ເຈົ້າໜ້າທີ່ເລັ່ງແກ້ໄຂໜໍ່ແໜງຄວາມບໍ່ສະຫງົບໃນສັງຄົມໃຫ້ໝົດໄປ

ທ່ານພັນ​ໂທ ສູນທອນ ສະຫວ່າງວົງ ຮອງຫົວໜ້າຫ້ອງການກອງພັນປ້ອງ​ກັນ​ເຄື່ອນ​ທີ່ (ປທ) ໃຫ້ຮູ້ວ່າ: ໂດຍປະຕິບັດຕາມຄໍາສັ່ງເລກທີ 27/ນຍ ຂອງນາຍົກລັດຖະມົນຕີວ່າດ້ວຍການແກ້ໄຂປະກົດການຫຍໍ້ທໍ້ ແລະ ຄໍາສັ່ງເລກທີ 829/ປກສ ຂອງລັດຖະມົນຕີກະຊວງປ້ອງກັນຄວາມສະຫງົບວ່າດ້ວຍການສະກັດກັ້ນ, ແກ້ໄຂກຸ່ມແກ້ງຂີ່ລົດກວນເມືອງ, ນັກເລງອັນຕະພານ, ແລ່ນລົດໄວ ແລະ ດັດແປງສະພາບເຕັກນິກ. ດັ່ງນັ້ນ, ຈຶ່ງໄດ້ຈັດກໍາລັງວິຊາສະພາະລົງສົມທົບກັບພາກສ່ວນກ່ຽວຂ້ອງເພື່ອອອກກວດກາລາດຕະເວນຕົວຈິງແຕ່ວັນທີ 19 ພຶດສະພາຫາວັນທີ 2 ມິຖຸນາຜ່ານມາ ໄດ້ພົບເຫັນຊາວໜຸ່ມ-ໄວລຸ້ນຈໍານວນໜຶ່ງຂີ່ລົດເປັນກຸ່ມກວນເມືອງໃນໄລຍະເວລາ 18:00 ໂມງຢູ່ຕາມເສັ້ນທາງເລກທີ 11 ແລະ ເວລາ 1:00-4:00 ໂມງເຊົ້າໃນເສັ້ນທາງເຈົ້າຟ້າງຸ່ມຫາເສັ້ນທາງລ້ານຊ້າງ, ໂດຍສະເພາະແມ່ນຢູ່ບໍລິເວນເສັ້ນທາງແຄມຂອງແຕ່ 3 ແຍກປາກປ່າສັກ ໄປຫາຫໍຄໍາແລ້ວລັດຂຶ້ນໄປຫາບໍລິເວນຕະຫລາດເຊົ້າ ແລະ ປະຕູໄຊ ແລະ ສາມາດກັກຕົວກຸ່ມແກ້ງດັ່ງກ່າວໄດ້ຈໍານວນ 133 ຄົນ (ຍິງ 37 ຄົນ) ພ້ອມລົດຈັກ 93 ຄັນ, ໂດຍເຈົ້າໜ້າທີ່ໄດ້ນໍາຕົວມາຂຶ້ນບັນຊີໄວ້ ແລະ ສຶກສາອົບຮົມກ່າວເຕືອນ ພ້ອມເຮັດບົດບັນທຶກໄວ້ ແລະ ປັບໃໝຕາມລະບຽບການ ເພື່ອບໍ່ໃຫ້ພວກເຂົາກັບມາເຮັດອີກ ກ່ອນມອບໃຫ້ຜູ້ປົກຄອງໄປສຶກສາອົບຮົມຕໍ່. ສ່ວນລົດຈັກທີ່ຢຶດມາໄດ້ເຈົ້າໜ້າທີ່ແກ້ໄຂແລ້ວຈໍານວນໜຶ່ງ, ໃນນີ້ລົດຂອງກຸ່ມແກ້ງກວນເມືອງມີ 26 ຄັນ, ດັດແປງສະພາບເຕັກນິກ 19 ຄັນ ແລະ ຍັງບໍ່ມີຜູ້ມາຕິດຕໍ່ພົວພັນເອົາ 37 ຄັນ.