ລ໋ອບສະເຕດ້ຽມ ອຸ່ນເຄື່ອງເສຍ ວຽງຈັນ ຢູໄນເຕັດ
ທີມລ໋ອບເຕສະດ້ຽມ ລົງສະໜາມອຸ່ນເຄື່ອງເສຍໃຫ້ ທີມວຽງຈັນ ຢູໄນເຕັດ 6-1 ໃນວັນທີ 14 ມິຖຸນານີ້ ເພື່ອກຽມຄວາມພ້ອມເຂົ້າຮ່ວມການແຂ່ງຂັນບານເຕະດີວີຊັນ 1 ຫລື ສາຍ ກ ທີ່ສະຫະພັນບານເຕະຈະຈັດຂຶ້ນໃນຕົ້ນເດືອນໜ້າ.
ທ່ານ ອາລ໋ອບ ມະນີບົດ ປະທານທີມລ໋ອບສະເຕດ້ຽມ ໃຫ້ສໍາພາດຫລັງການແຂ່ງຂັນວ່າ: ນີ້ເປັນການຝຶກຊ້ອມນັກກິລາຂອງທີມຕົນເອງໃຫ້ມີຄວາມພ້ອມຢູ່ສະເໝີ ເຊິ່ງຜ່ານການແຂ່ງຂັນເຫັນວ່າລູກທີມຂອງຕົນຍັງຫລິ້ນບໍ່ທັນເຂົ້າກັນປານໃດ ເນື່ອງຈາກເປັນທີມທີ່ຕັ້ງຂຶ້ນໃໝ່, ສ່ວນນັກກິລາກໍໄດ້ຄັດເລືອກມາຈາກທົ່ວນະຄອນຫລວງວຽງຈັນ ໂດຍສ່ວນຫລາຍຍັງບໍ່ທັນມີປະສົບການ. ຂະນະທີ່ ການກະກຽມທີມມີພຽງແຕ່ 1 ເດືອນກວ່າເທົ່ານັ້ນ. ແນວໃດກໍຕາມ ພວກເຮົາຈະພະຍາຍາມສ້າງນັກກິລາຂອງຕົນໃຫ້ມີຄວາມເຂັ້ມແຂງດ້ານພະລະກໍາລັງ ເພື່ອກຽມຄວາມພ້ອມເຂົ້າຮ່ວມແຂ່ງຂັນບານເຕະດີວີຊັນ 1 ທີ່ຈະເປີດຂຶ້ນໃນມໍ່ໆນີ້ ພ້ອມທັງຕັ້ງຄວາມຫວັງຕິດ 1 ໃນ 3 ໃຫ້ໄດ້.
ການແຂ່ງຂັນເຕະບານ ສາຍ ກ ຫລື ດີວີຊັນ 1 ມີ 16 ທີມເຂົ້າຮ່ວມຄື: ກອງທັບ ເອັຟຊີ (ແຊ້ມເກົ່າ), ນະຄອນຫລວງ ຢູໄນເຕັດ (ອັນດັບ 3), ວິທະຍາໄລ ລາວ-ທ໋ອບ, ໂຮງຮຽນ ບຸນເກີດສຶກສາ ເອັຟຊີ, ຄີພີເອັສ ເອັຟຊີ, ເອສະຣາ ເອັຟຊີ, ແບລາວ ອະຄາເດມີ, ເມືອງຫາດ ຢູໄນເຕັດ, ລ໋ອບສະເຕດ້ຽມ, ທຣີນີຕີ ເອັຟຊີ, ປກສ ເອັຟຊີ, ດີເຄ ເອັຟຊີ, ອີໂວ້ ຢູໄນເຕັດ, ຊ້າງນ້ອຍ ເອັຟຊີ, ສະຫວັນ ຢູໄນເຕັດ ແລະ ແຂວງວຽງຈັນ.
