ເປຕັງຊີງຂັນນາຍົກຄັ້ງທີ 10 ກຽມຈັດຕົ້ນເດືອນກໍລະກົດນີ້

ການແຂ່ງຂັນກິລາເປຕັງທົ່ວປະເທດ ຄັ້ງທີ 10 ຊີງຂັນທ່ານນາຍົກລັດຖະມົນຕີ ແຫ່ງ ສປປ ລາວ ຈັດຂຶ້ນທີ່ແຂວງຊຽງຂວາງ ໃນລະຫວ່າງວັນທີ 1-5 ກໍລະກົດ 2018 ເພື່ອເປັນການກະກຽມຄວາມພ້ອມຄະນະຮັບຜິດຊອບຈັດການແຂ່ງຂັນ, ທົດສອບການກຽມຄວາມພ້ອມຂອງຄະນະຄູເຝິກ ແລະ ນັກກິລາແຕ່ລະກະຊວງ, 17 ແຂວງ ແລະ 1 ນະຄອນຫລວງວຽງຈັນ.

ທ່ານ ບຸນຕົ້ນ ຈັນທະພອນ ເຈົ້າແຂວງຊຽງຂວາງ ໃຫ້ສໍາພາດວ່າ: ປັດຈຸບັນແຂວງໄດ້ມີຄວາມພ້ອມເກືອບສົມບູນແລ້ວ ແລະ ຍິນດີຕ້ອນຮັບຄະນະນຳ, ຄູເຝິກ ແລະ ນັກກິລາທົ່ວປະເທດເຂົ້າຮ່ວມແຂ່ງຂັນ ໂດຍຈະມີນັກກິລາຈາກ 17 ແຂວງ, 1 ນະຄອນຫລວງວຽງຈັນ, 6 ກະຊວງ ແລະ 5 ອົງການທຽບເທົາເຂົ້າຮ່ວມ ເຊິ່ງຈະມີການຊີງໄຊທັງໝົດ 10 ລາຍການ ປະກອບມີ: ປະເພດດ່ຽວຍິງ-ຊາຍ, ຊຸດຕິງຍິງ-ຊາຍ, ທີມຄູ່ຍິງ-ຊາຍ, ທີມຊຸດຍິງ-ຊາຍ, ທີມຄູ່ປະສົມ ແລະ ທີມຄູ່ຊາຍອາວຸໂສ ຮຸ່ນອາຍຸ 50 ປີຂຶ້ນໄປ.

ສ່ວນລາງວັນຊະນະເລີດໃນການແຂ່ງຂັນລາຍການດັ່ງກ່າວ ປະເພດດ່ຽວຍິງ-ຊາຍ, ທີມຄູ່ຊາຍອາວຸໂສ ແລະ ຊຸດຕິງຍິງ-ຊາຍ ທີ 1 ຈະໄດ້ຮັບຫລຽນຄໍາ ຂັນແຊ້ມ ແລະ ເງິນສົດ 2,5 ລ້ານກີບ, ທີ 2 ຈະໄດ້ຮັບຫລຽນເງິນ ແລະ ເງິນສົດ 1,5 ລ້ານກີບ ແລະ ທີ 3 ຈະໄດ້ຮັບຫລຽນທອງ ແລະ ເງິນສົດ 5 ແສນກີບ. ນອກຈາກນັ້ນ ປະເພດທີມຄູ່ຍິງ-ຊາຍ ແລະ ທີມຄູ່ປະສົມ ທີ 1 ຈະໄດ້ຮັບຫລຽນຄຳ, ຂັນແຊ້ມ ແລະ ເງິນສົດ 3 ລ້ານກີບ, ທີ 2 ຈະໄດ້ຮັບຫລຽນເງິນ ແລະ ເງິນສົດ 2 ລ້ານກີບ ແລະ ທີ 3 ຈະໄດ້ຮັບຫລຽນທອງ ແລະ ເງິນສົດ 1 ລ້ານກີບ, ປະເພດທີມຊຸດຍິງ-ຊາຍ ທີ 1 ຈະໄດ້ຮັບຫລຽນຄຳ, ຂັນແຊ້ມ ແລະ ເງິນສົດ 4 ລ້ານກີບ, ທີ 2 ຈະໄດ້ຮັບຫລຽນເງິນ ແລະ ເງິນສົດ 3 ລ້ານກີບ ແລະ ທີ 3 ຈະໄດ້ຮັບຫລຽນທອງ ແລະ ເງິນສົດ 1 ລ້ານກີບ.