WTO ຊີ້ອົດສະຕຣາລີມີສິດ ອອກກົດໝາຍຢາສູບຊອງເປົ່າ
ອົງການການຄ້າໂລກມີມະຕິວ່າ: ອົດສະຕຣາລີ “ມີຄວາມຊອບທຳ” ໃນການອອກກົດໝາຍໃຫ້ຢາສູບທີ່ວາງຈຳໜ່າຍໃນປະເທດ “ຕ້ອງເປັນຊອງເປົ່າ” ປະຕິເສດການຮ້ອງຮຽນຂອງກຸ່ມປະເທດຜູ້ຜະລິດຢາສູບລາຍໃຫຍ່ຂອງໂລກ.
ສຳນັກຂ່າວຕ່າງປະເທດລາຍງານວ່າ: ຄະນະກຳມະການໄກ່ເກ່ຍຂໍ້ຂັດແຍ່ງການຄ້າຂອງອົງການການຄ້າໂລກ (WTO) ທີ່ເມືອງເຈນີວາ ມີມະຕິໃນວັນທີ 28 ມິຖຸນາວ່າ: ອົດສະຕຣາລີ “ມີຄວາມຊອບທຳ” ໃນການອອກກົດໝາຍໃຫ້ຢາສູບທີ່ວາງຈຳໜ່າຍໃນປະເທດ “ຕ້ອງເປັນຊອງເປົ່າ” ເຊິ່ງບໍ່ລະບຸເຄື່ອງໝາຍການຄ້າ, ແຕ່ໃຫ້ສະແດງຮູບຜົນກະທົບຕໍ່ສຸຂະພາບທີ່ເປັນຜົນເສຍຈາກການສູບຢາ.
ທັງນີ້, ຄະນະກຳມະການຂອງ WTO ເບິ່ງວ່າ: ກົດໝາຍດັ່ງກ່າວຂອງອົດສະຕຣາລີທີ່ບັງຄັບໃຊ້ມາແຕ່ປີ 2012 ຄືການກະຕຸ້ນໃຫ້ປະຊາຊົນເພີ່ມຄວາມສຳຄັນຕໍ່ການຮັກສາສຸຂະພາບ ໂດຍການຫລຸດຜ່ອນຢາສູບ ແລະ ການບໍ່ອະນຸຍາດໃຫ້ຜູ້ຜະລິດຢາສູບສະແດງເຄື່ອງໝາຍການຄ້າໃນຊອງບໍ່ຖືເປັນການລະເມີດຊັບສິນທາງປັນຍາ. ນອກຈາກນີ້ ມະຕິຂອງ WTO ຍັງລະບຸວ່າ: ກົດໝາຍຢາສູບຊອງເປົ່າຂອງອົດສະຕຣາລີເປັນແບບຢ່າງທີ່ດີໃຫ້ຫລາຍປະເທດ ເຊິ່ງບັງຄັບໃຊ້ກົດໝາຍຕາມແລ້ວ ໄດ້ແກ່ຮົງກາລີ, ອຽກລັງ, ຝຣັ່ງ, ນູແວນເຊລັງ, ນອກແວ ແລະ ສະຫະຣາຊະອານາຈັກ.
ຄຳຕັດສິນຂອງ WTO ຖືເປັນການປະຕິເສດການຮ້ອງຮຽນຂອງກູບາ, ສາທາລະນະລັດໂດມິນິກັນ, ຮົງດູຣັດ ແລະ ອິນໂດເນເຊຍ ເຊິ່ງຖືເປັນກຸ່ມປະເທດຜູ້ຜະລິດຢາສູບລາຍໃຫຍ່ລຳດັບຕົ້ນຂອງໂລກ ແລະ ຕ່າງຍື່ນຄຳຮ້ອງລັກສະນະດຽວກັນຕໍ່ WTO ໃນປີ 2014. ເຖິງຢ່າງໃດກໍຕາມ ປະເທດຜູ້ຍື່ນຄຳຮ້ອງທີ່ບໍ່ເຫັນພ້ອມຍັງສາມາດດຳເນີນການອຸທອນຕໍ່ໄດ້ພາຍໃນ 20 ເຖິງ 60 ວັນ ເຊິ່ງຮົງດູຣັດເປັນປະເທດທຳອິດທີ່ຢືນຢັນວ່າຈະຍື່ນເລື່ອງອຸທອນ.
