ສານແຂວງອຸດົມໄຊຕັດອິດສະພາບ ຜູ້ຄ້າຢາເສບຕິດລາຍໃຫຍ່ຕະຫລອດຊີວິດ
ເມື່ອທ້າຍອາທິດຜ່ານມາ ນີ້, ສານປະຊາຊົນ ແຂວງ ອຸດົມໄຊ ໄດ້ຕັດສິນລົງໂທດຈຳຄຸກຕະຫລອດຊີວິດ ພ້ອມປັບໃໝເງີນ 5 ຮ້ອຍລ້ານກີບ, ສຳລັບຜູ້ຕ້ອງຫາ ທ້າວ ບຸນໄຊ ຢ່າງ ອາຍຸ 34 ປີ ຢູ່ບ້ານໂຮມສຸກເມືອງໄຊ ແຂວງອຸດົມໄຊ ຖືກເຈົ້າໜ້າທີ່ກັກຕົວໃນວັນທີ 15 ກຸມພາ ປີຜ່ານມາ,ໃນຂໍ້ຫາຄ້າ-ຂາຍຢາເສບເສບຕິດ ແລະມີຢາເສບຕິດໄວ້ໃນຄອບຄອງປະເພດຢາບ້າຈຳນວນ 9.128 ເມັດ, ຝິ່ນ 49,2 ກຣາມ ແລະ ມີວັດຖຸລະເບີດຊະນິດໝາກແຕກ 1 ໜ່ວຍ.
ເຈົ້າໜ້າທີ່ໃຫ້ຮູ້ວ່າ: ໃນຕົ້ນປີຜ່ານມາ, ໄດ້ຮັບແຈ້ງຈາກພົນລະເມືອງວ່າ ມີກຸ່ມຄົນບໍ່ດີຄ້າຂາຍຢາເສບຕິດ ຢູ່ເຂດບ້ານ ໂຮມໄຊ ເມືອງ ໄຊ ແຂວງ ອຸດົມໄຊ ຈາກນັ້ນ ໄດ້ກວດພົບຜູ້ຕ້ອງສົງໃສຄືທ້າວ ບຸນໄຊ ຢາງ ທີ່ໄດ້ຂີ່ລົດກະບະ ໝາຍເລກທະບຽນ 5284, ອອກມາຈາກເສັ້ນທາງເຂດບ້ານດັ່ງກ່າວ, ເຈົ້າໜ້າທີ່ຈຶ່ງໄດ້ເຂົ້າໄປກວດຄົ້ນ ແລະ ພົບເຫັນຢາບ້າ ຈຳນວນ 9 ພັນກ່ວາເມັດ, ທີ່ຊຸກເຊື່ອງມານຳລົດ ແລະ ໄດ້ເຂົ້າໄປກວດຄົ້ນເຮືອນຂອງຜູ້ກ່ຽວ ພົບຝິ່ນ 49,2 ກຼາມ ແລະ ວັດຖຸລະເບີດ 1 ໜ່ວຍ ຈຶ່ງໄດ້ຈັບຕົວຜູ້ກ່ຽວມາດຳເນີນຄະດີຕາມລະບຽບກົດໝາຍ.
