ທ່ຽວຊົມຖ້ຳຈອມອອງ
ຖ້ຳຈອມອອງ ມີສາຍນ້ຳໄຫລຜ່ານ, ມີນົມຜາ ແລະ ຫີນຍ້ອຍ-ຫີນງອກ ທີ່ມີລວດລາຍສວຍງາມພ້ອມທັງຫີນແກ້ວເປັນສີຂາວເຫລື້ອມຄືກັບເພັດພອຍເປັນກ້ອນໃຫຍ່ໆ ຫ້ອຍປະດັບປະດາຢູ່ຕາມຝາຫີນປຽບດັ່ງດອກໄຟສະຫວ່າງສະໄຫວຢ່າງສວຍສົດງົດງາມ. ຖ້ຳດັ່ງກ່າວຕັ້ງຢູ່ບ້ານຈອມອອງ ເມືອງໄຊ, ແຂວງ ອຸດົມໄຊ ຫ່າງຈາກເທສະບານເມືອງໄຊໄປປະມານ45 ກິໂລແມັດ, ເປັນຖ້ຳໃຫຍ່ ມີຫລາຍຮູເຂົ້າ-ອອກ, ຍາວປະມານ 16 ກິໂລແມັດ,
ກວ້າງ 15-50 ແມັດ ແລະ ສູງປະມານ 25 – 100 ແມັດ, ແລະ ເປັນຖ້ຳທີ່ສວຍງາມທີ່ສຸດຂອງ ແຂວງປະກອບໄປດ້ວຍສີສັນຕ່າງໆແບບທຳມະຊາດເປັນໜ້າອັດສະຈັນໃຈ. ຊື່ຖ້ຳຈອມອອງ ແມ່ນເອີ້ນຕາມຊື່ບ້ານ, ແຕ່ປະຊາຊົນແຕ່ກີ້ເຄີຍເອີ້ນຖ້ຳນີ້ວ່າຖ້ຳເຈຍ ຫລື ຖ້ຳຂີ້ເຈຍຍ້ອນແຕ່ກ່ອນມີໂຕເຈຍມາອາໄສຢູ່ເປັນຈຳນວນຫລາຍ ຈົນໄທບ້ານພາກັນເອົາຂີ້ໂຕເຈຍໄປເຮັດໝື້ປືນແກັບ.
ຖ້ຳຈອມອອງຖືກຄົ້ນພົບໃນປີ ຄສ 2005 ແລະ ເປີດໃຫ້ບໍລິການໃນປີ 2007. ຜ່ານການສຳຫລວດຂອງນັກວິທະຍາສາດ ຈາກສະຫະພາບເອີຣົບໃນປີ 2010 ຖ້ຳດັ່ງກ່າວກໍໄດ້ພັດທະນາໃຫ້ເປັນແຫລ່ງທ່ອງທ່ຽວລະດັບຊາດ. ປັດຈຸບັນ, ໄດ້ມີການເອົາໄຟຟ້າພະລັງງານແສງຕະເວັນເຂົ້າເຍືອງທາງໃຫ້ຮຸ່ງແລ້ວປະມານ 500 ແມັດແຕ່ຢູ່ພາຍໃນຖ້ຳກໍຍັງຖືກປົກປັກຮັກສາໄວ້ບໍ່ໄດ້ມີການດັດແປງແຕ່ຢ່າງໃດ. ຖ້ຳຈອມອອງເປີດໃຫ້ທ່ານທ່ຽວຊົມທຸກມື້ເວລາ 8:00-16:00 ໂມງ.
