ລັດຖະມົນຕີຕ່າງປະເທດລາວ-ກໍາປູເຈຍຫາລືການແກ້ໄຂບັນຫາຊາຍແດນ

ໃນທ້າຍອາທິດຜ່ານມາ, ທ່ານ ສະເຫລີມໄຊ ກົມມະສິດ ລັດຖະມົນຕີກະຊວງການຕ່າງປະເທດແຫ່ງ ສປປ ລາວ ໄດ້ພົບປະເຮັດວຽກກັບທ່ານ ປຣາກ ໂຊຄົນ ລັດຖະມົນຕີກະຊວງການຕ່າງປະເທດ ແລະ ຮ່ວມມືສາກົນແຫ່ງຣາຊະອາ ນາຈັກກຳປູເຈຍ ທີ່ນະຄອນຫລວງວຽງຈັນ, ເພື່ອປະຕິບັດຕາມເຈດຕະນາລົມ ຂອງລັດຖະບານສອງປະເທດ, ກໍຄືການຕົກລົງຂອງສອງນາຍົກລັດຖະມົນຕີລາວ ແລະ ກຳປູເຈຍ ທີ່ມອບໝາຍໃຫ້ກະຊວງການຕ່າງປະເທດຂອງທັງສອງປຶກສາຫາລືຮ່ວມກັນ ເພື່ອຊອກວິທີແກ້ໄຂບັນຫາຊາຍແດນທີ່ຍັງຄົງຄ້າງລະຫວ່າງສອງປະເທດໃຫ້ມີຄວາມຄືບໜ້າ ແລະ ກ້າວໄປສູ່ຄວາມສຳເລັດຕະຫລອດເສັ້ນຊາຍແດນທີ່ຍັງເຫລືອຢູ່ 14% ຂອງລວງຍາວເສັ້ນຊາຍແດນທັງໝົດ 535 ກິໂລແມັດ.

ການພົບປະ, ສອງຝ່າຍໄດ້ແລກປ່ຽນທັດສະນະ ແລະ ຄໍາເຫັນກ່ຽວກັບວຽກງານສຳຫລວດ ແລະ ປັກຫລັກໝາຍຊາຍແດນ, ໂດຍໄດ້ເປັນເອກະພາບກັນຈະສືບຕໍ່ຊຸກຍູ້ໃຫ້ຄະນະກຳມະການຊາຍແດນລາວ-ກຳປູເຈຍ, ກຳປູເຈຍ-ລາວ ຮ່ວມປຶກສາກັນໃຫ້ຫລາຍຂຶ້ນ ເພື່ອພ້ອມກັນແກ້ໄຂບັນຫາຊາຍແດນທີ່ຍັງ ຄົງຄ້າງລະຫວ່າງສອງປະເທດໃຫ້ສຳເລັດໃນເວລາອັນຄວນ. ພ້ອມນີ້, ສອງຝ່າຍຈະສ້າງຕັ້ງກົນໄກປະສານງານຂັ້ນກົມກ່ຽວຂ້ອງຂອງກະຊວງການຕ່າງປະເທດຂຶ້ນຕື່ມອີກ, ເພື່ອເປັນການປະກອບສ່ວນເຮັດໃຫ້ບໍລິເວນຊາຍແດນມີ ຄວາມສະຫງົບ, ມີສະຖຽນລະພາບ ເພື່ອການພົວພັນຮ່ວມມືລະຫວ່າງສອງຝ່າຍກັບຄືນສູ່ສະພາບປົກກະຕິດັ່ງທີ່ເຄີຍມີມາ.