ແຕ່ງຕັ້ງຄະນະບໍລິຫານສະຫະພັນລົດຖີບ ນວ

ວັນທີ 4 ກໍລະກົດ ຜ່ານມາ ທີ່ນະຄອນຫລວງວຽງຈັນ ໄດ້ພິທີປະກາດແຕ່ງຕັ້ງຄະນະບໍລິຫານງານສະຫະພັນລົດຖີບນະຄອນຫລວງວຽງຈັນ(ນວ)ຊຸດໃໝ່ ພ້ອມທັງວາງແຜນກຽມເຂົ້າຮ່ວມງານກິລາແຫ່ງຊາດ ໂດຍມີທ່ານ ສົມພອນ ສອນດາລາ ຮອງຫົວໜ້າພະແນກສຶກສາທິການ ແລະ ກິລາ ນວ,ທ່ານ ສຸກສາຄອນ ໃສທິລາດປະທານສະຫະພັນລົດຖີບນະຄອນຫລວງວຽງຈັນ ຄົນໃໝ່ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ທ່ານ ສຸກສາຄອນ ໃສທິລາດ ໄດ້ກ່າວວ່າ: ເພື່ອກຽມຄວາມພ້ອມນຳພາທັບນັກກິລາລົດຖີບ ນະຄອນຫລວງວຽງຈັນ ເຂົ້າຮ່ວມງານກິລາແຫ່ງຊາດ ຄັ້ງທີ 11 ທີ່ແຂວງຊຽງຂວາງ ຮັບກຽດເປັນເຈົ້າພາບ ຈະຈັດຂຶ້ນໃນທ້າຍປີນີ້ ທາງຄະນະບໍລິຫານຂອງພວກເຮົາໄດ້ຕັ້ງເປົ້າໝາຍວັງຍາດເອົາ 4 ຫລຽນຄຳ ພ້ອມທັງຈະອັດສີດຜົນງານໃຫ້ນັກກິລາຖ້າສາມາດສ້າງຜົນງານຍາດໄດ້ຫລຽນຄຳຕາມເປົ້າໝາຍຈະໄດ້ຮັບເງິນລາງວັນໂບນັດຫລຽນຄຳ 10 ລ້ານກີບ, ຫລຽນເງິນ 7 ລ້ານກີບ ແລະ ຫລຽນທອງ 5 ລ້ານກີບ.

ທ່ານ ສຸກສາຄອນ ໃສທິລາດ ຍັງກ່າວຕື່ມອີກວ່າ: ໃນໄລຍະກະກຽມຄວາມພ້ອມນັກກິລາເຂົ້າຮ່ວມແຂ່ງຂັນ ຊຽງຂວາງ ເກມ 2018 ທາງຄະນະບໍລິຫານງານສະຫະພັນຊຸດນີ້ ຈະໄດ້ຮ່ວມແຮງຮ່ວມໃຈກັນວາງແຜນຈັດກິດຈະກຳແຂ່ງຂັນລົດຖີບຫລາຍລາຍການຢ່າງຕໍ່ເນື່ອງ ເພື່ອເປັນການທົດສອບຄວາມສາມາດນັກກິລາລົດຖີບ ນວ ເສີມສ້າງປະສົບການໃຫ້ແຂງແກ່ນ ແລະ ສາມາດເຂົ້າຮ່ວມຄັດເລືອກນັກກິລາດີເດັ່ນຖືກຕາມເປົ້າໝາຍຕົວຈິງ ແລະ ນັກກິລາທີ່ສາມາດຕິດທີມ ນະຄອນຫລວງວຽງຈັນ ກໍ່ຈະຮັກສາໄວ້ຮ່ວມສັງກັດ ສະໂມສອນລົດຖີບອາຊີບ ນະຄອນຫລວງວຽງຈັນ ເພື່ອກຽມສົ່ງເຂົ້າຮ່ວມແຂ່ງຂັນລົດຖີບອາຊີບ ຢູ່ບັນດາປະເທດເພື່ອນບ້ານ.