າງກາຍຫລັງເກີດລູກ ຫລື ໄລຍະເປັນແມ່ລູກອ່ອນ, ຫລຸດ  ຫລື ລຶບຮອຍແປ້ວຈາກສິວ ແລະ ຮອຍເຂັ້ມຈາກຝ້າ, ແກ້ອາການປວດຮາກ, ຫລຸດອາການຍື່ງທ້ອງແໜ້ນທ້ອງ ແລະ ແກ້ອາການເຈັບທ້ອງນ້ອຍປວດປະຈຳເດືອນໄດ້ນຳອີກ.

ເອີ້ນໄດ້ວ່າຮອບດ້ານແທ້ໆ ດັ່ງນັ້ນມື້ນີ້ພວກເຮົາຈຶ່ງນຳເອົາສູດເຮັດນຳ້ຊາຂີງມາແນະນຳທ່ານ.

     – ວິທີເຮັດ : ຂີງແກ່, ຂ່າແກ່, ຫົວສີໄຄ ເອົາທັງ 3 ສ່ວນປະສົມນີ້ມາລ້າງໃຫ້ສະອາດ, ປອກເປືອກຂີງ ແລະ ຂ່າອອກ ຈາກນັ້ນຊອຍສະໝຸນໄພແຕ່ລະຊະນິດເປັນຕ່ອນນ້ອຍໆບາງໆ ເອົາເຂົ້າເຕົາອົບໃຊ້ອຸນຫະພູມປະມານ 40 – 60 ອົງສາ ປະໄວ້ 3 ຊົ່ວໂມງ ຫລື ວາງພືດສະໝຸນໄພເຫລົ່ານີ້ເທິງພາຖາດເຫລັກ ແລ້ວເອົາໄປຕາກແດດປະໄວ້ 2 ມື້ ຫລື ຈົນກ່ວາພືດສະໝຸນໄພທັງ 3 ຈະແຫ້ງ ຈຶ່ງເອົາມາເກັບໄວ້ໃນກວດໂຫລ ຫລື ກວດແກ້ວໄວ້.

ພຽງເທົ່ານີ້ທ່ານກໍໄດ້ຊາເພື່ອສຸຂະພາບແລ້ວ ຫາກຈະໃຊ້ດື່ມກໍໃຫ້ເອົາອອກມາປະມານ 1 ບ່ວງຊາ ຊົງໃສ່ນຳ້ຮ້ອນເກືອບເຕັມຈອກ, ປິດຝາປະໄວ້ 15 ນາທີ ຫລື ດື່ມຂະນະອຸ່ນໆເພື່ອຜົນທີ່ດີ.