ທ່ານ ໂດນັນ ທຣຳ ຄອງຄອຍການພົບປະລະຫວ່າງ ຜູ້ນຳອາເມລິກາ ກັບ ສປປ ເກົາຫຼີ ຈະຈັດຂຶ້ນຕາມເວລາກຳນົດ
ວັນທີ 26 ພຶດສະພານີ້, ທ່ານ ໂດນັນ ທຣຳ ປະທານາທິບໍດີອາເມລິກາ ກ່າວວ່າ: ທ່ານຄອງຄອຍການພົບປະລະຫວ່າງທ່ານກັບ ທ່ານ ກິມ ຈ໋ອງອຸນ ຜູ້ນຳສູງສຸດ ສປປ ເກົາຫຼີ ຈະຈັດຂຶ້ນຕາມເວລາກຳນົດ.
ຕອນຄ່ຳມື້ດຽວກັນ, ທ່ານ ທຣຳ ກ່າວຕໍ່ນັກຂ່າວຢູ່ທຳນຽບຂາວວ່າ: ປັດຈຸບັນ, ການກະກຽມກ່ຽວກັບການພົວພັນລະຫວ່າງ ຜູ້ນຳອາເມລິກາກັບ ສປປ ເກົາຫຼີ ໄດ້ດຳເນີນໄປຢ່າງສະດວກຫຼາຍ. ອາເມລິກາຫວັງວ່າ ການພົບປະສາມາດຈັດຂຶ້ນຢູ່ສິງກະໂປໃນວັນທີ 12 ມິຖຸນາໜ້ານີ້, ເລື່ອງນີ້ບໍ່ໄດ້ມີການປ່ຽນແປງ.
ມື້ດຽວກັນ, ທຳນຽບຂາວອອກຖະແຫຼງການວ່າ: ທີມງານທຳນຽບຂາວເພື່ອທຳການກະກຽມເພື່ອການພົບປະລະຫວ່າງຜູ້ນຳອາເມລິກາກັບ ສປປ ເກົາຫຼີ ຈະເດີນທາງໄປສິງກະໂປຕາມແຜນເດີມ.
ວັນທີ 24 ພຶດສະພານີ້, ທ່ານ ທຣຳ ໄດ້ສົ່ງຈົດໝາຍເປີດຊອງສະບັບໜຶ່ງໃຫ້ທ່ານ ກິມ ຈ໋ອງອຸນ ໂດຍກ່າວວ່າ: ຈະຍົກເລີກການພົບປະທີ່ຈັດຂຶ້ນຢູ່ສິງກະໂປໃນວັນທີ 12 ມິດຖຸນາ. ວັນທີ 25 ພຶດສະພານີ້, ສປປ ເກົາຫຼີ ຕອບວ່າ: ການຕົກລົງຂອງທ່ານ ທຣຳ ບໍ່ສອດຄ່ອງກັບຄວາມປາຖະໜາຂອງປະຊາຄົມໂລກທີ່ຫວັງຢາກໃຫ້ແຫຼມເກົາຫຼີ ກໍຄືທົ່ວໂລກມີສັນຕິພາບ ແລະ ຄວາມໝັ້ນຄົງ, ແຕ່ ສປປ ເກົາຫຼີ ຍິນດີແກ້ໄຂບັນຫາກັບອາເມລິກາດ້ວຍທຸກຮູບແບບໃນທຸກເວລາ. ວັນທີ 26 ພຶດສະພານີ້, ທ່ານ ກິມ ຈ໋ອງອຸນ ຜູ້ນຳສູງສຸດ ສປປ ເກົາຫຼີ ກັບທ່ານ ມູນ ແຈອິນ ປະທານາທິບໍດີ ສ ເກົາຫຼີ ໄດ້ພົບປະຢູ່ປານມູນຈອມ. ທ່ານ ກິມ ຈ໋ອງອຸນ ຂອບໃຈນຳທ່ານ ມູນ ແຈອິນ ທີ່ໄດ້ທຳຄວາມພະຍາຍາມໃຫ້ການພົບປະລະຫວ່າງ ສປປ ເກົາຫຼີ ກັບ ອາເມລິກາ ທີ່ຄາດຈະຈັດຂຶ້ນໃນວັນທີ 12 ມິດຖຸນານີ້ ແລະ ໄດ້ສະແດງເຈດຈຳນົງອັນເດັດດ່ຽວກ່ຽວກັບການພົວປະລະຫວ່າງ ສປປ ເກົາຫຼີ ກັບ ອາເມລິກາ ທີ່ມີຄວາມໝາຍປະຫວັດສາດ.
