ອີສະປອດຮັບການສ້າງຕັ້ງຂຶ້ນຢ່າງເປັນທາງການ
ທ້າຍອາທິດຜ່ານມາ ທີ່ Lao e-Sports Arena ຊັ້ນ 5 ອາຄານລາວອາດມີເດຍ ໄດ້ມີພິທີປະກາດສ້າງຕັ້ງສະຫະພັນກິລາອີສະປອດແຫ່ງຊາດລາວ ພ້ອມທັງເປີດຕົວຄະນະບໍລິຫານງານສະຫະພັນຊຸດທຳອິດ ໂດຍມີທ່ານ ບົວລານ ສິລິປັນຍາ ຮອງລັດຖະມົນຕີກະຊວງສຶກສາທິການ ແລະ ກິລາ, ຮອງປະທານຄະນະກຳມະການໂອແລມປິກແຫ່ງຊາດລາວ ຫລື ຄອລ ພ້ອມດ້ວຍຄະນະບໍລິຫານງານສະຫະພັນ, ແຂກທີ່ຖືກເຊີນ, ຜູ້ໃຫ້ການສະໜັບສະໜູນເຂົ້າຮ່ວມ.
ທ່ານ ວັນທະນາ ກຸນນະວັນ ຮອງປະທານ ແລະ ເລຂາທິການສະຫະພັນກິລາອີສະປອດແຫ່ງຊາດລາວ ໄດ້ສະເໜີທີ່ຕັ້ງພາລະບົດບາດ, ວິໄສທັດ ແລະ ແຜນການຕໍ່ໜ້າຂອງຄະນະບໍລິຫານງານຊຸດທຳອິດໃນການສ້າງຂະບວນການ ແລະ ພັດທະນາກ່ຽວກັບກິລາອີສະປອດໃນລາວ ແລະ ພົວພັນເຄື່ອນໄຫວແລກປ່ຽນກັບສາກົນ, ພ້ອມທັງສ້າງຄວາມເຂົ້າໃຈອັນໃໝ່ໃຫ້ກັບໄວໜຸ່ມ, ຜູ້ປົກຄອງໃນສັງຄົມກ່ຽວກັບກິລາອີສະປອດ ແລະ ການຈັດແບ່ງເວລາຢ່າງຖືກວິທີ ລວມທັງຄວາມເຂົ້າໃຈວ່າ ເກມບໍ່ແມ່ນພຽງເກມ ອີສະປອດ ສາມາດສ້າງອາຊີບທີ່ກ່ຽວຂ້ອງໃນສາຂາວິຊາຊີບໄດ້ຢ່າງຫລາກຫລາຍ.
ນອກຈາກນີ້, ຍັງຈະມີການຄັດເລືອກຕົວແທນນັກກິລາທີມຊາດລາວ League of Legends ປະເພດທີມ ເພື່ອເຂົ້າຮ່ວມການແຂ່ງຂັນເທສະການກິລາອີສະປອດ ແລະ ດົນຕີ HYPERPLAY 2018 ເປັນກິດຈະກໍາຄັ້ງທໍາອິດທີ່ເກີດຂຶ້ນໂດຍ ກະຊວງວັດທະນະທຳ, ຊຸມຊົນ ແລະ ຊາວໜຸ່ມ ປະເທດສິງກະໂປ (National Youth Council), ຈັດໂດຍ Riot game ແລະ MTV ໃນການລວມເອົາການແຂ່ງຂັນກິລາອີສະປອດ ແລະ ດົນຕີມາໄວ້ຮ່ວມກັນ ເຊິ່ງເປັນເທື່ອທຳອິດທີ່ຈະມີ 10 ປະເທດອາຊຽນເຂົ້າຮ່ວມ ໃນລະຫວ່າງວັນທີ 4-5 ສິງຫາ 2018 ທີ່ປະເທດສິງກະໂປ.
