ແຂ່ງຂັນດອກປີກໄກ່ຊີງຂັນປະທານ ສະພາແຫ່ງຊາດຈະຈັດຂຶ້ນເດືອນສິງຫາ
ສະຫະພັນກິລາດອກປີກໄກ່ແຫ່ງຊາດລາວ ຮ່ວມກັບ ບໍລິສັດ ເບຍລາວ ຈຳກັດ ຈະໄດ້ຈັດການແຂ່ງຂັນກິລາດອກປີກໄກ່ທົ່ວປະເທດ ຄັ້ງທີ 18 ປະຈຳປີ 2018 ຊີງຂັນທ່ານປະທານສະພາແຫ່ງຊາດ ຫລື BeerLao Open 2018 ຂຶ້ນ ເພື່ອສ້າງຂະບວນການຂໍ່ານັບຮັບຕ້ອນວັນລັດຖະທຳມະນູນແຫ່ງ ສປປ ລາວ ຄົບຮອບ 27 ປີ ພ້ອມທັງເປັນການກະກຽມຄວາມພ້ອມຂອງນັກກິລາດອກປີກໄກ່ໃນການເຂົ້າຮ່ວມມະຫາກຳກິລາແຫ່ງຊາດ ຄັ້ງທີ 11 ທີ່ແຂວງຊຽງຂວາງ ຈະເປັນເຈົ້າພາບໃນທ້າຍປີ 2018 ນີ້. ການແຂ່ງຂັນໃນຄັ້ງນີ້ຈະຈັດຂຶ້ນໃນລະຫວ່າງວັນທີ 1-5 ສິງຫາ 2018 ທີ່ເດີ່ນສະໂມສອນດອກປີກໄກ່ບຶງຂະຫຍອງ (ຫລັງເກົ່າ) ເຊິ່ງມີລາຍການແຂ່ງຂັນດັ່ງນີ້: ດ່ຽວເຍົາວະຊົນຊາຍ-ຍິງອາຍຸບໍ່ເກີນ 14 ປີ, ດ່ຽວເຍົາວະຊົນຊາຍ-ຍິງອາຍຸບໍ່ເກີນ 17 ປີ, ຄູ່ເຍົາວະຊົນຊາຍ-ຍິງອາຍຸບໍ່ເກີນ 17 ປີ, ດ່ຽວຊາຍ-ຍິງທົ່ວໄປ, ຄູ່ຊາຍ-ຍິງທົ່ວໄປ, ຄູ່ປະສົມທົ່ວໄປ, ທີມຊາຍ ແລະ ທີມຍິງ. ຕິດຕໍ່ສອບຖາມທີ່ ສະຫະພັນກິລາດອກປີກໄກ່ແຫ່ງຊາດລາວ ໂທ: 020 59193355.
