ຫູກໍຕ້ອງການຄວາມເອົາໃຈໃສ່

ຫູ ເປັນອະໄວຍະວະສຳຄັນທີ່ຊ່ວຍໃຫ້ເຮົາໄດ້ຍິນສຽງຕ່າງໆເພື່ອການຕິດຕໍ່ສື່ສານ ນອກຈາກນີ້, ຍັງເປັນອະໄວຍະວະທີ່ກ່ຽວຂ້ອງກັບການຊົງໂຕຂອງຮ່າງກາຍຂະນະເຄື່ອນໄຫວ ເຮົາຈຶ່ງຄວນລະມັດລະວັງເບິ່ງແຍງຫູ ເພື່ອໃຫ້ໃຊ້ວຽກຢ່າງມີປະສິດທິພາບ.

1. ການເຮັດຄວາມສະອາດຫູ ໃຫ້ໃຊ້ຜ້າສະອາດຈຸ່ມນຳ້ ແລ້ວປັ້ນພໍໝາດໆເຊັດບໍລິເວນໃບຫູ ແລະ ຮູຫູເທົ່າທີ່ນິ້ວມືຂອງທ່ານຈະເຊັດເຂົ້າໄປໄດ້ເທົ່ານັ້ນ.
2. ຖ້າມີແມງໄມ້ເຂົ້າຫູ ຫ້າມເຂ່ຍອອກ ເພາະຈະເຮັດໃຫ້ແມງໄມ້ເຂົ້າໄປເລິກກ່ວາເກົ່າ ຄວນໃຊ້ນຳ້ສະອາດ ຫລື ນຳ້ມັນທີ່ປອດໄພ ເຊັ່ນ : ນຳ້ມັນໝາກກອກຢອດລົງໃນຮູຫູປະໄວ້ ເພື່ອໃຫ້ແມງໄມ້ຕາຍ ແລ້ວອຽງຫູໃຫ້ນຳ້ມັນໄຫລອອກມາພ້ອມກັບແມງໄມ້ ແລ້ວໃຊ້ສຳລີເຊັດໃຫ້ສະອາດ ຫລື ຫາກເປັນຕອນກາງຄືນ ອາດໃຊ້ວິທີປິດໄຟໃນຫ້ອງໃຫ້ມືດ ແລ້ວໃຊ້ໄຟສາຍສ່ອງເຂົ້າໄປໃນຮູຫູ ແສງໄຟຈະລໍ້ແມງໄມ້ໃຫ້ໄຕ່ອອກມາ.
3. ເມື່ອເປັນໄຂ້ຫວັດເຈັບຄໍ ບໍ່ຄວນສັ່ງນຳ້ມູກແຮງໆ ຫລື ອັດດັງເບື້ອງໃດເບື້ອງໜຶ່ງໃນຂະນະທີ່ສັ່ງນຳ້ມູກ ເພາະຈະເຮັດໃຫ້ເຊື້ອພະຍາດໃນຄໍ ແລະ ດັງຖືກດັນເຂົ້າສູ່ຮູຫູຊັ້ນກາງ ເຮັດໃຫ້ເກີດການຕິດເຊື້ອເປັນພະຍາດຫູນຳ້ໜອງໄດ້.
4. ຜູ້ທີ່ມີອາການຂອງໄຂ້ຫວັດພູມແພ້ ມັກມີທ່າອ່ຽງທີ່ຈະເປັນພະຍາດຫູຊັ້ນກາງອັກເສບ ອັນເນື່ອງມາຈາກມີການຕິດເຊື້ອແຊກຊ້ອນ ຈຶ່ງຄວນຫລີກເວັ້ນສິ່ງທີ່ເຮັດໃຫ້ເກີດອາການແພ້ ແລະ ກິນຢາເພື່ອຫລຸດຜ່ອນອາການຂອງພະຍາດ, ສິ່ງສຳຄັນຄວນໝັ່ນເບິ່ງແຍງຮັກສາສຸຂະພາບໃຫ້ແຂງແຮງ ໂດຍອອກກຳລັງກາຍຢູ່ສະເໝີ.
5. ລະວັງຢ່າໃຫ້ຫູໄດ້ຮັບການກະທົບກະເທືອນແຮງໆ ເຊັ່ນ : ການຕົບຫູດ້ວຍມືທັງສອງເບື້ອງ, ກະທົບກະເທືອນແຮງໆຈາກໝາກບານ ເປັນຕົ້ນ ເພາະຈະເຮັດໃຫ້ເນື້ອເຍື່ອແກ້ວຫູຈີກຂາດ ຫລື ກະດູກຫູຫລຸດ ຈົນເປັນສາເຫດໃຫ້ການໄດ້ຍິນຫລຸດລົງ.
6. ຫລີກເວັ້ນການຫລິ້ນຮ້ອງສຽງດັງ ຫລື ເຮັດສຽງດັງໃສ່ກັນ ລວມທັງຫລີກເວັ້ນຈາກບ່ອນທີ່ມີສ່ຽງດັງອຶກສະທຶກ ເຊັ່ນ : ສຽງດົນຕີດັງໆໃນສະຖານບັນເທິງ, ສຽງເຄື່ອງຈັກໃນໂຮງງານ ຫາກຫລີກເວັ້ນບໍ່ໄດ້ຄວນໃສ່ເຄື່ອງປ້ອງກັນສຽງ ຫລື ມີວັດຖຸຄອບຫູ ແລະ ຖ້າຫາກຕ້ອງເຮັດວຽກຢູ່ບ່ອນທີ່ມີສຽງດັງຫລາຍໆ ຄວນກວດການໄດ້ຍິນຂອງຫູທຸກໆ 6 ເດືອນ.
7. ຂີ້ຫູເປັນສິ່ງທີ່ຮ່າງກາຍຜະລິດຂຶ້ນຕາມທຳມະຊາດ ດ້ວຍຈຳນວນທີ່ພໍດີ ແລະ ແຕກຕ່າງກັນອາດຈະແຫ້ງ ຫລື ປຽກ ຫາກມີ ຫລາຍຈະອອກມາ ຫລື ໄຫລອອກມາເອງ ຈຶ່ງບໍ່ຈຳເປັນຕ້ອງເຂ່ຍ ຫລື ຜັນຮູຫູ. ສຳລັບຄົນທີ່ມີຂີ້ຫູຫລາຍຈັບເປັນກ້ອນອັດຕັນຮູຫູຈະເຮັດໃຫ້ໄດ້ຍິນສຽງບໍ່ແຈ້ງ ໃນກໍລະນີນີ້ຈະຮູ້ສຶກວ່າຫູອື້ ບໍ່ຄວນເຂ່ຍດ້ວຍໄມ້ເຂ່ຍຫູ ຫລື ກິບດຳເດັດຂາດ ເພາະອາດເປັນອັນຕະລາຍຕໍ່ເນື້ອເຍື່ອແກ້ວຫູ, ຜິວໜັງຮູຫູອາດເປັນບາດແຜ ແລະ ອັກເສບ ເຊິ່ງຈະນຳເອົາເຊື້ອພະຍາດເຂົ້າສູ່ຫູໂດຍບໍ່ຮູ້ໂຕ ຄວນໃຊ້ນຳ້ມັນກລີເຊີຣີນ ຫລື ນຳ້ມັນໝາກກອກຢອດຫູ ມື້ລະ 2 ເທື່ອ ຈະເຮັດໃຫ້ຂີ້ຫູອ່ອນ ແລະ ລະລາຍຫລຸດອອກມາເອງ ຖ້າບໍ່ເຊົາ ແລະ ເຈັບຫູ ຫລື ໄດ້ຍິນບໍ່ແຈ້ງ ຄວນໄປໂຮງໝໍເພື່ອກວດ.
8. ເມື່ອມີອາການຜິດປົກກະຕິເກີດຂຶ້ນກັບຫູ ເຊັ່ນ : ຫູອື້, ເຈັບຫູ, ຄັນຫູ, ມີນຳ້ໜອງ ຫລື ເລືອດໄຫລອອກມາຈາກຮູຫູ, ການຟັງສຽງຫລຸດລົງ ຄວນຮັບການກວດຢູ່ພະແນກຫູ, ດັງ, ຄໍ ແລະ ຫາກທ່ານໝໍກວດພົບວ່າມີແກ້ວຫູຊອດ ຫລື ອັກເສບ ຕ້ອງລະວັງບໍ່ໃຫ້ນຳ້ເຂົ້າຫູ, ຂະນະອາບນຳ້ ຫລື ສະຜົມ ຄວນໃຊ້ສຳລີອັດຮູຫູ ຫລື ໃຊ້ໝວກຢາງຄຸມຜົມປິດຫູໄວ້ນຳ.