ຖວທ ນະຄອນຫລວງລົງຊຸກຍູ້ປັບປຸງສະຖານທີ່ທ່ອງທ່ຽວຢູ່ເມືອງສີໂຄດຕະບອງ
ເມື່ອບໍ່ດົນມານີ້, ທ່ານ ຄຳປະດິດ ເຂັມມານິດ ຫົວໜ້າພະແນກຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ນະຄອນຫລວງວຽງຈັນ, ພ້ອມດ້ວຍເຈົ້າໜ້າທີ່ກ່ຽວຂ້ອງ ໄດ້ລົງກວດສອບ ແລະ ປັບປຸງສະຖານທີ່ທ່ອງທ່ຽວ ຢູ່ເມືອງສີໂຄດຕະບອງນະຄອນຫລວງວຽງຈັນ, ພາຍຫລັງເຫັນວ່າມີຜູ້ປະກອບການສະຖານທີ່ທ່ອງທ່ຽວຈໍານວນມີການສວຍໂອກາດຂຶ້ນລາຄາ ແລະ ເກັບຄ່າບໍລິການແພງ ແລະ ບາງແຫ່ງມີການປະປ່ອຍໃຫ້ເກີດຄວາມເປື້ອນເປີະສົ່ງຜົນກະທົບຕໍ່ສິ່ງແວດລ້ອມ, ໂດຍສະເພາະແຫລ່ງທ່ອງທ່ຽວຕາດມູນ, ຕາດວັງຫລວງ, ຕາດວັງນອງ, ຕາດປ່າໄລ່, ຕາດວັງນ້ຳເຜີ້ງ, ຕາດຫົວເສືອ ແລະ ແຫລ່ງທ່ອງທ່ຽວເກີດໃໝ່ຄືແຫລ່ງທ່ອງທ່ຽວທຳມະຊາດສຸດໃຈ ໃຫ້ມີການບໍລິການທີ່ດີ, ລາຄາເໝາະສົມ ແລະ ມີຄວາມສະອາດດີກວ່າເກົ່າ.
ທ່ານຫົວໜ້າພະແນກ ຖວທ ໃຫ້ຮູ້ວ່າ: ອີງໃສ່ທິດທາງແຜນການໃນການຊຸກຍູ້ ແລະ ສົ່ງເສີມການພັດທະນາແຫລ່ງທ່ອງທ່ຽວເພື່ອຮັບໃຊ້ໃຫ້ແກ່ປີທ່ອງທ່ຽວລາວ 2018 ຢູ່ນະຄອນຫລວງວຽງຈັນ. ໃນນັ້ນ ໜຶ່ງໃນກິດຈະກຳທີ່ທາງພະແນກໄດ້ກຳນົດແມ່ນການຕິດຕາມບັນດາແຫລ່ງທ່ອງທ່ຽວທີ່ມີແລ້ວ ເພື່ອຊຸກຍູ້ໃຫ້ມີການປັບປຸງໃຫ້ດີຂຶ້ນ, ແນໃສ່ຮັບຮອງໃຫ້ແກ່ການບໍລິການຮັບໃຊ້ນັກທ່ອງທ່ຽວ ແລະ ລົງຊຸກຍູ້ຕໍ່ກັບບັນດາແຫລ່ງທ່ອງທ່ຽວທີ່ກຳລັງມີການບຸກເບີກ ແລະ ພັດທະນາໃໝ່ ຕາມການອະນຸມັດຂອງພາກສ່ວນກ່ຽວຂ້ອງ, ເຊິ່ງມາເບິ່ງແຕ່ລະຈຸດກໍໄດ້ເນັ້ນໃຫ້ບັນດາຜູ້ປະກອບການເອົາໃຈໃສ່ປັບປຸງແຫລ່ງທ່ອງທ່ຽວໃຫ້ໄດ້ມາດຕະຖານ, ເອົາໃຈໃສ່ປົກປັກຮັກສາ ແລະ ຄຸ້ມຄອງແຫລ່ງທ່ອງທ່ຽວໃຫ້ດີ, ຮັກສາສິ່ງແວດລ້ອມ, ການບໍລິການທີ່ດີ, ມີຄວາມປອດໄພ, ຮັກສາຄວາມສະອາດຕາມແຄມທາງໃຫ້ມີຄວາມສວຍງາມ ແລະ ນຳໃຊ້ສຽງເພງໃຫ້ຢູ່ໃນຂອບເຂດທີ່ລະບຽບກຳນົດໄວ້.
