ເພີ່ມຄວາມຮູ້ຕ້ານພະຍາດໄຂ້ຍຸງລາຍໃຫ້ສື່ມວນຊົນ
ເມື່ອທ້າຍອາທິດຜ່ານມາ, ພະແນກສາທາລະນະສຸກນະຄອນຫລວງວຽງຈັນໄດ້ຈັດຊຸດອົບຮົບຄວາມຮູ້ການເຝົ້າລະວັງ ແລະ ການຄວບຄຸມພະຍາດໄຂ້ຍຸງລາຍໃຫ້ແກ່ສື່ມວນຊົນໃນການໂຄສະນາຕ້ານພະຍາດດັ່ງກ່າວ, ໂດຍການເປັນປະທານຂອງທ່ານ ພອນປະເສີດ ອຸນາພົມ ຫົວໜ້າພະແນກສາທາລະນະສຸກນະຄອນຫລວງວຽງຈັນ, ມີບັນດານັກຂ່າວ-ສື່ມວນຊົນຈາກໜັງສືພີມ, ໂທລະພາບ, ວິທະຍຸ ແລະ ວາສະສານຕ່າງໆເຂົ້າຮ່ວມເປັນຈຳນວນຫລາຍ.
ທ່ານຫົວໜ້າພະແນກສາທາລະນະສຸກນະຄອນ ກ່າວວ່າ: ເພື່ອເຮັດໃຫ້ການສະໜອງຂໍ້ມູນຂ່າວສານລະຫວ່າງຂະແໜງສາທາລະນະສຸກກັບສື່ມວນຊົນຖືກຕ້ອງ, ຊັດເຈນ ແລະ ເປັນເອກະພາບ, ໂດຍສະເພາະແມ່ນວຽກງານຕ້ານ ແລະ ຄວບຄຸມການລະບາດຂອງພະຍາດຕ່າງໆ ແລະ ປັດຈຸບັນກຽມກ້າວສູ່ລະດູຝົນ, ຊຶ່ງອາດມີພະຍາດຕ່າງໆມາກັບລະດູການ, ໂດຍສະເພາະແມ່ນພະຍາດໄຂ້ຍຸງລາຍ ແລະ ຖອກທ້ອງ. ສະນັ້ນເພື່ອເປັນການໂຄສະນາການຕ້ານ, ປ້ອງການ ແລະ ຄວບຄຸມພະຍາດຕ່າງໆທີ່ອາດຈະເກີດຂື້ນ, ພະແນກສາທາລະນະສຸກນະຄອນຫລວງຈຶ່ງໄດ້ຈັດຊຸດຝຶກອົບຮົບນີ້ຂື້ນ ເພື່ອເພີ່ມທະວີການຮ່ວມມືກັບບັນດາສື່ມວນຊົນໃນວຽການໂຄສະນາ ແລະ ໃຫ້ສື່ມວນຊົນຮັບຮູ້ເພີ່ມເຕີມ ກ່ຽວກັບວິທີການປ້ອງກັນພະຍາດຕ່າງໆ, ໂດຍສະເພາະແມ່ນພະຍາດໄຂ້ຍຸງລາຍ, ທັງເປັນການສ້າງເຄືອຂ່າຍປະສານງານໃຫ້ມີການຕອບໂຕ້ໄວ ແລະ ທັນກັບເວລາເມື່ອມີເຫດລະບາດຂອງພະຍາດໃດໜຶ່ງເກີດຂື້ນ ແລະ ເປັນເອກະພາບກັນໃນການນຳໃຊ້ຂໍ້ມູນຂ່າວສານທີ່ຈະນຳໄປໂຄສະນາເຜີຍແຜ່ຜ່ານສື່ຕ່າງໆໃຫ້ສັງຄົມຮັບຮູ້ເຂົ້າໃຈໄປລວງດຽວກັນ ແລະ ມີຄວາມຊັດເຈນ, ພ້ອມທັງຮູ້ວິທີ ປ້ອງກັນພະຍາດຕ່າງໆໃຫ້ມີປະສິດທິຜົນ.
