ນ້ຳຖ້ວມລັດມອນຫລັງຝົນຕົກໜັກ
ເກີດນ້ຳຖ້ວມກະທັນຫັນໃນຫລາຍພື້ນທີ່ຂອງລັດມອນ ທາງຕອນໃຕ້ຂອງມຽນມາ ຫລັງຝົນຕົກໜັກໃນທ້າຍອາທິດຜ່ານມາ ໂດຍບໍ່ມີທ່າທີວ່າຈະຫລຸດລົງ ສົ່ງຜົນໃຫ້ເກີດດິນເຈື່ອນທີ່ເຈດີໄຈ໊ຕະຫລັ່ນ ເຈດີດັງຂອງເມືອງມະລະແໝ່ງ ເມືອງເອກຂອງລັດ.
ໜັງສືພິມໂກລບອລນິວໄລອອຟມຽນມາ ລາຍງານໃນວັນທີ 18 ມິຖຸນາວ່າ: ທາງການໄດ້ອົບພະຍົບປະຊາຊົນ 150 ຄົນ ທາງຕອນໃຕ້ຂອງເມືອງມະລະແໝ່ງ ໄປອາໄສຊົ່ວຄາວຢູ່ໂຮງຮຽນຂອງລັດ ເນື່ອງຈາກເຮືອນ ແລະ ຂົວຖືກນ້ຳຖ້ວມ, ວັດແຫ່ງໜຶ່ງທີ່ຢູ່ອີກຝັ່ງແມ່ນ້ຳຖືກກະແສນ້ຳພັດເສຍຫາຍ ຈົນຮອດປັດຈຸບັນນີ້ຍັງບໍ່ມີລາຍງານຜູ້ເສຍຊີວິດ. ຂະນະທີ່ຝົນຍັງຕົກໜັກທົ່ວປະເທດ.
ມຽນມາ ແລະ ຫລາຍປະເທດໃນພາກພື້ນນີ້ປະສົບອຸທົກກະໄພເປັນປະຈຳທຸກປີ ໂດຍສະເພາະປີ 2017 ໄດ້ຮັບການຈັດອັນດັບວ່າເປັນປະເທດທີ່ໄດ້ຮັບຄວາມເສຍຫາຍຈາກສະພາບອາກາດຮຸນແຮງທີ່ສຸດໃນໂລກ ມີຜູ້ເສຍຊີວິດຍ້ອນນ້ຳຖ້ວມກວ່າ 100 ຄົນ, ບໍ່ມີບ່ອນຢູ່ອາໄສເປັນແສນຄົນ. ສ່ວນປີ 2008 ໄຊໂຄນນາກິດຖະຫລົ່ມພື້ນທີ່ຕາມແຄມຝັ່ງ ມີຜູ້ເສຍຊີວິດໃນມຽນມາສູງເຖິງ 138.000 ຄົນ.
