ມຸມໄບເຂັ້ມງວດຫລັງອອກກົດໝາຍ ຫ້າມປລາສະຕິກໃຊ້ຄັ້ງດຽວ
ສຳນັກຂ່າວຕ່າງປະເທດລາຍງານວ່າ: ທາງການຂອງອິນເດຍສົ່ງເຈົ້າໜ້າທີ່ໜ່ວຍຕໍ່ຕ້ານປລາສະຕິກ ປະມານ 250 ຄົນ ລົງພື້ນທີ່ນະຄອນມຸມໄບ ໃນວັນທີ 26 ມິຖຸນາ ເພື່ອກວດສອບຮ້ານຄ້າຕ່າງໆວ່າ: ປະຕິບັດຕາມຂໍ້ກຳນົດຂອງກົດໝາຍສະບັບໃໝ່ທີ່ຫາກໍມີຜົນບັງຄັບໃຊ້ໃນວັນທີ 23 ມິຖຸນາ ຫລື ບໍ່.
ກົດໝາຍດັ່ງກ່າວຫ້າມບໍ່ໃຫ້ມີການໃຊ້ປລາສະຕິກປະເພດໃຊ້ເທື່ອດຽວແລ້ວຖິ້ມເຊັ່ນ: ຖົງປລາສະຕິກ, ຂວດປລາສະຕິກ, ຈອກປລາສະຕິກ ລວມທັງບ່ວງ ແລະ ສ້ອມປລາສະຕິກ ທັງໃນຜູ້ປະກອບການ ແລະ ປະຊາຊົນທົ່ວໄປ ໂດຍມີໂທດປັບໄໝ 5.000 ຣູປີ ສຳລັບຄວາມຜິດເທື່ອທຳອິດ ແລະ ກໍລະນີທີ່ມີການກະທຳຜິດຊ້ຳອີກ ມີໂທດປັບໄໝສູງສຸດ 25.000 ຣູປີ ຫລື ຈຳຄຸກ 3 ເດືອນ.
ເຈົ້າໜ້າທີ່ເປີດເຜີຍວ່າ: ໃນໄລຍະ 3 ວັນຜ່ານມາ, ຈາກການກວດຄົ້ນຮ້ານຄ້າຫລາຍກວ່າ 8.000 ແຫ່ງໃນມຸມໄບ ປັບໄໝເງິນຜູ້ຝ່າຝືນໄດ້ແລ້ວ 660.000 ຣູປີ ແລະ ກວດຍຶດປລາສະຕິກໄດ້ຢ່າງໜ້ອຍ 700 ກິໂລ. ການໃຊ້ກົດໝາຍນີ້ມີປະກາດມາແຕ່ 3 ເດືອນກ່ອນ ເພື່ອໃຫ້ປະຊາຊົນ ແລະ ພາກທຸລະກິດກຽມພ້ອມ.
