ນະຄອນຫລວງວຽງຈັນກຽມຄວາມພ້ອມຮັບມືບັນຫານ້ຳຖ້ວມໃນລະດູຝົນ
ທ່ານ ນາງ ວິໄລວອນ ຈັນທະລາຕີ ຫົວໜ້າຫ້ອງການຄຸ້ມຄອງ ແລະ ບໍລິຫານຕົວເມືອງວຽງຈັນ(ຄບຕ) ໃຫ້ຮູ້ວ່າ: ເພື່ອແກ້ໄຂບັນຫານ້ຳຖ້ວມ ແລະ ນ້ຳອັ່ງຂັງໃນລະດູຝົນຢູ່ໃນຕົວເມືອງ ຂະແຫນງການກ່ຽວຂ້ອງໄດ້ປະຕິບັດການລວງຄອງລະບາຍນ້ຳເປື້ອນ ເຂດຮ່ອງຂົວຂາວ ເສັ້ນທາງຄູວຽງ ເມືອງສີສັດຕະນາກ ແຕ່ວົງວຽງວິທະຍາໄລຄອມເຊັນເຕີໄປຫາສາມແຍກຫຼັກ 3 ຖະໜົນທ່າເດື່ອ ມີຄວາມຍາວ 2.100 ແມັດ ແລະ ຮ່ອງນໍ້າແຄມຖະໜົນສຸພານຸວົງ ເມືອງສີໂຄດຕະບອງ ແຕ່ສາມແຍກສະໜາມບິນສາກົນວັດໄຕຫາ 4 ແຍກໄຟແດງວັດອິນແປງ ມີຄວາມຍາວ 1.200 ແມັດ, ຊຶ່ງໄດ້ເລີ່ມຈັດຕັ້ງປະຕິບັດມາແຕ່ຕົ້ນເດືອນ ແລະ ຈະໃຫ້ສຳເລັດພາຍໃນທ້າຍເດືອນມິຖຸນານີ້, ໂດຍນຳໃຊ້ແຮງງານຄົນ ແລະ ກົນຈັກເພື່ອເຮັດອະນາໄມຈົກດິນຕົມ, ຖາງຫຍ້າ, ເອົາຜັກຕົບ ແລະ ສິ່ງເສດເຫຼືອຕ່າງໆອອກຈາກຄອງລະບາຍນ້ຳ, ເພື່ອເຮັດໃຫ້ນ້ຳໄຫຼສະດວກ ສະນັ້ນ ຈຶ່ງຂໍອະໄພຕໍ່ຄວາມບໍ່ສະດວກຂອງການສັນຈອນໄປມາຂອງປະຊາຊົນທີ່ນຳໃຊ້ເສັ້ນທາງເຂດດັ່ງກ່າວ ແລະ ພາຍຫຼັງສຳເລັດຢູ່ສອງຈຸດນີ້ ຄບຕ ໄດ້ມີແຜນສືບຕໍ່ອະນາໄມເຂດຮ່ອງລະບາຍນ້ຳເຂດບ້ານໂພນພະເນົາ ແລະ ຮ່ອງລະບາຍນ້ຳບ້ານວັດໄຕ ທີ່ເຫັນວ່າມີຄວາມສ່ຽງຮ່ອງນ້ຳຖືກອຸດຕັນ.
ຂ່າວໃຫ້ຮູ້ຕື່ມວ່າ: ເມື່ອບໍ່ດົນມານີ້, ທ່ານເຈົ້າຄອງນະຄອນຫຼວງວຽງຈັນ ໄດ້ລົງກວດກາຈຸດຕ່າງໆທີ່ເກີດນ້ຳຖ້ວມຂັງຄື: ຢູ່ເຂດບ້ານໂພນພະເນົາ, ເມືອງໄຊເສດຖາ, ເຂດບ້ານໂພນສະຫວ່າງ ເມືອງຈັນທະບູລີ, ຮ່ອງລະບາຍນ້ຳ ເຂດຫໍປະຊຸມແຫ່ງຊາດ ແລະ ເຂດບ້ານພະຂາວ ເມືອງໄຊທານີ, ໂດຍສາເຫດສ່ວນໃຫຍ່ ແມ່ນຍ້ອນມີການຖົມດິນແບບຊະຊາຍ, ມີການປຸກສ້າງບໍ່ຖືກລະບຽບ ແລະ ບໍ່ມີການອະນາໄມ ລ່ວງຮ່ອງລະບາຍນ້ຳຢ່າງສະໝ່ຳສະເໝີ, ເມື່ອມີຝົນຕົກແຮງຫຼາຍຊົ່ວໂມງ ຈຶ່ງເກີດມີນ້ຳຖ້ວມຂັງ ຍ້ອນລະບາຍບໍ່ທັນ, ສົ່ງຜົນກະທົບຕໍ່ການດຳລົງຊີວິດ ແລະ ຊັບສິນຂອງປະຊາຊົນ, ຊຶ່ງທ່ານເຈົ້າຄອງນະຄອນຫຼວງວຽງຈັນ ກໍໄດ້ແນະນຳໃຫ້ພາກສ່ວນກ່ຽວຂ້ອງ ຂື້ນແຜນແກ້ໄຂຢ່າງຮີບດ່ວນ, ພ້ອມທັງໄດ້ເນັ້ນໃຫ້ບັນດາເມືອງ ແລະ ບ້ານ ທີ່ໄດ້ຮັບຜົນກະທົບ ເປັນເຈົ້າການລະດົມທືນ ຈາກບັນດາຜູ້ປະກອບການ ທີ່ຢູ່ໃນເຂດຄຸ້ມຄອງຂອງຕົນ ເພື່ອໃຊ້ຈ່າຍໃນການແກ້ໄຂດັ່ງກ່າວ, ພ້ອມທັງເນັ້ນໃຫ້ພາກສ່ວນກ່ຽວຂ້ອງ ຂື້ນແຜນແກ້ໄຂໃນໄລຍະຍາວ ເພື່ອບໍ່ໃຫ້ມີນ້ຳຖ້ວມຂັງ ໃນນະຄອນຫຼວງວຽງຈັນອີກ, ສ່ວນຜູ້ລະເມີດທີ່ມີການຖົມດິນ ແລະ ປຸກສ້າງແບບບໍ່ຖືກລະບຽບ ອັນເປັນ ສາເຫດໃຫ້ເກີດນ້ຳຖ້ວມຂັງ ແມ່ນໃຫ້ດຳເນີນຕາມມາດຕະການຂອງລະບຽບກົດໝາຍຢ່າງເຂັ້ມງວດ.
