ໄດ້ແລ້ວນັກກິລາລາວ 2 ຄົນເຂົ້າຮ່ວມ ກິດຈະກໍາບາເຍີນມິວນິກ
ໄດ້ແລ້ວນັກກິລາລາວ 2 ຄົນເຂົ້າຮ່ວມກິດຈະກໍາກັບສະໂມສອນບາເຍີນມິວນິກຄື: ທ້າວ ສອນໄຊ ພັນທະໄຊ ບ້ານໂນນສະອາດ ເມືອງໄຊທານີ ນະຄອນຫລວງວຽງຈັນ ແລະ ນາງ ສຸກຕາວັນ ຈຳປາທອງ ບ້ານນາໂດນ ເມືອງສາລະວັນ ແຂວງສາລະວັນ ເຊິ່ງການຄັດເລືອກໄດ້ຈັດຂຶ້ນໃນວັນທີ 30 ມິຖຸນາຜ່ານມາ ຢູ່ສະຫະພັນບານເຕະແຫ່ງຊາດລາວ ໂດຍບໍລິສັດ ອາລິອັນສ໌ ປະກັນໄພລາວ.
ໂຄງການ Allianz Junior Football Camp (AJFC) ເປັນກິດຈະກຳທີ່ເປັນກຸ່ມບໍລິສັດ ອາລິອັນສ໌ ຈັດຂຶ້ນຢ່າງຕໍ່ເນື່ອງ ຊຶ່ງປີນີ້ຈັດຂຶ້ນເປັນປີທີ 10 ໂດຍການຮ່ວມມືກັບສະໂມສອນບາເຢີນມິວນິກ ເພື່ອຄັດເລືອກເອົາເຍົາວະຊົນໃນຂົງເຂດທົ່ວໂລກທີ່ມີບໍລິສັດອາລິອັນສ໌ ໄປດໍາເນີນທຸລະກິດຢູ່ ໄປເຂົ້າຄ້າຍທີ່ປະເທດເຢຍລະມັນ ແລະ ປີນີ້ເປັນປີທີ5 ທີ່ກຸ່ມບໍລິສັດອາລິອັນສ໌ ໄດ້ຈັດຂຶ້ນໃນຂົງເຂດອາຊີ-ປາຊີຟິກ ທັງນີ້ເພື່ອຄັດເລືອກເອົາເຍົາວະຊົນທີ່ມັກຮັກໃນກິລາບານເຕະ ແລະ ມີພອນສະຫວັນໃນກິລາດັ່ງກ່າວເຂົ້າຮ່ວມກິດຈະກໍາ ອາລິອັນສ໌ ຈູເນຍ ຟຸດບອນແຄັ້ມ ລະດັບອາຊີ ໂດຍຈະຈັດຂຶ້ນລະຫວ່າງວັນທີ 16-19 ກໍລະກົດ 2018 ທີ່ບາງກອກ ປະເທດໄທ ເຊິ່ງຈະມີເຍົາວະຊົນເກືອບ 60 ຄົນ ຈາກ 9 ປະເທດໃນອາຊີ-ປາຊີຟິກເຂົ້າຮ່ວມຝຶກຊ້ອມເປັນທີມຮ່ວມກັນ.
