ຈັບຕົວຜູ້ກໍ່ເຫດປຸ້ນທະນາຄານພົງສະຫວັນ ແລະ ທະນາຄານສົ່ງເສີມກະສິກຳໄດ້ແລ້ວ
ໃນວັນທີ 26 ພຶດສະພາ ນີ້, ທ່ານ ພັນໂທ ຈັນຫອມ ແກ້ວສຸລະໄຊ ຫົວໜ້າຫ້ອງຕຳຫລວດ ນະຄອນຫລວງວຽງຈັນ, ໄດ້ຖະແຫລງຂ່າວການຈັບຕົວ ຜູ້ຕ້ອງຫາກໍ່ເຫດປຸ້ນທະນາຄານພົງສະຫວັນ ແລະ ທະນາຄານ ສົ່ງເສີມກະສິກຳ ສາຂາທ່າງ່ອນ ເມື່ອ ເດືອນເມສາ ແລະ ພຶດສະພາ ຜ່ານມານີ້, ຄື: ທ້າວ ສົມສະນິດ ອາຍຸ 28 ປີ, ຢູ່ບ້ານ ດົງໝາກຄາຍ ເມືອງ ໄຊທານີ ນະຄອນຫລວງວຽງຈັນ.
ຫົວໜ້າຫ້ອງຕຳຫລວດດັ່ງກ່າວ ໃຫ້ຮູ້ວ່າ: ໃນວັນທີ 10 ເມສາ ຜ່ານມາ, ໄດ້ມີຄົນຮ້າຍ, ກໍ່ເຫດປຸ້ນທະນາຄານພົງສະຫວັນ ສາຂາບ້ານ ພະຂາວ ເມືອງ ໄຊທານີ, ໂດຍໃຊ້ລົດຈັກເປັນພາຫະນະ ແລະ ໃຊ້ອາວຸດປືນ, ເຂົ້າໄປຈີ້ພະນັກງານໜ້າຄາວເຕີ້ ໄດ້ເງີນ 80 ລ້ານກ່ວາກີບ ແລ້ວຫລົບໜີໄປ, ແລະ ໃນວັນທີ 7 ພຶດສະພາ ກໍໄດ້ເກີດເຫດຄົນຮ້າຍປຸ້ນທະນາຄານ ສົ່ງເສີມກະສິກຳ ສາຂາ ທ່າງ່ອນ ໄດ້ເງີນ 50 ລ້ານກ່ວາກີບ ແລ້ວຫລົບໜີໄປ, ຊຶ່ງພາຍຫລັງ ເກີດເຫດ ເຈົ້າໜ້າທີ່ວິຊາສະເພາະກໍໄດ້ລົງກວດກາກ້ອງວົງຈອນປິດ ແລະ ສາມາດຮູ້ຜູ້ທີ່ກໍ່ເຫດ ທັງສອງຄັ້ງແມ່ນເປັນຄົນດຽວກັນ, ຈຶ່ງໄດ້ຈັດກຳລັງຕິດຕາມຈັບຕົວ ທ້າວ ສົມສະນິດ ໄດ້ ຢູ່ເຂດ ເສັ້ນທາງບ້ານ ໜອງທາ ເມືອງ ຈັນທະບູລີ ນະຄອນຫລວງວຽງຈັນ ມາດຳເນີນຄະດີໄດ້ຕາມລະບຽບກົດໝາຍ.
ເຈົ້າໜ້າທີ່ ໃຫ້ຮູ້ວ່າ: ຜ່ານການສືບສວນ-ສອບສວນ ເບື້ອງຕົ້ນຜູ້ກ່ຽວໄດ້ຮັບສາລະພາບວ່າໄດ້ລົງມືກໍ່ເຫດປຸ້ນທະນາຄານທັງສອງແຫ່ງນັ້ນແທ້ຈິງ, ຊຶ່ງ ເງີນທີ່ປຸ້ນມາໄດ້ແມ່ນເອົາໄປໃຊ້ຈ່າຍຫລີ້ນການພະນັນ ແລະ ຊື້ຢາບ້າມາເສບ. ປັດຈຸບັນ, ຄະດີດັ່ງກ່າວເຈົ້າໜ້າທີ່ກຳລັງຮບວຮວມຫລັກຖານ ເພື່ອສົງ່ໃຫ້ໄອຍະການ ແລະ ສານຕັດສິນຕາມລະບຽບກົດໝາຍ.
