ຄະນະຜູ້ແທນ ສປປ ລາວ ສຳເລັດການເຂົ້າຮ່ວມກອງປະຊຸມສະໄໜວິສາມັນຄັ້ງທີ 2 ປະຈຳປີ 2018 ຂອງສະພາບໍລິຫານອົງການສາກົນເພື່ອການເຄື່ອນຍ້າຍຖິ່ນຖານ
ໃນວັນທີ 29 ມິຖຸນານີ້, ຄະນະຜູ້ແທນ ສປປ ລາວ ນຳໂດຍທ່ານນາງ ຄຳເພົາ ເອີນທະວັນ ຮອງລັດຖະມົນຕີກະຊວງການຕ່າງປະເທດ ໄດ້ເຂົ້າຮ່ວມກອງປະຊຸມສະໄໜວິສາມັນຄັ້ງທີ 2 ປະຈໍາປີ 2018 ຂອງສະພາບໍລິຫານອົງການສາກົນເພື່ອການເຄື່ອນຍ້າຍຖິ່ນຖານ (IOM) ຊຶ່ງໄດ້ຈັດຂຶ້ນທີ່ນະຄອນເຊີແນວ, ປະເທດສະວິດສະແລນ ພາຍໃຕ້ການເປັນປະທານຂອງທູດປະເທດ ຊິເລ ປະຈຳ ເຊີແນວ, ມີປະເທດສະມາຊິກ IOM ເຂົ້າຮ່ວມ. ເພື່ອປຶກສາຫາລືຫລາຍບັນຫາສຳຄັນທີ່ຕິດພັນກັບວຽກງານບໍລິຫານອົງການ IOM ໃນໄລຍະຜ່ານມາ, ການປະກາດເອົາສະມາຊິກໃໝ່ 3 ປະເທດ, ຊຶ່ງມີ ສປປ ລາວ, ປາລາວ ແລະ ເກຣນາດາ, ປັດຈຸບັນອົງການ IOM ມີສະມາຊິກທັງໝົດ 172 ປະເທດ, ການເລືອກຕັ້ງເອົາຜູ້ອຳນວຍການໃຫຍ່ຄົນໃໝ່ປ່ຽນແທນຜູ້ເກົ່າທີ່ຈະໝົດວາລະໃນທ້າຍເດືອນກັນຍາ 2018 ຊຶ່ງໄດ້ມີຜູ້ສະໝັກ 3 ທ່ານ ຈາກ 3 ປະເທດ: ອາເມລິກາ, ໂກດສະຕາລີກາ ແລະ ປ໋ອກຕຸຍການ. ຜ່ານການລົງຄະແນນທ່ານ António Vitorino ຈາກປະເທດປ໋ອກຕຸຍການ ຊະນະການເລືອກຕັ້ງ ແລະ ຈະເຂົ້າຮັບໜ້າທີ່ເລີ່ມແຕ່ວັນທີ 1 ຕຸລາ 2018 ເປັນຕົ້ນໄປ, ໂດຍມີກຳນົດເວລາການດຳລົງຕຳແໜ່ງ 5 ປີ.
ໃນໂອກາດເຂົ້່າຮ່ວມກອງປະຊຸມຄັ້ງນີ້, ທ່ານນາງ ຄໍາເພົາ ເອີນທະວັນ ໄດ້ກ່າວຄໍາປາໄສຕໍ່ກອງປະຊຸມ ໂດຍໄດ້ສະແດງຄວາມຊົມເຊີຍອົງການ IOM ທີ່ໄດ້ປະກອບສ່ວນໃຫ້ການຊ່ວຍເຫຼືອ ແລະ ປົກປ້ອງຜູ້ເຄື່ອນຍ້າຍຖິ່ນຖານໃນທົ່ວໂລກໃນໄລຍະຜ່ານມາ, ສະແດງຄວາມຂອບໃຈຕໍ່ປະເທດສະມາຊິກ ກໍຄື ອົງການ IOM ທີ່ໄດ້ໃຫ້ການສະໜັບສະໜູນ ແລະ ຮັບຮອງເອົາ ສປປ ລາວເຂົ້າ ເປັນສະມາຊິກ, ພ້ອມທັງສະແດງຄວາມຂອບໃຈຕໍ່ອົງການ IOM ທີ່ໄດ້ໃຫ້ການຊ່ວຍເຫລືອ ສປປລາວ ໃນໄລຍະຜ່ານມາ.
ການເຂົ້າເປັນສະມາຊິກ IOM ຂອງ ສປປ ລາວ ໄດ້ສ້າງຂີດໝາຍໃໝ່ສຳລັບການເສີມຂະຫຍາຍການຮ່ວມມືລະຫວ່າງ ສປປ ລາວ ແລະ ອົງການ IOM ຊຶ່ງສອງຝ່າຍໄດ້ເລີ່ມມີການຮ່ວມມືກັນນັບແຕ່ປີ 2002 ເປັນຕົ້ນມາ ແລະ ໄດ້ເພິ່ມທະວີການຮ່ວມມືກັນເປັນກ່າວໆ ໃນຫຼາຍຂົງເຂດເຊັ່ນ: ການພັດທະນາສີມືແຮງງານ, ການຮັກສຸພະພາບແຮງງານ, ການຊ່ວຍເຫລືອຜູ້ເຄາະຮ້າຍກັບຄືນປະເທດ, ວຽກງານຕອບໂຕ້ ແລະ ຮັບມືໄພພິບັດ, ວຽກງານກວດຄົນເຂົ້າ-ອອກເມືອງ ແລະ ວຽກງານສະກັດກັ້ນ ແລະ ຕ້ານການຄ້າມະນຸດ.
ໃນໂອກາດເຂົ້າຮ່ວມກອງປະຊຸມຄັ້ງນີ້, ຄະນະຜູ້ແທນລາວ ຍັງໄດ້ພົບປະເຮັດວຽກກັບທ່ານນາງ Laura Thompson ຮອງຜູ້ອຳນວຍການໃຫຍ່ອົງການ IOM ເພື່ອສະແດງຄວາມຂອບໃຈຕໍ່ອົງການ IOM ທີ່ໄດ້ໃຫ້ການຮ່ວມມື ແລະ ຊ່ວຍເຫຼືອ ສປປ ລາວ ໃນໄລຍະຜ່ານມາ, ພ້ອມທັງໄດ້ປຶກສາຫາລືກ່ຽວກັບທິດທາງແຜນການ ເພື່ອຍົກລະດັບການຮ່ວມມືສອງຝ່າຍໃນຕໍ່ໜ້າ ເປັນຕົ້ນ : ແມ່ນການຂະຫຍາຍການຮ່ວມມື ແລະ ເພິ່ມທະວີການຊ່ວຍເຫຼືອດ້ານເຕັກນິກ ແລະ ການສ້າງຂີດຄວາມສາມາດດ້ານວິຊາການໃຫ້ແກ່ພະນັກງານລາວ.
