ທ່ານນາຍົກລັດຖະມົນຕີ ໂອ້ລົມການນໍາແຂວງບໍລິຄໍາໄຊ
ພາຍຫຼັງສໍາເລັດການເຮັດວຽກຢູ່ເມືອງໄຊຈໍາພອນ ໃນຕອນບ່າຍຂອງວັນທີ 10 ພຶດສະພານີ້, ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ສືບຕໍ່ເຄື່ອນໄຫວເຮັດວຽກ ແລະ ໂອ້ລົມຄະນະພັກ, ຄະນະນໍາ ແລະ ພະນັກງານຫຼັກແຫຼ່ງແຂວງບໍລິຄໍາໄຊ ໂດຍໄດ້ຮັບການຕ້ອນຮັບຢ່າງອົບອຸ່ນຈາກທ່ານ ກອງແກ້ວ ໄຊສົງຄາມ ເຈົ້າແຂວງບໍລິຄໍາໄຊ ພ້ອມດ້ວຍຄະນະນຳຂອງແຂວງ ເຊິ່ງທ່ານນາຍົກລັດຖະມົນຕີ ໄດ້ສະແດງຄວາມຍ້ອງຍໍຊົມເຊີຍບັນດາຜົນສໍາເລັດໃນແຕ່ລະດ້ານທີ່ແຂວງສາມາດຍາດມາໄດ້ໃນໄລຍະຜ່ານມາ ເຊິ່ງສະແດງໃຫ້ເຫັນການຕັດສິນໃຈ ແລະ ເອົາໃຈໃສ່ຂອງຄະນະພັກ, ຄະນະນໍາ ກໍຄືການປະກອບສ່ວນຢ່າງຕັ້ງໜ້າເຂົ້າໃນການພັດທະນາເສດຖະກິດ-ສັງຄົມຂອງທຸກພາກສ່ວນຢູ່ພາຍໃນແຂວງ ຈົນໄດ້ຮັບການພັດທະນາຢ່າງຮອບດ້ານ ແລະ ດີຂຶ້ນເລື້ອຍໆ ລວມທັງການປະກອບສ່ວນເຂົ້າໃນວຽກງານປ້ອງກັນຊາດ-ປ້ອງກັນຄວາມສະຫງົບ ແລະ ເອົາໃຈໃສ່ແກ້ໄຂຢ່າງຈິງຈັງຕໍ່ບັນຫາຫຍໍ້ທໍ້ໃນສັງຄົມ. ໃນໂອກາດນີ້, ທ່ານນາຍົກລັດຖະມົນຕີ ກໍໄດ້ແຈ້ງສະພາບການສາກົນໃຫ້ຜູ້ເຂົ້າຮ່ວມກອງປະຊຸມໄດ້ຮັບຊາບວ່າ: ປັດຈຸບັນສະພາບສາກົນ ແລະ ພາກພື້ນຍັງສືບຕໍ່ຜັນແປໄປຢ່າງສັບສົນ ລະຫວ່າງບັນດາປະເທດມະຫາອໍານາດຍາກທີ່ຈະຄາດຄະເນໄດ້. ຕໍ່ການພັດທະນາເສດຖະກິດ-ສັງຄົມຂອງແຂວງ ທ່ານນາຍົກລັດຖະມົນຕີ ຍັງໄດ້ເນັ້ນໜັກໃຫ້ເອົາໃຈໃສ່ຕື່ມບາງບັນຫາ ເປັນຕົ້ນສືບຕໍ່ເອົາໃຈໃສ່ວຽກງານປ້ອງກັນຊາດ, ປ້ອງກັນຄວາມສະຫງົບ ເພື່ອໃຫ້ມີສະຖຽນລະພາບທາງດ້ານການເມືອງ, ຢູ່ທ້ອງຖິ່ນຮາກຖານບ້ານ ແລະ ການດໍາລົງຊີວິດຂອງປະຊາຊົນໃຫ້ມີຄວາມສະຫງົບ ແລະ ປອດໄພ; ສິ່ງສໍາຄັນ ແມ່ນໃຫ້ເອົາໃຈໃສ່ແກ້ໄຂຢ່າງເດັດຂາດຕໍ່ກັບປາກົດການຫຍໍ້ທໍ້ 4 ເຖື່ອນ (ຄົນເຖື່ອນ, ລົດເຖື່ອນ, ອາວຸດເຖື່ອນ ແລະ ສິນຄ້າເຖື່ອນ) ທີ່ແຂວງໄດ້ວາງອອກແລ້ວນັ້ນຢ່າງສິ້ນເຊີງ; ສືບຕໍ່ຮັກສາມູນເຊື້ອຮັກຊາດ ແລະ ເສີມຂະຫຍາຍມູນເຊື້ອປະຕິວັດ, ຄວາມສາມັກຄີອັນເປັນປຶກແຜ່ນຂອງປະຊາຊົນບັນດາເຜົ່າພາຍໃນແຂວງ; ເອົາໃຈໃສ່ຄຸ້ມຄອງການຈັດເກັບລາຍຮັບໃຫ້ຖືກຕ້ອງຄົບຖ້ວນ ສິ່ງສໍາຄັນແມ່ນໃຫ້ເອົາເຂົ້າສູ່ບັນດາກົນໄກ, ລະບຽບການ ແລະ ຫັນໄປສູ່ຄວາມທັນສະໄໝ ເພື່ອຮັບປະກັນໃຫ້ມີຄວາມໂປ່ງໄສ ແລະ ຊັດເຈນ ຄຽງຄູ່ກັບການຄຸ້ມຄອງນໍາໃຊ້ງົບປະມານລັດຢ່າງປະຢັດມັດທະຍັດ ແລະ ມີປະສິດທິຜົນສູງ; ສືບຕໍ່ລົງຊຸກຍູ້ວຽກງານກໍ່ສ້າງຮາກການການເມືອງຕາມ 4 ເນື້ອໃນ 4 ຄາດໝາຍ ແລະ ປະຕິບັດວຽກງານ 3 ສ້າງຢູ່ພາຍໃນແຂວງໃຫ້ເຂົ້າສູ່ລວງເລິກ (ແນໃສ່ການລຶບລ້າງຄວາມທຸກຍາກຂອງປະຊາຊົນ); ສໍາລັບການພັດທະນາພື້ນຖານໂຄງລ່າງເວົ້າລວມ, ເວົ້າສະເພາະການພັດທະນາກໍ່ສ້າງເສັ້ນທາງຢູ່ພາຍໃນແຂວງ ເພື່ອເປັນທ່າແຮງນໍາໃຊ້ໃຫ້ແກ່ການພັດທະນາເສດຖະກິດ-ສັງຄົມແມ່ນມອບໃຫ້ແຂວງສົມທົບກັບພາກສ່ວນທີ່ກ່ຽວຂ້ອງສຶກສາຄົ້ນຄວ້າ ແລະ ມີແຜນລະອຽດວ່າຈະເຮັດແນວໃດ ແລະ ບ່ອນໃດທີ່ມີຄວາມຈໍາເປັນແທ້ໃນເງື່ອນໄຂປັດຈຸບັນ ແລະ ຕໍ່ໜ້າທີ່ປະເທດເຮົາໄດ້ມີແຜນກໍ່ສ້າງເສັ້ນທາງຄົມມະນາຄົມ ເພື່ອຈອດ ແລະ ເຊື່ອມໂຍງກັບບັນດາປະເທດເພື່ອນບ້ານ. ທັງນີ້ກໍເພື່ອເປັນການປະຢັດມັດທະຢັດງົບປະມານຂອງລັດ ແລະ ຫຼີກເວັ້ນການໃຊ້ຈ່າຍຟູມເຟືອຍ. ພ້ອມກັນນັ້ນ ກໍ່ສ້າງສະພາບແວດລ້ອມ ແລະ ເງື່ອນໄຂອຳນວຍຄວາມສະດວກທີ່ດີ ເພື່ອຍາດແຍ່ງເອົາການລົງທຶນທັງພາຍໃນ ແລະ ຕ່າງປະເທດໃຫ້ຫຼາຍຂຶ້ນ.
ໃນໂອກາດເດີນທາງໄປເຄື່ອນໄຫວເຮັດວຽກຢູ່ແຂວງບໍລິຄໍາໄຊຄັ້ງນີ້ ຄະນະຂອງທ່ານ ນາຍົກລັດຖະມົນຕີ ຍັງໄດ້ເດີນທາງໄປເຮັດວຽກຮ່ວມກັບບໍລິສັດ ບໍ່ຄໍາ ຄໍາເກີດ ແສນອຸດົມ, ໄປວາງພວງມາລາ ຕໍ່ໜ້າຮູບປັ້ນ ທ່ານ ສີສົມພອນ ລໍວັນໄຊ ແລະ ປູກຕົ້ນໄມ້ ເພື່ອເປັນທີ່ລະນຶກຢູ່ສວນສາທາລະນະຮູບປັ້ນທ່ານ ສີສົມພອນ ລໍວັນໄຊ ຕື່ມອີກ.
ໃນໂອກາດດັ່ງກ່າວ, ທ່ານເຈົ້າແຂວງບໍລິຄໍາໄຊ ໄດ້ລາຍງານສະພາບການພັດທະນາເສດຖະກິດ-ສັງຄົມໂດຍຫຍໍ້ໃຫ້ແກ່ທ່ານນາຍົກລັດຖະມົນຕີ ຊາບວ່າ: ທົ່ວແຂວງສືບຕໍ່ມີຄວາມສະຫງົບທາງດ້ານການເມືອງ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍໂດຍພື້ນຖານ, ໄດ້ເພີ່ມທະວີຄວາມເຂັ້ມງວດໃນການຄຸ້ມຄອງ, ກວດກາການຂຸດຄົ້ນ, ການເຄື່ອນຍ້າຍໄມ້ ແລະ ທຸລະກິດໄມ້, ພ້ອມທັງ ເຊື່ອມຊຶມຄໍາສັ່ງດັ່ງກ່າວຢ່າງກວ້າງຂວາງ ນັບແຕ່ແຂວງລົງຮອດຂັ້ນເມືອງ ແລະ ຮາກຖານບ້ານ ເພື່ອເປັນການຕ້ານ, ສະກັດກັ້ນ ແລະ ແກ້ໄຂປາກົດການຫຍໍ້ທໍ້ໃນຂົງເຂດວຽກງານປ່າໄມ້; ສໍາລັບການພັດທະນາເສດຖະກິດ-ສັງຄົມມີທ່ວງທ່າດີຂຶ້ນ ຊີວິດການເປັນຢູ່ຂອງປະຊາຊົນໄດ້ຮັບການພັດທະນາ ແລະ ປັບປຸງດີຂຶ້ນເປັນກ້າວໆ, ການເກັບລາຍຮັບຈາກບັນດາຫົວໜ່ວຍທຸລະກິດຕ່າງໆ ແມ່ນບັນລຸຕົວເລກຕາມຄາດໝາຍທີ່ວາງໄວ້. ໃນປີ 2017 ເສດຖະກິດຂອງແຂວງໄດ້ສືບຕໍ່ມີການເຕີບໂຕຢ່າງຕໍ່ເນື່ອງ ລວມຍອດຜະລິດພັນພາຍໃນ (GDP) ບັນລຸ 5.041 ຕື້ກີບ ສະເລ່ຍໃສ່ຫົວຄົນໄດ້ 2.151 ໂດລາຕໍ່ປີ ເທົ່າກັບ 17,9 ລ້ານກີບ/ຄົນ; ທົ່ວແຂວງຍັງມີຄອບຄົວທຸກຍາກ ຈໍານວນ 1.436 ຄອບຄົວ ກວມເອົາປະມານ 2,76% ຂອງຈໍານວນຄອບຄົວທັງໝົດ, ມີບ້ານທຸກຍາກ 31 ບ້ານ ເທົ່າກັບ 11% ຂອງຈໍານວນບ້ານທັງໝົດ; ໄດ້ຫັນລົງກໍ່ສ້າງຮາກຖານການເມືອງ ມີພະນັກງານທັງໝົດ 166 ສະຫາຍ, ຍິງ 4 ສະຫາຍ ໃນຮູບແບບລົງປົກກະຕິປະຈຳບ້ານທີ່ຫຼໍ່ແຫຼມ ແລະ ລົງຕາມສາຍຕັ້ງ; ໄດ້ຊຸກຍູ້ໃຫ້ປະຊາຊົນທໍາການຜະລິດກະສິກໍາ ເພື່ອຂະຫຍາຍເນື້ອທີ່ການຜະລິດໃຫ້ໄດ້ຫຼາຍ ແລະ ກາຍເປັນສິນຄ້າ; ການພົວພັນ-ຮ່ວມມືກັບຕ່າງປະເທດ ໄດ້ເປັນເຈົ້າການເສີມຂະຫຍາຍສາຍພົວພັນຮ່ວມມືຮອບດ້ານ ກັບບັນດາແຂວງທີ່ມີຊາຍແດນຕິດຈອດກັນ ດ້ວຍການສ້າງເງື່ອນໄຂ, ອໍານວຍຄວາມສະດວກໃຫ້ແກ່ການລົງທຶນດ້ານຕ່າງໆ ກໍຄືການມາເຄື່ອນໄຫວຢ້ຽມຢາມ ແລະ ອື່ນໆ.
