ອິນໂດເນເຊຍ-ມາເລເຊຍ ຈັບມືສູ້ ມາດຕະການຫ້າມນ້ຳມັນປາມຂອງ EU
ສຳນັກຂ່າວຕ່າງປະເທດລາຍງານວ່າ: ປະທານາທິບໍດີ ໂຈໂຄ ວິໂດໂດ ໃຫ້ການຕ້ອນຮັບ ດຣ. ມະຫາເທ ໂມຮຳໝັດ ນາຍົກລັດຖະມົນຕີມາເລເຊຍ ທີ່ທຳນຽບໂບກໍ ໃນນະຄອນຫລວງຈາກາຕາ ໃນວັນທີ 29 ມິຖຸນາ ເຊິ່ງຖືເປັນການຢ້ຽມຢາມອິນໂດເນເຊຍຄັ້ງທຳອິດໃນຮອບ 24 ປີໃນຜູ້ນຳມາເລເຊຍຂອງ ດຣ. ມະຫາເທ.
ຂະນະດຽວກັນ, ທ່ານ ວິໂດໂດ ແລະ ທ່ານ ມະຫາເທ ຍັງເຫັນພ້ອມຮ່ວມກັນໃນຫລັກການ ເພື່ອເພີ່ມການຮ່ວມມືລະດັບທະວີພາຄີໃນການເຈລະຈາກັບສະຫະພາບເອີຣົບ (EU) ເຊິ່ງອອກມາດຕະການໂຈະການນຳເຂົ້າຜະລິດຕະພັນນ້ຳມັນຟາມ ເພື່ອໃຊ້ເປັນເຊື້ອໄຟຊີວະພາບ ທີ່ຈະມີຜົນພາຍໃນປີ 2020 ຄຽງຄູ່ກັບການຮ່ວມກັນຫາທາງອອກດ້ວຍຕົນເອງຈາກນະໂຍບາຍດັ່ງກ່າວຂອງ EU. ທັງສອງປະເທດເບິ່ງວ່າເປັນການກີດກັ້ນທາງການຄ້າ ເຖິງວ່າ EU ໃຫ້ເຫດຜົນວ່າການປູກປາມນ້ຳມັນຄືການທຳລາຍເນື້ອທີ່ປ່າຕາມທຳມະຊາດ. ປັດຈຸບັນ ອິນໂດເນເຊຍ ແລະ ມາເລເຊຍ ເປັນປະເທດຜູ້ສົ່ງອອກນ້ຳມັນປາມລາຍໃຫຍ່ອັນດັບ 1 ແລະ 2 ຂອງໂລກຕາມລຳດັບ, ຄອງອັດຕາສ່ວນໃນຕະຫລາດໂລກຮ່ວມກັນສູງເຖິງ 85%.
ນອກຈາກນີ້, ຜູ້ນຳທັງສອງປະເທດຍັງຫາລືກ່ຽວກັບການສົ່ງເສີມການຮ່ວມມືທາງການຄ້າໃນລະດັບທະວີພາຄີ ໂດຍມູນຄ່າການຄ້າລະຫວ່າງອິນໂດເນເຊຍກັບມາເລເຊຍໃນປີຜ່ານມາບັນລຸເກືອບ 17.000 ລ້ານໂດລາສະຫະລັດ ແລະ ອິນໂດເນເຊຍຖືເປັນປະເທດຄູ່ຄ້າລາຍໃຫຍ່ອັນດັບ 7 ຂອງມາເລເຊຍ.
