ແມນຊິຕີ້ ສ້າງສະຖິຕິໃຫມ່ອີກ 1 ຢ່າງ ໃນພຣີເມຍລີກ ລະດູການນີ້
ນັດສຸດທ້າຍບານເຕະ ພຣີເມຍລີກ ລະດູການນີ້ ແມນເຊັສເຕີ ຊິຕີ້ ທີມແຊ້ມ ເຮັດໄດ້ຕາມເປົ້າຫມາຍອີກຫນຶ່ງຢ່າງຄື ຄວ້າແຊ້ມລີກ ດ້ວຍການຊະນະອັນດັບທີ 2 ຄະແນນຂາດສຸດ 19 ຄະແນນ, ຫລັງບຸກຊະນະ ເຊົາແທມຕັນ 1-0 ຈາກປະຕູໄຊຂອງ ກາບ້ຽວ ເຈຊຸສ (Gabriel Jesus) ໄລຍະຕໍ່ເວລາບາດເຈັບນາທີ 90+4.
ແມນຊິຕີ້ ມີ 100 ຄະແນນຈາກ 38 ນັດ, ເອົາຊະນະອັນດັບ 2 ແມນຢູ ເຖິງ 19 ຄະແນນ ເປັນການສ້າງສະຖິຕິໃຫມ່ໃນ ພຣີເມຍລີກ ທຳລາຍສະຖິຕິຂອງ ແມນຢູ ໃນລະດູການ 1999-2000 ທີ່ສາມາດຄວ້າແຊ້ມລີກດ້ວຍການຊະນະອັນດັບ 2 ຫ່າງກັນ 18 ຄະແນນ.
ສ່ວນອີກ 3 ສະຖິຕິໃຫມ່ທີ່ ແມນຊິຕີ້ ເຮັດໄດ້ໃນລະດູການນີ້ຄື: ຊະນະຫລາຍສຸດໃນ ພຣີເມຍລີກ ຫນຶ່ງລະດູການ ຊະນະ 32 ນັດຈາກ 38 ນັດ, ທຳລາຍສະຖິຕິຂອງ ເຊວຊີ ໃນລະດູການຜ່ານມາທີ່ເຮັດໄດ້ 30 ນັດ; ຍິງປະຕູໄດ້ຫລາຍສຸດໃນ ພຣີເມຍລີກ ຫນຶ່ງລະດູການ 106 ປະຕູ ທຳລາຍສະຖິຂອງ ເຊວຊີ ໃນລະດູການ 2009-2010 ຍິງໄດ້ 103 ປະຕູ; ເປັນແຊ້ມດ້ວຍຄະແນນຫລາຍສຸດ 100 ຄະແນນ ທຳລາຍສະຖິຕິຂອງ ເຊວຊີ ໃນລະດູການ 2004-2005 ເຮັດໄດ້ 95 ຄະແນນ. ນອກຈາກນີ້ ຜູ້ຈັດການທີມ ເປັບ ກວາດີໂອລ້າ ກໍສາມາດທຳລາຍສະຖິຕິຂອງຕົນເອງ ຄຸມທີມໄດ້ແຊ້ມລີກດ້ວຍຄະແນນຫລາຍສຸດ 100 ຄະແນນ ແຊງສະຖິຕິເກົ່າຄຸມ ບາເຊໂລນາ ຄວ້າແຊ້ມ ລາລີກ້າ ໃນລະດູການ 2009-2010 ໄດ້ 99 ຄະແນນ.
