ປະກາດເມືອງ ໄກສອນ ພົມວິຫານ ເປັນນະຄອນ, ຫລັງນະຄອນຫລວງພະບາງ

ພິທີປະກາດເມືອງ ໄກສອນ ພົມວິຫານ ເປັນນະຄອນໄກສອນ ພົມວິຫານ ໄດ້ຈັດຂຶ້ນຢ່າງຄືດຄື້ນໃນຕອນແລງວັນທີ 25 ພຶດສະພານີ້, ທີ່ເທສະບານແຂວງສະຫວັນນະເຂດ, ຊຶ່ງມີມວນຊົນເຂົ້າຮ່ວມຢ່າງຫລວງຫລາຍ, ໂດຍການໃຫ້ກຽດ​ເຂົ້າ​ຮ່ວມຂອງທ່ານ ບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດແຫ່ງ ສປປ ລາວ, ທ່ານ ໄຊສົມພອນ ພົມວິຫານ ກຳມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ, ທ່ານ ສັນຕິພາບ ພົມວິຫານ ກຳມະການສູນກາງພັກ, ເລຂາພັກແຂວງ ເຈົ້າແຂວງສະຫວັນນະເຂດ, ມີ​ບັນດາ​ລັດຖະມົນຕີ, ການ​ນຳ​ຫລັກ​ແຫ​ລ່ງ​ເຂົ້າ​ຮ່ວມ​ເປັນຈໍານວນຫລາຍ.

ໃນໂອກາດອັນສະຫງ່າລາສີນີ້, ທ່ານຮອງເລຂາພັກແຂວງ, ຮອງເຈົ້າແຂວງສະຫວັນນະເຂດ ມີຄຳເຫັນວ່າ: ການຍົກຖານະເມືອງໄກສອນ ພົມວິຫານ ເປັນນະຄອນ ກໍເພື່ອເປັນການຍົກຖານະບົດບາດ, ກຽດຊື່ສຽງຂອງເມືອງໄກສອນ ພົມວິຫານ ໃຫ້ສູງເດັ່ນຂຶ້ນໃນພາກພື້ນ ແລະ ໃນໂລກ, ໂດຍສະເພາະເປັນການເຊື່ອມໂຍງ ແລະ ພົວພັນຮ່ວມມືເພື່ອດຶງດູດການລົງທຶນ, ການຊ່ວຍເຫລືອຈາກຕ່າງປະເທດມາສຸມໃສ່ພັດທະນານະຄອນໃຫ້ມີຄວາມເຂັ້ມແຂງຮອບດ້ານ, ສີວິໄລ ແລະ ທັນສະໄໝ, ໂດຍສະເພາະແມ່ນມີຄວາມໜັກແໜ້ນທາງດ້ານການເມືອງ-ການປົກຄອງ, ການບໍລິຫານການຈັດການ, ສັງຄົມມີຄວາມສະຫງົບ, ປອດໄພ ແລະ ເປັນລະບຽບຮຽບຮ້ອຍ, ພື້ນຖານໂຄງລ່າງ ແລະ ສິ່ງອຳນວຍຄວາມສະດວກ-ສາທາລະນະປະໂຫຍດ ໄດ້ຮັບການພັດທະນາຢ່າງເປັນລະບົບ ຕາມທິດຫັນເປັນອຸດສາຫະກຳທັນສະໄໝ, ການສຶກສາ, ສາທາລະນະສຸກ, ສະຫວັດດີການ-ສັງຄົມ ໃຫ້ຂະຫຍາຍຕົວໃນລະດັບສູງ, ພ້ອມທັງ ​ເປັນ​ການເສີມຂະຫຍາຍມູນເຊື້ອວັດທະນະທຳ, ຮີດຄອງປະເພນີຕິດພັນກັບການປົກປັກຮັກສາໃຫ້ມີຄວາມຍືນຍົງ, ສ້າງນະຄອນ ໄກສອນ ພົມວິຫານ ເປັນນະຄອນສີຂຽວ, ສະອາດ, ໜ້າຢູ່, ໜ້າທ່ຽວຊົມທີ່ຕິດພັນກັບການປົກປັກຮັກສາສິ່ງແວດ

ລ້ອມ, ໄປຄຽງຄູ່ກັບການພັດທະນາການທ່ອງທ່ຽວ, ເຮັດໃຫ້ນະຄອນກາຍເປັນເສົາຄໍ້າຂອງການພັດທະນາເສດຖະກິດ-ສັງຄົມ ແລະ ບໍລິການຢ່າງຮອບດ້ານ.

ນະຄອນໄກສອນ ພົມວິຫານ ມີພົນລະເມືອງທັງໝົດ 125.726 ຄົນ, ຍິງ 63.713 ຄົນ, ມີເນື້ອທີ່ທັງໝົດ 779.03 ກິໂລຕາແມັດ, ຄວາມໜາແໜ້ນຂອງພົນລະເມືອງ 162 ຄົນຕໍ່ກິໂລຕາແມັດ, ພື້ນຖານໂຄງລ່າງທາງດ້ານເສດຖະກິດ, ວັດທະນະທໍາ-ສັງຄົມ ໄດ້ຮັບການພັດທະນາດີຂຶ້ນ, ຖະໜົນຫົນທາງ 98% ໄດ້ຮັບການປູເບຕົງ, ລະບົບໄຟຟ້າ, ນໍ້າປະປາ, ໂທລະຄົມມະນາຄົມ, ສຶກສາ, ສາທາ ມີຄວາມສະດວກດີ, ໂດຍແຕ່ລະຄອບຄົວສາມາດເຂົ້າເຖິງໄດ້ 100%. ສິ່ງແວດລ້ອມໄດ້ຮັບການປົກປັກຮັກສາກາຍເປັນຕົວເມືອງສີຂຽວ, ມີຕະຫລາດຫລາຍລະດັບທີ່ຮອງຮັບໃຫ້ແກ່ການແລກປ່ຽນຊື້-ຂາຍ, ມີທະນາຄານຫລາຍແຫ່ງທີ່ໃຫ້ການບໍລິການທາງດ້ານການເງິນ, ເຊິ່ງລາຍຮັບແຕ່ລະປີເພີ່ມຂຶ້ນ 11,79%, ສະເລ່ຍລາຍໄດ້ໃສ່ຫົວຄົນບັນລຸໄດ້ 2.041 ໂດລາສະຫະລັດຕໍ່ຄົນຕໍ່ປີ, ເຮັດໃຫ້ສາມາດກຸ້ມຕົນເອງໃນການບໍລິຫານກົງຈັກ ແລະ ມີສ່ວນແຮໄວ້, ການບໍລິການຂົນສົ່ງມີຄວາມສະດວກ ແລະ ສາມາດເຊື່ອມຈອດກັບບັນດາແຂວງຕ່າງໆ ແລະ ອະນຸພາກພື້ນ.

ໄປພ້ອມກັບການປະກາດ ນະຄອນ ໄກສອນ ພົມວິຫານ ຍັງ​ໄດ້ສະແດງຄວາມຍິນດີຕ້ອນຮັບພົນ ລະເມືອງຂອງແຂວງສະຫວັນນະເຂດ 1 ລ້ານຄົນ ​ໃນປີ 2017 ​ໂດຍ​ພົນລະ​ເມືອງ​ຄົນ​ນີ້ ​ໄດ້​ກຳ​ເນີດເມື່ອວັນທີ 7 ທັນວາ 2017 ທີ່ຜ່ານມາ, ​ເຊິ່ງເປັນເຫດການທີ່ສໍາຄັນຂອງທ້ອງຖິ່ນ ກໍຄື ສປປ ລາວ ທັງເປັນ ການສະແດງເຖິງການເອົາໃຈໃສ່ປະຕິບັດບັນລຸເປົ້າໝາຍສະຫະສະວັດທີ່ ສປຊ ໄດ້ວາງອອກ, ໂດຍສະເພາະໃນຂົງເຂດສາທາລະນະສຸກ.

ໃນໂອກາດດັ່ງກ່າວ, ທ່ານປະທານ​ປະ​ເທດ ບຸນຍັງ ວໍລະຈິດ ​ໄດ້​ໃຫ້ກຽດເປີດປ້າຍ ແລະ ຕັດແຖບຜ້າປ່ອຍປຸ້ມ​ເປົ້າ, ຕີຄ້ອງ 9 ບາດ ​ເພື່ອ​ເປັນ​ສີ​ລິ​ມົງຄຸນ ​ໃນ​ການຍົກຖານະເປັນນະຄອນ ​ໄກສອນ ພົມວິຫານ ​ໃນ​ຄັ້ງ​ນີ້. ພ້ອມ​ທັງການສະແດງສິລະປະວັນນະດີຂອງຊາວນະຄອນ ໄກສອນ ພົມວິຫານ, ການປູກໄມ້ມົງຄຸນຮ່ວມກັບປະທານປະເທດ ບຸນຍັງ ວໍລະຈິດ ແລະ ທ່ຽວຊົມວາງສະແດງຜະລິດຕະພັນຕ່າງໆຂອງຂະແໜງການທຸລະກິດ ແລະ ຊາວບ້ານ ພາຍໃນນະຄອນ ໄກສອນ ພົມວິຫານ ເຊິ່ງສ້າງຄວາມປະທັບໃຈເປັນຢ່າງດີ.