ບຸນມະໂຫລານສັງສິນໄຊຄັ້ງທີ 2 ຈະໄດ້ຈັດຂຶ້ນໃນທ້າຍເດືອນມິຖຸນານີ້

ສະມາຄົມສົ່ງເສີມການອະນຸລັກສິລະປະວັນນະຄະດີ ໄດ້ຖະແຫຼ່ງຂ່າວ ວ່າ: ງານບຸນມະໂຫລານສັງສິນໄຊ ຄັ້ງທີ 2 ຈະໄດ້ຈັດຂຶ້ນໃນວັນທີ 30 ມິຖຸນານີ້,  ທີ່ສູນກິລາບູໂດ ນະຄອນຫຼວງວຽງຈັນ, ເພື່ອສືບຕໍ່ໂຄງການເສີມຂະຫຍາຍການອ່ານກາບກອນ ແລະ ຂັບລໍາສັງສິນໄຊ ແລະ ທັງເປັນເວທີຊຸກຍູ້ລູກຫຼານລຸ້ນສືບທອດໃຫ້ມີຈິດໃຈມັກຮັກ, ຟື້ນຟູ ແລະ ອະນຸລັກສິລະປະວັດທະນະທຳອັນເປັນມໍລະດົກຂອງຊາດ ໂດຍສະເພາະຄຳກອນອາຍຸ 400 ປີຂອງນັກປະພັນປາງຄຳ.

ໃນງານດັ່ງກ່າວ, ຈະມີຫຼາຍອົງກອນເຂົ້າຮ່ວມເຊັ່ນ: ທຳມະສັນຈອນ ຈາກພຸດທະສາສະໜາເພື່ອພັດທະນາການ (ຄພພ), ສະມາຄົມຮ່ວມນໍ້າໃຈກັບເດັກນ້ອຍລາວ, ມີຮ້ານຂາຍປື້ມ ແລະ ຮ້ານວາງສະແດງອື່ນໆ. ນອກນີ້, ຍັງຈະໄດ້ຮັບຊົມການສະແດງຈາກນັກຮຽນຊັ້ນປະຖົມ ແລະ ມັດຖະຍົມທັງພາກລັດ ແລະ ເອກະຊົນ ທີ່ມາຈາກ 6 ແຂວງຄື: ຫຼວງພະບາງ, ຊຽງຂວາງ, ໄຊຍະບູລີ,ວຽງຈັນ, ບໍລິຄໍາໄຊ ແລະ ນະຄອນຫຼວງວຽງຈັນ ໂດຍມີຫຼາກຫຼາຍກິດຈະກໍາເຊັ່ນ: ການແຂ່ງຂັນອ່ານ,ເລົ່າຄຳກອນ ແລະ ແຕ້ມຮູບ ວ່າດ້ວຍເລື່ອງສັງສິນໄຊ,ການຮ້ອງເພງ, ສະ​ແດງເຕັ້ນ ສັງສິນໄຊ, ລະຄອນຄຳກອນ, ລະຄອນອີ່ປ໋ອກ ແລະ ຂັບລຳຕ່າງໆ.