ນະຄອນຫລວງສັ່ງປິດໂຮງງານປຸງແຕ່ງໄມ້ ແລະ ເຟີນີເຈີ 33 ແຫ່ງ
ຂະແໜງການກ່ຽວຂ້ອງຂອງນະຄອນຫລວງວຽງຈັນ, ໄດ້ເຫັນດີເປັນເອກະພາບໃນການສັ່ງປິດໂຮງງານປຸງແຕ່ງໄມ້ 33 ແຫ່ງໃນຈໍານວນ 162 ແຫ່ງ, ຫລັງຈາກພົບວ່າດຳເນີນກິດຈະການບໍ່ຖືກຕ້ອງຕາມລະບຽບກົດໝາຍ.
ຂໍ້ມູນດັ່ງກ່າວໄດ້ມີການເປີດເຜີຍຢູ່ກອງປະຊຸມຫາລືຜົນການກວດກາ ແລະ ການດັດສົມໂຮງງານປຸງແຕ່ງໄມ້ ແລະ ເຟີນີເຈີໃນນະຄອນຫລວງວຽງຈັນເມື່ອທ້າຍອາທິດຜ່ານມານີ້, ໂດຍການເປັນປະທານຂອງທ່ານຮອງເຈົ້າຄອງນະຄອນຫລວງວຽງຈັນ ແກ້ວພິລາວັນ ອາໄພລາດ, ພ້ອມດ້ວຍຂະແໜງການກ່ຽວຂ້ອງຕ່າງໆເຂົ້າຮ່ວມ.
ທ່ານຫົວໜ້າພະແນກອຸດສາຫະກຳ ແລະ ການຄ້າ ເບີລິນ ເພັດຈັນທະລາດໃຫ້ຮູ້ວ່າ: ເພື່ອປະຕິບັດຕາມຄໍາສັ່ງເລກທີ 15/ນຍ ຂອງນາຍົກລັດຖະມົນຕີ, ຂະແໜງການຕົນໄດ້ສົມທົບກັບຂະແໜງກະສິກຳ ແລະ ປ່າໄມ້ນະຄອນຫລວງວຽງຈັນ ຕັ້ງຄະນະກຳມະການລົງກວດກາບັນດາໂຮງງານປຸງແຕ່ງໄມ້ ແລະ ເຟີນີເຈີ ໃນນະຄອນຫລວງວຽງຈັນ, ໂດຍແບ່ງອອກເປັນ 3 ຈຸຄື: ຈຸທີ 1 ລົງກວດຢູ່ເມືອງຈັນທະບູລີ, ຫາດຊາຍຟອງ ແລະ ນາຊາຍທອງ. ຈຸທີ 2 ລົງກວດຢູ່ເມືອງສີໂຄດຕະບອງ, ໄຊເສດຖາ, ສີສັດຕະນາກ ແລະ ສັງທອງ ແລະ ຈຸທີ 3 ລົງກວດຢູ່ເມືອງໄຊທານີ ແລະ ປາກງື່ມ ແລະ ສາມາດກວດກາໄດ້ທັງໝົດ 162 ແຫ່ງ, ເຫັນວ່າໃຫ້ສືບຕໍ່ດຳເນີນກິດຈະການ 32 ແຫ່ງ, ໃນນັ້ນມີໂຮງງານຂະໜາດໃຫຍ່ 21 ແຫ່ງ, ຂະໜາດກາງ 11 ແຫ່ງ ແລະ ໃຫ້ປັບປຸງຄືນໃຫ້ໄດ້ມາດຕະຖານ 83 ແຫ່ງ, ມີໂຮງງານຂະໜາດໃຫຍ່ 10 ແຫ່ງ, ຂະໜາດກາງ 33 ແຫ່ງ ແລະ ຂະໜາດນ້ອຍ 40 ແຫ່ງ ແລະ ມີອອກຄຳສັ່ງໃຫ້ໂຮງງານຢຸດເຊົາດຳເນີນກິດຈະການ 33 ແຫ່ງ, ມີໂຮງງານຂະໜາດໃຫຍ່ 5 ແຫ່ງ, ຂະໜາດກາງ 5 ແຫ່ງ ແລະ ຂະໜາດນ້ອຍ 16 ແຫ່ງ ເນື່ອງຈາກບັນດາໂຮງງານດັ່ງກ່າວຕັ້ງຢູ່ໃກ້ກັບປ່າສະຫງວນ, ອາຄານການຜະລິດຊຸດໂຊມ, ສະຖານທີ່ຕັ້ງຂອງໂຮງງານມີການປຸກສ້າງທີ່ຢູ່ອາໄສໃກ້ກັບໂຮງງານຫລາຍ ເຮັດໃຫ້ເນື້ອທີ່ແອອັດ, ການຜະລິດມີຜົນກະທົບຕໍ່ສິ່ງແວດລ້ອມ-ສັງຄົມ ແລະ ດຳເນີນກິດຈະການບໍ່ຖືກຕ້ອງຕາມລະບຽບກົດໝາຍ, ມີບາງແຫ່ງແມ່ນໃບອະນຸຍາດອອກຊື່ຄົນລາວ ແຕ່ຜູ້ເຮັດຕົວຈິງແມ່ນຄົນຕ່າງປະເທດ, ຈຶ່ງໄດ້ສັ່ງປິດກິດຈະການດັ່ງກ່າວຢ່າງຖາວອນ.
