ຮອງລັດຖະມົນຕີກະຊວງແຮງງານລົງຊຸກຍູ້ວຽກຢູ່ແຂວງພາກໃຕ້
ໃນລະຫວ່າງວັນທີ 21-24 ພຶດສະພານີ້, ທ່ານ ນາງ ໃບຄຳ ຂັດທິຍະ ຮອງລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ (ຮສສ) ພ້ອມດ້ວຍຄະນະ ໄດ້ລົງຕິດຕາມຊຸກຍູ້ວຽກແຮງງານ ແລະ ສະຫວັດດີການສັງຄົມຢູ່ແຂວງອັດຕະປື, ເຊກອງ ແລະ ແຂວງສາລະວັນ ເພື່ອແນະນຳການຈັດຕັ້ງປະຕິວຽກງານດັ່ງກ່າວໃຫ້ມີປະສິດທິຜົນ.
ທ່ານ ນາງ ໃບຄຳ ຂັດທິຍະ ໄດ້ແນະນໍາໃຫ້ບັນດາພະແນກແຮງງານ ແລະ ສະຫວັດດີການສັງຄົມ 3 ແຂວງດັ່ງກ່າວ ຕ້ອງໄດ້ເພີ່ມທະວີຄວາມສາມັກຄີພາຍໃນຄະນະພັກ, ຮີບຮ້ອນປະເມີນສະພາບການຈັດຕັ້ງປະຕິບັດແຜນພັດທະນາວຽກງານຂອງຕົນໃນ 5 ປີຜ່ານມາ ແລະ ເອົາໃຈໃສ່ຊຸກຍູ້ສົ່ງເສີມການສ້າງງານ ໂດຍນຳໃຊ້ທ່າແຮງຂອງຊຸມຊົນ-ທ້ອງຖິ່ນ, ສ້າງລະບົບຂໍ້ມູນຂ່າວສານຕະຫລາດແຮງງານທີ່ໜ້າເຊື່ອຖືໃຫ້ແກ່ຜູ້ໃຊ້ແຮງງານ ແລະ ຜູ້ອອກແຮງງານສາມາດຮັບຮູ້ ແລະ ເຂົ້າເຖິງຂໍ້ມູນຕະຫລາດແຮງງານໄດ້ກວ້າງຂວາງ, ຮັບປະກັນການພັດທະນາສີມືແຮງງານຕາມຄວາມຕ້ອງການຂອງຕະຫລາດແຮງງານ ແລະ ການສ້າງສີມືແຮງງານໃຫ້ຕິດພັນກັບການສ້າງທັດສະນະຄະຕິໃນການອອກແຮງງານທີ່ດີ.
ທ່ານ ນາງ ໃບຄຳ ຂັດທິຍະ ເນັ້ນຕື່ມວ່າ: ໃຫ້ບັນດາພະແນກ ຮສສ ເອົາໃຈໃສ່ໂຄສະນາແກ່ຜູ້ອອກແຮງງານ ຮັບຮູ້ປະກົດການຕົວະຍົວະຫລອກລວງຈາກການຄ້າມະນຸດ ເພາະປັດຈຸບັນໄດ້ເກີດມີປະກົດການຫລອກແຮງງານ ຜູ້ເປັນຊາວໜຸ່ມ-ຍິງໜຸ່ມລາວ ໄປອອກແຮງານຢູ່ປະເທດ ດ້ວຍຫລາຍຮູບແບບ ເປັນຕົ້ນແມ່ນ ໄປອອກແຮງງານ, ສ້າງຄອບຄົວ ແລະ ຮູບແບບອື່ນໆ. ພ້ອມທັງເອົາໃຈໃສ່ຊ່ວຍເຫລືອຜູ້ປະສົບເຄາະຮ້າຍຈາກໄພພິບັດຕ່າງໆໃຫ້ທັນສະພາບການ ບໍ່ໃຫ້ແກ່ຍາວເວລາ ແລະ ນອກ ຈາກນີ້ກໍໃຫ້ເອົາໃຈໃສ່ສໍາຫລວດພື້ນທີ່ກວດກູ້ລະເບີດ ແລະ ແຜນການຊ່ວຍເຫລືອຜູ້ໄດ້ຮັບເຄາະຮ້າຍ ຈາກລະເບີດບໍ່ທັນແຕກໃຫ້ມີປະສິດທິຜົນ.
