ຣີລ ມາດຣິດ ທຸ້ມ 307 ລ້ານປອນ ຊື້ ເນມາ ຮ່ວມທີມແທນ ໂຣນັລໂດ
ເນມາ ກອງໜ້າທີມຊາດບຣາຊິລ ມີຄວາມເປັນໄປໄດ້ສູງທີ່ຈະຍ້າຍມາຮ່ວມກັບ ຣີລ ມາດຣິດ ເມື່ອສື່ຕ່າງປະເທດລາຍງານວ່າ: ຣີລ ມາດຣິດ ພ້ອມທຸ້ມເງິນ 307 ລ້ານປອນ ເພື່ອດຶງ ເນມາ ມາຮ່ວມທີມໃຫ້ໄດ້ ເພື່ອມາແທນ ຄຣິສເຕຍໂນ ໂຣນັລໂດ ຖ້າວ່າລາວຍ້າຍອອກຈາກທີມ.
ມີຂ່າວລືວ່າ: ປາຣີສ ແຊງແຊກແມງ ທີມໃນລີກເອິງ ຝຣັ່ງ ກຳນົດເງື່ອນໄຂວ່າ ເນມາ ສາມາດຍ້າຍອອກຈາກທີມໄດ້ໃນລາຄາ 300 ລ້ານເອີໂຣ ໃນວັນທີ 1 ກັນຍາ 2018 ເຊິ່ງເປັນ 1 ວັນຫລັງຕະຫລາດຊື້ຂາຍນັກເຕະຈະປິດລົງ ເຊິ່ງຈະເຮັດໃຫ້ຂໍ້ຜູກມັດໃຫ້ ເນມາ ບໍ່ສາມາດຍ້າຍທີມໄດ້ຈົນກະທັ້ງເປີດອີກຄັ້ງໃນປີ 2019.
ເຖິງຢ່າງໃດກໍຕາມ, ຣີລ ມາດຣິດ ກຽມເດີນໜ້າເພື່ອຄວ້າ ເນມາ ມາຮ່ວມທີມ ແລະ ພ້ອມທຸ້ມເງິນ 307 ລ້ານປອນ ເພື່ອຫວັງໄດ້ມາຮ່ວມທີມ. ເຖິງຢ່າງໃດກໍຕາມ, ບັນຫາດຽວຂອງ ຣີລ ມາດຣິດ ຄືຄ່າເມື່ອຍຈະສູງເຖິງ 44 ລ້ານປອນຕໍ່ໄປ ແຕ່ອາດເປັນບັນຫານ້ອຍສຳລັບ ຣີລ ມາດຣິດ ທີ່ເປັນສະໂມສອນໃຫຍ່ອັນດັບຕົ້ນໆຂອງໂລກ.
ສະຖານະການຂອງ ຄຣິສເຕຍໂນ ໂຣນັລໂດ ກັບ ຣີລ ມາດຣິດ ບໍ່ດີເລີຍ ຫລັງ ໂຣນັລໂດ ອອກມາຮຽກຮ້ອງໃຫ້ ຟລໍເຣນຕິໂນ ເປເຣຊ ປະທານສະໂມສອນປະຕິບັດຕາມຄຳສັນຍາຫລາຍຄັ້ງວ່າ ຈະຂຶ້ນຄ່າເມື່ອຍໃຫ້ ໂດຍມີຕົວເລກລະຫວ່າງ 75-80 ລ້ານເອີໂຣຕໍ່ປີ ເຊິ່ງ ເປເຣຊ ກຳລັງພິຈາລະນາຂຶ້ນຄ່າຈ້າງໃຫ້ ໂຣນັລໂດ ເຊັ່ນດຽວກັນ, ແຕ່ຕົວເລກບໍ່ເກີນ 40 ລ້ານເອີໂຣ.
ຫລ້າສຸດຕາມການລາຍງານຂອງສື່ໃນສະເປນວ່າ: ຖ້າ ໂຣນັລໂດ ບໍ່ຍອມຮັບຂໍ້ສະເໜີດັ່ງກ່າວ ຣີລ ມາດຣິດ ກໍພ້ອມປ່ອຍອອກຈາກທີມ ພ້ອມຕັ້ງຄ່າຈີກສັນຍາຢ່າງມະຫາສານມູນຄ່າ 1 ຕື້ເອີໂຣ ເນື່ອງຈາກນັກເຕະຍັງມີສັນຍາຈົນຮອດປີ 2021 ເຊິ່ງນີ້ອາດເຮັດໃຫ້ເປັນບັນຫາສຳລັບ ໂຣນັລໂດ ທີ່ຕ້ອງການອອກຈາກທີມ ແຕ່ຕ້ອງຫາທີມທີ່ຍອມທຸ້ມເງິນຢ່າງມະຫາສານ.
ຕາມການວິເຄາະຂອງສື່ຕ່າງປະເທດບອກວ່າ: ມີພຽງ 5 ທີມຍັກໃຫຍ່ຂອງໂລກທີ່ສາມາດຕອບສະໜອງຄວາມຕ້ອງການຂອງ ໂຣນັລໂດ ຄື ແມນເຊັສເຕີ ຊິຕີ້ ກັບ ແມນເຊັສເຕີ ຢູໄນເຕັດ 2 ທີມໃນພຣີເມຍລີກ, ປາຣີສ ແຊງແຊກແມງ ທີມຊັ້ນນຳຂອງຝຣັ່ງ, ບາເຢິນ ມິວນິກ ທີມໃນເຢຍລະມັນ ແລະ ຢູເວນຕຸສ ທີມໃນອີຕາລີ ພາຍຫລັງວິເຄາະດ້ານກົດການໃຊ້ເງິນໃນນາມສະໂມສອນ.
