ເມືອງປາກເຊກຽມປະກາດເປັນນະຄອນໃນທ້າຍເດືອນພຶດສະພານີ້
ທ່ານ ສຸລິວັນ ສະຫວັດທະສິນ ເຈົ້າເມືອງປາກເຊແຂວງຈໍາປາສັກ ໄດ້ໃຫ້ຮູ້ວ່າ: ປັດຈຸບັນ, ອໍານາດການປົກຄອງເມືອງຂອງຕົນ ພວມສຸມໃສ່ຫ້າງຫາກະກຽມງານປະກາດເມືອງປາກເຊເປັນນະຄອນ, ເຊິ່ງຈະມີຂຶ້ນໃນວັນທີ 31 ພຶດສະພານີ້, ດ້ວຍຫລາຍກິດຈະກໍາຄື: ວັນທີ 29 ພຶດສະພາ ຈະມີການຕັ້ງກອງບຸນຂຶ້ນ 3 ກອງ, ຕອນແລງມີພິທີສູດປະລິຕະມຸງຄຸນ, ເຊົ້າວັນທີ 30 ຈະມີພິທີໃສ່ບາດຖວາຍທານແດ່ພະສົງຕາມຮີດຄອງປະເພນີ ເພື່ອອຸທິດບຸນກຸສົນໃຫ້ແກ່ບັນພະບູລຸດ ກໍຄືອະດີດການນໍາເມືອງປາກເຊແຕ່ລະໄລຍະທີ່ລ່ວງລັບໄປແລ້ວນັ້ນ, ທັງເປັນການຄອບບອກເຈົ້າຖິ່ນເຈົ້າຖານໃຫ້ຮັບຮູ້ເຖິງການປະກາດສ້າງຕັ້ງເມືອງປາກເຊເປັນນະຄອນ ເພື່ອເດີນໜ້າສ້າງສາພັດທະນາໃຫ້ມີຄວາມຈະເລີນຮຸ່ງເຮືອງຕໍ່ໄປພາຍໜ້າ.
ທ່ານເຈົ້າເມືອງໃຫ້ຮູ້ອີກວ່າ: ນອກຈາກນັ້ນ, ສຳລັບຕອນເຊົ້າວັນທີ 31 ຈະ ມີຂະບວນການອອກແຮງງານອະນາໄມລວມຄັ້ງໃຫຍ່, ໂດຍຊຸກຍູ້ໃຫ້ບັນດາຂະແໜງການ, ກົມກອງ, ສໍານັກງານ, ຄຸ້ມບ້ານຕ່າງໆທີ່ນອນໃນຂອບເຂດເມືອງປາກເຊ ເຮັດອະນາໄມຕາມຖະໜົນຫົນທາງສາຍສໍາຄັນຕ່າງໆ, ພ້ອມທັງຕິດທຸງຊາດ, ທຸງປິວ, ປະດັບປະດາຕາມສໍານັກງານ, ອົງການ ໃນຂອບເຂດເມືອງປາກເຊນັບແຕ່ເໜືອຫາໃຕ້, ມີກິດຈະກໍາແຫ່ປ້າຍນະຄອນປາກເຊອ້ອມຕົວເມືອງປະມານ 20 ຂະບວນ, ໂດຍຈະໃຊ້ເວລາປະມານ 2-3 ຊົ່ວໂມງ. ສ່ວນຕອນແລງຢູ່ສະໜາມກິລາຫລັກ 2 ພາຍຫລັງກ້ອນກໍາລັງຕ່າງໆເຂົ້າສູ່ສະໜາມ
ຮຽບຮ້ອຍແລ້ວຈະມີການສະແດງສິລະປະ, ບົດຟ້ອນສຽງແຄນລາວເປັນມໍລະດົກໂລກ, ບົດຟ້ອນຢ້ອນຍຸກ ຫລື ບົດຟ້ອນລາວຮ່ວມສະໄໝ ແລະ ລໍາສີພັນດອນ ແລະ ມີການສະແດງສວນສະໜາມຂອງກອງດຸລິຍາງຈາກກອງທັບປະຊາຊົນລາວຕື່ມອີກ. ຈາກນັ້ນ ກໍຈະເຂົ້າສູ່ພິທີປະກາດເມືອງປາກເຊ ເປັນນະຄອນຢ່າງເປັນທາງການ ແລະ ຜ່ານດໍາລັດຂອງນາຍົກລັດຖະມົນຕີວ່າດ້ວຍການສ້າງຕັ້ງນະຄອນປາກເຊ ຕໍ່ດ້ວຍການລັ່ນຄ້ອງໃຫຍ່ 9 ບາດ, ປ່ອຍນົກສັນຕິພາບ, ປ່ອຍປຸ່ມເປົ້າ ແລະ ຕັດແຖບຜ້າ ເປີດປ້າຍຈໍາລອງນະຄອນປາກເຊ ແລະ ຈະມີການຈູດບັ້ງໄຟດອກ, ຕີກອງ 9 ຄູ່ໃຫ້ມີບັນຍາກາດຟົດຟື້ນມ່ວນຊື່ນ ແລະ ມີຄວາມໝາຍເລິກເຊິ່ງ.
