ນອນຫລັບຍາວໃນມື້ພັກເຮັດໃຫ້ເຊື່ອງຊຶງໃນເຊົ້າວັນຈັນ

     ການນອນຫລັບພັກຜ່ອນຍາວໃນໄລຍະທ້າຍອາທິດ ອາດສົ່ງຜົນໃຫ້ທ່ານເກີດອາການຜິດປົກກະຕິ ຫລື ມີການຕອບສະໜອງ ເຊື່ອງຊ້າໄດ້ໃນເຊົ້າວັນຈັນ ທັງຍັງແກ່ຍາວໄປໄດ້ເຖິງເຊົ້າວັນພຸດກໍມີ.

ໂດຍຂໍ້ມູນດັ່ງກ່າວມາຈາກວຽກງານວິໄຈຈາກມະຫາວິທະຍາໄລ ຣັສ ໃນຊິກາໂກ ແຂວງອິນລິນອຍ ສະຫະລັດອາເມລິກາ ລະບຸວ່າ : ຄົນໃນໄວເຮັດວຽກມັກຈະປະສົບບັນຫາໝົດໄຟໃນການເຮັດວຽກໃນມື້ວັນຈັນ ເຊິ່ງເປັນມື້ທຳອິດຂອງການເຮັດວຽກ ຫລັງຈາກທີ່ໄດ້ຢຸດພັກຜ່ອນ ທັງນີ້ກໍຍ້ອນວ່າພວກເຂົາມັກຈະປັບປ່ຽນພຶດຕິກຳໃນການນອນຫລັບຂອງໂຕເອງໃຫ້ນອນເດິກຕື່ນສວາຍໃນວັນເສົາ – ອາທິດ ທັງຍັງໃຊ້ເວລານອນຫລັບໃນມື້ພັກດົນກ່ວາທຸກໆມື້ນຳອີກ ມັນຈຶ່ງສົ່ງຜົນໃຫ້ຄວາມຈື່ຈຳ ແລະ ການຕອບສະໜອງຕໍ່ເລື່ອງຕ່າງໆເສື່ອມສະພາບລົງໃນເຊົ້າວັນຈັນທີ່ມີການປັບປ່ຽນເວລາການນອນຫລັບໃຫ້ກັບມາເປັນຄືມື້ເຮັດວຽກປົກກະຕິ ທັງຍັງມີອາການເຊື່ອງຊຶງ ຕອບສະໜອງຊ້າແບບນີ້ໄປເຖິງເຊົ້າວັນອັງຄານ ແລະ ເຊົ້າວັນພຸດນຳອີກ.

ທາງດ້ານ ທ່ານ ເຮເລນ ເບີເກສ ຫົວໜ້າທີມວິໄຈໄດ້ເປີດເຜີຍວ່າ : ການປັບປ່ຽນເວລາການເຂົ້ານອນໃນວັນເສົາ – ອາທິດ ກໍ ປຽບດັ່ງເປັນການປັບໂມງຊີວິດຂອງຕົນເອງ. ດັ່ງນັ້ນ, ໃນວັນຈັນເມື່ອເຮົາຕ້ອງປ່ຽນພຶດຕິກຳການນອນຫລັບໃຫ້ກັບມານອນຕື່ນເຊົ້າຢ່າງກະທັນຫັນ ມັນກໍຈະເຮັດໃຫ້ຮ່າງກາຍປັບໂຕບໍ່ທັນ ແລະ ເຮັດໃຫ້ຫລາຍຄົນເຊື່ອງຊຶງ ແລະ ອິດເມື່ອຍອ່ອນເພຍ ບໍ່ສົດຊື່ນຫ້າວຫັນໃນເຊົ້າວັນຈັນ.

ແນວໃດກໍຕາມ, ນອກຈາກການປັບປ່ຽນພຶດຕິກຳການນອນຫລັບໃນໄລຍະວັນເສົາ – ອາທິດ ຈະສົ່ງຜົນໃຫ້ເກີດບັນຫາໃນການເຮັດວຽກ ແລະ ການຕອບສະໜອງຕໍ່ສິ່ງຕ່າງໆອ້ອມໂຕໃນວັນຈັນແລ້ວ ຍັງເຮັດໃຫ້ຕຸ້ຍໄດ້ງ່າຍກ່ວາຄົນທີ່ນອນຫລັບພຽງພໍ ແລະ ນອນເປັນເວລາໃນທຸກໆມື້ເຖິງ 3 ເທົ່ານຳອີກ.