ປະທານປະເທດໃຫ້ກຽດເຂົ້າຮ່ວມປູກຕົ້ນໄມ້ທີ່ວັງເຍົາວະຊົນ ແລະ ຫໍມູນເຊື້ອຊາວໜຸ່ມ

ໃນວັນທີ 6 ມິຖຸນານີ້, ສູນກາງຊາວໜຸ່ມປະຊາຊົນປະຕິວັດລາວ (ຊປປລ) ໄດ້ຈັດພິທີສະເຫລີມສະຫລອງວັນປູກຕົ້ນໄມ້ແຫ່ງຊາດ 1 ມິຖຸນາ, ຂື້ນທີ່ວັງເຍົາວະຊົນ ແລະ ຫໍມູນເຊື້ອຊາວໜຸ່ມ ຕັ້ງຢູ່ເຂດບ້ານດົງໝາກຄາຍ, ເມືອງໄຊທານີນະຄອນຫລວງວຽງຈັນ, ໂດຍການໃຫ້ກຽດເຂົ້າຮ່ວມຂອງທ່ານປະທານປະເທດ ບຸນຍັງ ວໍລະຈິດ, ມີບັນດາການນຳພັກ-ລັດ, ຜູ້ຕາງໜ້າຈາກອົງການຈັດຕັ້ງມະຫາຊົນ, ພ້ອມດ້ວຍສະມາຊິກຊາວໜຸ່ມ-ເຍົາວະຊົນເຂົ້າຮ່ວມເປັນຈໍານວນຫລາຍ.

ທ່ານເຂລາຄະນະບໍລິຫານງານສູນກາງ ຊປປລ ອາລຸນໄຊ ສູນນະລາດ ກ່າວວ່າ: ການຈັດກິດຈະກໍາປູກໄມ້ນີ້ແມ່ນມີຄວາມສໍາຄັນຫລາຍ, ເພາະຈະເປັນການສ້າງສິ່ງແວດລ້ອມໃຫ້ດີຂຶ້ນໃນອະນາຄົດ, ທັງເປັນການສ້າງຂະບວນການ ຕ້ອນຮັບວັນສໍາຄັນຂອງພັກ-ຂອງຊາດ ເຊັ່ນ: ສ້າງຕັ້ງ ຊປປລ ແລະ ວັນສ້າງຕັ້ງກອງເຍົາວະຊົນທັນວາຄົບຮອບ 63 ປີ ແລະ ການກະກຽມໃສ່ກອງປະຊຸມໃຫຍ່ 3 ຂັ້ນ. ນອກນີ້, ຍັງເປັນການປູກຈິດສຳນຶກໃຫ້ແກ່ຄົນຮຸ່ນໜຸ່ມໄດ້ຮັບຮູ້, ເຂົ້າໃຈຄວາມສຳຄັນຂອງປ່າໄມ້ ແລະ ຕັ້ງໜ້າເຂົ້າຮ່ວມການປົກປັກຮັກສາ ແລະ ປູກໄມ້ໃຫ້ມີເນື້ອທີ່ປົກຄຸມໃຫ້ໄດ້ 70% ໃນປີ 2020.

ທ່ານເລຂາຄະນະບໍລິຫານງານສູນກາງ ຊປປລ ໃຫ້ຮູ້ວ່າ: ໃນປີ 2015 ລັດຖະບານ ໄດ້ຕົກລົງອະນຸມັດເນື້ອທີ່ດິນ 4 ເຮັກຕາ ທີ່ບ້ານດົງໝາກຄາຍ, ເມືອງໄຊທານີ ແລະ ອະນຸມັດງົບປະມານ 98 ຕື້ກວ່າກີບ ເພື່ອສ້າງວັງເຍົາວະຊົນ ແລະ ຫໍມູນເຊື້ອຊາວໜຸ່ມໃນສະຖານທີ່ແຫ່ງນີ້, ເພື່ອເປັນບ່ອນເຕົ້າໂຮມດຶງດູດເອົາຊາວໜຸ່ມ-ເຍົາວະຊົນ, ອະນຸຊົນລາວບັນດາເຜົ່າເຂົ້າມາສຶກສາອົບຮົມຜ່ານກິດຈະກຳທີ່ມີຊີວິດຊີວາຕ່າງໆ, ທັງເປັນບ່ອນເສີມຂະຫຍາຍຂະບວນການຮຽນຮູ້ຕົວຈິງຂອງຄົນຮຸ່ນໜຸ່ມ.

ໃນໂອກາດນີ້, ທ່ານປະທານປະເທດ ບູນຍັງ ວໍລະຈິດ ໄດ້ໃຫ້ກຽດປູກຕົ້ນໄມ້ ແລະ ຢ້ຽມຊົມວັງເຍົາວະຊົນ ແລະ ຫໍມູນເຊື້ອຊາວໜຸ່ມ ເພື່ອເປັນສີລິມຸງຄຸນ.