ນະຄອນຫລວງສະຫລຸບວຽກງານແກ້ໄຂຄວາມບໍ່ເປັນລະບຽບຮຽບຮ້ອຍໃນສັງຄົມ
ກອງປະຊຸມສະຫລຸບວຽກງານການຫັນກຳລັງລົງກໍ່ສ້າງຮາກຖານການເມືອງຕິດພັນກັບການຈັດສັນຄວາມບໍ່ເປັນລະບຽບຮຽບຮ້ອຍຂອງສັງຄົມຢູ່ນະຄອນຫລວງວຽງຈັນໄລຍະ 6 ເດືອນຕົ້ນປີ ແລະ ທິດທາງ 6 ເດືອນທ້າຍປີ 2018 ໄດ້ຈັດຂຶ້ນໃນວັນທີ 19 ມິຖຸນານີ້, ໂດຍການເປັນປະທານຂອງທ່ານເຈົ້າຄອງນະຄອນຫລວງວຽງຈັນ ສິນລະວົງ ຄຸດໄພທູນ.
ໃນໂອກາດນີ້, ທ່ານພັນເອກ ຄຳພອນ ເທບພະວົງ ຮອງຫົວໜ້າກອງບັນຊາການ ປກສ ນະຄອນຫລວງວຽງຈັນ, ທັງເປັນຄະນະຮັບຜິດຊອບວຽກງານການຫັນກຳລັງລົງກໍ່ສ້າງຮາກຖານການເມືອງຕິດພັນກັບການຕິດພັນກັບການຈັດສັນຄວາມບໍ່ເປັນລະບຽບຮຽບຮ້ອຍໃນນະຄອນຫລວງ ໄດ້ລາຍງານວ່າ: 6 ເດືອນຜ່ານມາ, ຄະນະຮັບຜິດຊອບໄດ້ເອົາໃຈໃສ່ຈັດຕັ້ງປະຕິບັດວຽກງານດ້ວຍຄວາມຮັບຜິດຊອບສູງ ເປັນຕົ້ນແມ່ນວຽກງານຈັດສັນຄວາມບໍ່ເປັນລະບຽບຮຽບຮ້ອຍຕິດພັນກັບການແກ້ໄຂປາກົດການຫຍໍ້ທໍ້ຕ່າງໆໃນນະຄອນຫລວງວຽງຈັນຄື: ສຸມໃສ່ຈັດສັນການສັນຈອນແອອັດ ແລະ ແກ້ໄຂອຸປະຕິເຫດຕາມທ້ອງຖະໜົນໂດຍລົງກວດກາຕາມເສັ້ນທາງ 290 ຄັ້ງ, ຈັບຄວາມໄວລົດ, ກວດກາທາດເຫລົ້າ, ຈັດສັນລະບຽບຕາມເສັ້ນທາງທີ່ມີລົດຈອດຊະຊາຍ ແລະ ພົບເຫັນຜູ້ລະເມີດກົດລະບຽບຈະລາຈອນຫລາຍກວ່າ 8.810 ຄົນ, ສຶກສາອົບຮົມ 3.890 ຄົນກວ່າ, ກັກທະບຽນລົດ 2.000 ກວ່າໃບ, ກັກລົດຜູ້ລະເມີດ 300 ກວ່າຄັນ, ບໍ່ຖືເອກະສານ 210 ກວ່າຄັນ, ດັດແປງສະພາບເຕັກນິກ 43 ຄັນ, ບໍ່ຕິດປ້າຍທະບຽນ 45 ຄັນ, ໄດ້ສະກັດກັ້ນ ແລະ ແກ້ໄຂກຸ່ມແກ້ງກວນເມືອງໄດ້ 3 ກຸ່ມ, ມີລົດຈັກ 39 ຄັນ, ລົດໃຫຍ່ 2 ຄັນ ໂດຍໄດ້ມີການສຶກສາອົບຮົມ ແລະ ປະຕິບັດຕາມລະບຽບກົດໝາຍ, ພ້ອມນີ້ຍັງໄດ້ລົງໂຄສະນາເຜີຍແຜ່ກົດລະບຽບຈະລາຈອນຕາມໂຮງຮຽນ, ບໍລິສັດ, ສຳນັກງານ-ອົງການໄດ້ 159 ຄັ້ງ, ມີຜູ້ເຂົ້າຮ່ວມຮັບຟັງຫລາຍກວ່າ 7.400 ຄົນ. ນອກນີ້ ຍັງໄດ້ໂຄສະນາຕາມສື່ມວນຊົນຕ່າງໆ. ສໍາລັບອຸປະຕິເຫດບົນທ້ອງຖະໜົນໃນ 6 ເດືອນຕົ້ນປີມີທັງໝົດ 601 ກໍລະນີ ແລະ ມີຜູ້ເສຍຊີວິດ 122 ຄົນ, ໂດຍສາເຫດສ່ວນໃຫຍ່ແມ່ນເກີດຈາກມືນເມົາແລ້ວຂັບລົດ, ຂັບຂີ່ແບບປະໝາດ ແລະ ລະເມີດກົດລະບຽບຈະລາຈອນຕ່າງໆ.
ໃນໂອກາດນີ້, ທ່ານ ແກ້ວພິລາວັນ ອາໄພລາດ ຮອງເຈົ້າຄອງນະຄອນຫລວງວຽງຈັນ, ໄດ້ຜ່ານບົດສະຫລຸບການຈັດສັນຄວາມບໍ່ເປັນລະບຽບຮຽບຮ້ອຍໃນຕົວເມືອງ ແລະ ຊານເມືອງຕາມ, ໂດຍສະເພາະການເກັບກຳຂໍ້ມູນ ແລະ ຈັດສັນຄວາມບໍ່ເປັນລະບຽບຮຽບຮ້ອຍຕາມເສັ້ນທາງຕ່າງ ເປັນຕົ້ນແມ່ນຖະໜົນສຸພານຸວົງໄລຍະທີ 1 (ສະໜາມບິນວັດໄຕ-ສວນເຈົ້າຟ້າງຸ່ມ) ປັດຈຸບັນແມ່ນສາ
ມາດແກ້ໄຂໄດ້ເກືອບທັງໝົດ, ຖະໜົນສຸພານຸວົງໄລຍະທີ 2 (ສະໜາມບິນວັດໄຕ-4 ແຍກສີໄຄ) ໄດ້ແກ້ໄຂສຳເລັດ 100%, ຖະໜົນລ້ານຊ້າງສາມາດແກ້ໄຂໄດ້ໂດຍພື້ນຖານ. ສຳລັບເມືອງໄຊເສດຖາມີ 5 ສາຍທາງຫລັກທີ່ກຳລັງປະຕິບັດ 2 ເສັ້ນຄື: ຖະໜົນທາດຫລວງ (ແຕ່ວົງວຽນທາດຫລວງ-ຂົວທາດຫລວງ) ແລະ ຖະໜົນກຳແພງເມືອງ, ປັດຈຸບັນໄດ້ລົງເກັບກຳ ແລະ ອອກແບບຖະໜົນສຳເລັດແລ້ວ 100%, ເມືອງຈັນທະບູລີມີ 5 ສາຍທາງຫລັກ, ກຳລັງປະຕິບັດ 2 ເສັ້ນຄື: ຖະໜົນລ້ານຊ້າງ ແລະ ຖະໜົນເສດຖາທິລາດໄດ້ລົງເກັບກຳຂໍ້ມູນສຳເລັດ 100%, ເມືອງສີໂຄດຕະບອງມີ 4 ສາຍທາງຫລັກ, ກຳລັງລົງປະຕິບັດ 2 ເສັ້ນຄື: ຖະໜົນສຸພານຸວົງ ແລະ ຖະໜົນ 13 ເໜືອ (ສາມແຍກສີໄຄ-ສາມແຍກໜອງບຶກ) ປັດຈຸບັນໄດ້ລົງເຮັດບົດບັນທຶກກັບເຈົ້າຂອງເທີບສໍາເລັດແລ້ວ 95% ແລະ ໄດ້ຮື້ຖອນແລ້ວ 15%. ນອກນັ້ນ ຄະນະຮັບຜິດຊອບໄດ້ປະສານສົມທົບກັບບັນດາເມືອງລົງຈັດສັນຄວາມບໍ່ເປັນລະບຽບຮຽບຮ້ອຍຢູ່ຕາມຕະຫລາດ, ຮ້ານຄ້າຕາມສາຍທາງຕ່າງໆ, ຈັດສັນສະຖານທີ່ຈອດລົດຂອງຕະຫລາດ, ຈັດສັນບ່ອນຈອດລໍ້ບໍລິການໃຫ້ເປັນລະບຽບ, ຈັດສັນສະຖານທີ່ຖິ້ມຂີ້ເຫຍື້ອຄືນໃໝ່, ກວດກາ ແລະ ແນະນຳເຈົ້າຂອງຕະຫລາດສ້ອມແປງຮົ້ວຄືນໃໝ່, ກວດກາປະຕິບັດການເປີດ-ປິດຕະຫລາດໃຫ້ຖືກໂມງ ແລະ ຄວບຄຸມການຂາຍສິນຄ້າໃຫ້ໄດ້ມາດຕະຖານ.
