ຮພກ ຄັດເລືອກນັກຮຽນປະຈໍາສົກຮຽນ 2018-2019
ໂຮງຮຽນພອນສະຫວັນກິລາ-ກາຍະກຳ ຫລື ຮພກ ກົມກິລາລະດັບສູງ ກະຊວງສຶກສາທິການ ແລະ ກິລາ (ສສກ) ຈະເປີດການສອບເສັງຫລັກສູດ 11 ປະເພດກິລາ ເພື່ອຮັບສະໝັກເອົານັກຮຽນ ພາຍໃນ 9 ຕົວເມືອງທົ່ວນະຄອນຫລວງວຽງຈັນ ໃນຈຳນວນ 57 ໂກຕ້າ ກຽມຮອງຮັບເປີດສົກຮຽນ 2018-2019.
ທ່ານ ສູນທອນ ຄຳສານ ຫົວໜ້າໜ່ວຍງານວິຊາການ ຮພກ ໃຫ້ສຳພາດວ່າ: ເພື່ອເປັນການສືບຕໍ່ຈັດຕັ້ງປະຕິບັດຄັດເລືອກນັກຮຽນຍາດເອົາທຶນການສຶກສາ ທີ່ກະຊວງສຶກສາທິການ ແລະ ກິລາ ມອບໃຫ້ ຈຳນວນ 60 ທຶນ ປະຈໍາສົກຮຽນ 2018-2019. ດັ່ງນັ້ນ, ຮພກ ຈຶ່ງໄດ້ວາງແຜນການຄັດເລືອກນັກກິລາອອກເປັນ 2 ຄັ້ງທີ່ໂຮງຮຽນພອນສະຫວັນກິລາ-ກາຍະກຳ ບ້ານສີເກີດ ເມືອງນາຊາຍທອງ ນະຄອນຫລວງວຽງຈັນຄື: ຄັ້ງທີ 1 ລະຫວ່າງວັນທີ 19-20 ມິຖຸນານີ້ ຈະຈັດພາຍໃນ 9 ຕົວເມືອງທົ່ວນະຄອນຫລວງວຽງຈັນ ບໍ່ຈຳກັດຕົວນັກກິລາທຸກໆສະຫະພັນກິລາແຫ່ງຊາດ, ກະຊວງ, ເມືອງ, ສະໂມສອນ ແລະ ປະຊາຊົນ ຕະຫລອດພໍ່-ແມ່ຜູ້ປົກຄອງນັກກິລາສາມາດສົ່ງລູກຫລານເຂົ້າຮ່ວມສອບເສັງໄດ້. ສ່ວນການຄັດເລືອກຄັ້ງສຸດທ້າຍຈະຈັດຂຶ້ນໃນວັນທີ 1-15 ກໍລະກົດ 2018 ເພື່ອຍາດເອົາໂກຕ້າຕົວຈິງບັນຈຸເຂົ້າຮຽນໃນສົກຮຽນໃໝ່ຈຳນວນ 60 ທຶນທົ່ວປະເທດ.
ສໍາລັບການຄັດເລືອກນັກຮຽນດີເດັ່ນໃນຄັ້ງນີ ຈະມີການກວດສະມັດຖະພາບຮ່າງກາຍ ແລະ ລວງສູງຂອງນັກກິລາແຕ່ລະຄົນ ເພື່ອໃຫ້ແທດເໝາະຖືກກັບມາດຖານ ແລະ ເງື່ອນໄຂຕົວຈິງ ໃນຈຳນວນ 11 ປະເພດກິລາ ປະກອບມີ: ມວຍສາກົນ, ມວຍປໍ້າ, ວູຊູ, ກາຣາເຕໂດ, ເທຄວັນໂດ, ຢູໂດ, ຍິງທະນູ, ແລ່ນ-ລານ, ຍົກນໍ້າໜັກ, ປິ່ງປ່ອງ ແລະ ເປຕັງ.
