ເລັ່ງສ້າງລັດແຫ່ງກົດໝາຍຢ່າງແທ້ຈິງ
ທ່ານ ໄຊສີ ສັນຕິວົງ ລັດຖະມົນຕີກະຊວງຍຸຕິທຳ ໄດ້ລາຍງານຕໍ່ກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດຊຸດທີ VIII ໃນວັນທີ 7 ມີຖຸນາ ນີ້ວ່າ: ນັບແຕ່ໄດ້ມີແນວທາງປ່ຽນແປງໃໝ່ຢ່າງຮອບດ້ານທີ່ມີຫລັກການຂອງພັກມານີ້, ລັດເຮົາໄດ້ຫັນແນວທາງດັ່ງກ່າວເປັນກົດໝາຍ ແລະ ນິຕິກຳລຸ່ມກົດໝາຍເພື່ອເປັນເຄື່ອງມືໃນການຄຸ້ມຄອງລັດ-ຄຸ້ມຄອງສັງຄົມ. ໂດຍສະເພາະພາຍຫລັງ ສປປ ລາວ ໄດ້ປະກາດໃຊ້ລັດຖະທຳມະນູນສະບັບທຳອິດໃນວັນທີ 15 ສິງຫາ 1991, ລັດຖະບານໄດ້ເອົາໃຈໃສ່ພັດທະນາກົດໝາຍໃຫ້ເປັນລະບົບຄົບຊຸດເທື່ອລະກ້າວ ແລະ ມາຮອດປັດຈຸບັນ, ໄດ້ປະກາດໃຊ້ກົດໝາຍທັງໝົດ 132 ສະບັບ ແລະ ນິຕິກຳໃນຂົງເຂດເສດຖະກິດ, ວັດທະນະທຳ-ສັງຄົມ, ຂົງເຂດປົກຄອງ ແລະ ຍຸຕິທຳ ເປັນຈຳນວນຫລວງຫລາຍ, ກາຍເປັນເຄື່ອງມືຄຸ້ມຄອງລັດ-ຄຸ້ມຄອງສັງຄົມ, ປົກປ້ອງສິດ ແລະ ຜົນປະໂຫຍດອັນຊອບທຳຂອງປະຊາຊົນບັນດາເຜົ່າ, ສ້າງຄວາມໜັ້ນຄົງໃຫ້ແກ່ລະບອບປະຊາທິປະໄຕປະຊາຊົນ, ຮັບປະກັນນໍາພາປະເທດຊາດໄປສູ່ຈຸດໝາຍສັງຄົມນິຍົມເທື່ອລະກ້າວຢ່າງໜັກແໜ້ນ.
ທ່ານລັດຖະມົນຕີກະຊວງດັ່ງກ່າວ ໃຫ້ຮູ້ວ່າ: ມາຮອດທ້າຍປີ 2016 ເຫັນວ່າຍັງມີ 278 ມາດຕາໃນ 77 ກົດໝາຍ ທີ່ສະພາແຫ່ງຊາດຮັບຮອງ ແລະ ປະກາດໃຊ້ແລ້ວນັ້ນ, ຊຶ່ງນອນຢູ່ໃນຄວາມຮັບຜິດຊອບຂອງທຸກພາກສ່ວນໃນລະບົບການເມືອງທີ່ຈະຕ້ອງຜັນຂະຫຍາຍເປັນນິຕິກຳໃຕ້ກົດໝາຍຢູ່ໃນຂະແໜງການຂອງຕົນ. ກອງປະຊຸມສະໄໝສາມັນຊຸດທີ 2 ຂອງສະພາແຫ່ງຊາດຊຸດທີ VIII ຈຶ່ງມີມະຕິສະບັບເລກທີ 018/ສພຊ, ລົງວັນທີ 28 ພະຈິກ 2016 ວ່າດ້ວຍ ການຮັບຮອງເອົາການຕິດຕາມກວດກາກ່ຽວກັບການອອກນິຕິກຳລຸ່ມກົດໝາຍ ແລະ ຜົນກະທົບການນຳໃຊ້ເຄມີອັນຕະລາຍເກີນຄ່າມາດຕະຖານຕໍ່ສິ່ງແວດລ້ອມ, ສັງຄົມ ແລະ ທຳມະຊາດ. ມະຕິດັ່ງກ່າວ, ໄດ້ຕີລາຄາຄວາມພະຍາຍາມຂອງລັດຖະບານທີ່ໄດ້ເອົາໃຈໃສ່ຄົ້ນຄວ້າອອກນິຕິກຳໃຕ້ກົດໝາຍເຂົ້າສູ່ຊີວິດຕົວຈິງໃນຂົງເຂດການປົກຄອງ ແລະ ຍຸຕິທຳ, ປ້ອງກັນຊາດ-ປ້ອງກັນຄວາມສະຫງົບ, ເສດຖະກິດ-ວັດທະນະທຳສັງຄົມໄດ້ 243 ມາດຕາໃນຈຳນວນ 515 ມາດຕາຂອງກົດໝາຍ. ມະຕິຄຳສັ່ງສະພາແຫ່ງຊາດໄດ້ມອບໃຫ້ລັດຖະບານ ແລະ ພາກສ່ວນທີ່ກ່ຽວຂ້ອງຈຳນວນ 278 ມາດຕາ ທີ່ຍັງບໍ່ທັນສຳເລັດໄປຜັນຂະຫຍາຍເປັນນິຕິກຳໃຕ້ກົດໝາຍໃຫ້ສຳເລັດຕາມຄາດໝາຍກຳນົດໄວ້.
