ເປີດການແຂ່ງຂັນກິລາເປຕັງທົ່ວປະເທດ ຊີງຂັນນາຍົກລັດຖະມົນຕີ

ການແຂ່ງຂັນກິລາເປຕັງທົ່ວປະເທດ ຄັ້ງທີ 10 ຊີງຂັນ ນາຍົກລັດຖະມົນຕີ ແຫ່ງ ສປປ ລາວ ​ໄດ້​​ໄຂຂຶ້ນຢ່າງເປັນທາງການ ຢູ່​ແຂວງ​ຊຽງ​ຂວາງ ໂດຍເປັນກຽດເຂົ້າຮ່ວມຂອງທ່ານ ສົມດີ ດວງດີ ຮອງນາຍົກລັດຖະມົນຕີ ທັງເປັນປະທານທີ່ປຶກສາສະຫະພັນກິລາເປຕັງແຫ່ງຊາດລາວ, ມີທ່ານ ບຸນຕົ້ນ ຈັນທະພອນ ວ່າການເຈົ້າແຂວງຊຽງຂວາງ, ທ່ານ ບົວລານ ສີລິປັນຍາ ຮອງລັດຖະມົນຕີກະຊວງສຶກສາທິການ ແລະ ກິລາ, ການນຳຂອງບັນດາກະຊວງ, ອົງການຂັ້ນສູນກາງທົ່ວປະເທດ ແລະ ປະຊາຊົນຊາວ​ແຂວງ​ຊຽງ​ຂວາງເຂົ້າຮ່ວມ.

ທ່ານ ຄຳຫລ້າ ວິໄລທອງ ປະທານສະຫະພັນກິລາເປຕັງແຫ່ງຊາດ ໄດ້ກ່າວວ່າ: ເພື່ອເປັນການສືບຕໍ່ຊຸກຍູ້ສົ່ງເສີມພັດທະນາກິລາເປຕັງລາວໃຫ້ໄດ້ຮັບການຂະຫຍາຍວຽກງານກິລາ-ກາຍະກຳເຂົ້າສູ່ມວນຊົນບັນດາເຜົ່າໃຫ້ຫັນມາຫລິ້ນກິລາຢ່າງກວ້າງຂວາງ ແລະ ຕໍ່ເນື່ອງ, ສ້າງນ້ຳໃຈຄວາມສາມັກຄີມີລະບຽບວິໄນຂອງຊາວໜຸມນັກຮຽນນັກສຶກສາປັນຍາຊົນ ແລະ ປວງຊົນລາວບັນດາເຜົ່າ ແລະ ເປັນການພັດທະນາຮອບດ້ານໃນການກະກຽມການເປັນເຈົ້າພາບຈັດການແຂ່ງຂັນລະດັບສາກົນ. ພ້ອມກັນນີ້ ໄດ້ຄັດເລືອກເອົານັກກິລາທີ່ມີສີມືດີເດັ່ນເປັນນັກກິລາລຸ້ນສືບທອດ ແລະ ເປັນເປົ້າໝາຍປະກອບເຂົ້າທີມຊາດ ເພື່ອໄປຮ່ວມແຂ່ງຂັນໃນລະດັບພາກພື້ນ ແລະ ລະດັບສາກົນ.

ໂອກາດນີ້,  ທ່ານ ບົວສອນ ສີນວນທອງ ຮອງເຈົ້າແຂວງຊຽງຂວາງ, ປະທານຈັດການແຂ່ງຂັນ ໄດ້ກ່າວວ່າ: ການແຂ່ງຂັນໄດ້ເລີ່ມແຂ່ງຂັນມາແຕ່ວັນທີ 30 ມິຖຸນາ 2018 ຈະແຂ່ງຂັນຈົນມາເຖິງວັນທີ 5 ກໍລະກົດ 2018 ມີ 10 ລາຍການແຂ່ງຂັນຄື: ຊຸດຕິງຊາຍ, ຊຸດຕິງຍິງ, ດ່ຽວຊາຍ, ດ່ຽວຍິງ, ຄູ່ຊາຍ, ຄູ່ຍິງ, ຄູ່ປະສົມ (1 ຊາຍ+1 ຍິງ), ຄູ່ IVP ລຸ້ນ 50 ປີຂຶ້ນໄປ, ທີມຊຸດຊາຍ  ແລະ ທີມຊຸດຍິງ  ມີນັກກິລາເຂົ້າຮ່ວມ 300 ກວ່າຄົນ. ໂອກາດນີ້ ທ່ານ ສົມດີ ດວງດີ ຮອງນາຍົກລັດຖະມົນຕີ ໄດ້ໃຫ້ກຽດລັ່ນຄ້ອງ 9 ບາດ ເພື່ອເປັນສິລິມຸງຄຸນ ແລະ ໂຍນໝາກບູນ ເພື່ອເປີດການແຂ່ງຂັນເປັນທາງການ.