ມີການລະບາດຂອງພະຍາດໄຂ້ຍຸງລາຍຢູ່ແຂວງອັດຕະປື ມີຜູ້ເສຍຊີວິດແລ້ວ 2 ຄົນ
ທ່ານ ດຣ ບຸນທະວີ ຈະເລີນຜົນ ຜູ້ອຳນວຍການໂຮງໝໍແຂວງ ອັດຕະປື ໄດ້ໃຫ້ສຳພາດຕໍ່ນັກຂ່າວໜັງສືມພິມລາວພັທດະນາ ໃນວັນທີ 10 ພຶດສະນາ ນີ້ວ່າ: ປັດຈຸບັນ ຢູ່ແຂວງ ອັດຕະປື ໄດ້ມີການລະບາດຂອງພະຍາດໄຂ້ຍຸງລາຍ, ຊຶ່ງໄດ້ພົບເຫັນມີຜູ້ຕິດເຊື້ອຫລາຍກ່ວາ 100 ຄົນ ແລະ ມີຜູ້ເສຍຊີວິດ ແລ້ວ 2 ຄົນ ຢູ່ບ້ານ ທ່າຫີນ ເມືອງ ສາມັກຄີໄຊ ແຂວງ ອັດຕະປື, ປັດຈຸບັນ ທາງສາທາລະນະສຸກແຂວງ ໄດ້ລະດົມພະນັກງານລົງໂຄສະນາເຜີຍແຜ່ໃຫ້ປະຊາຊົນ ຮັກສາຄວາມສະອາດ ແລະ ທຳລາຍແຫ່ງເພາະພັນຂອງຍຸງລາຍ ເພື່ອສະກັດກັ້ນບໍ່ໃຫ້ມີການລະບາດຮ້າຍແຮງຂຶ້ນຕື່ມ.
ຜູ້ອຳນວຍການ ໂຮງໝໍແຂວງ ໃຫ້ຮູ້ວ່າ: ການລະບາດຂອງພະຍາດໄຂ້ຍຸງລາຍດັ່ງກ່າວໄດ້ພົບເຫັນມາແຕ່ຕົ້ນປີນີ້, ແລະ ປັດຈຸບັນ ກຳລັງມີທ່າອ່ຽງເພີ່ມຂຶ້ນ ໂດຍະເພາະໃນໄລຍະຕົ້ນເດືອນ ພຶດສະພາ ມີຜູ້ຕິດເຊື້ອເຂົ້າມາປິ່ນປົວຫລາຍກ່ວາ 140 ຄົນ, ສ່ວນໃຫຍ່ແມ່ນ ຢູ່ 2 ເມືອງຄື: ເມືອງ ສາມັກຄີໄຊ ແລະ ເມືອງ ໄຊເສດຖາ. ຊຶ່ງທຽບໃສ່ໃນໄລຍະດຽວຂອງປີຜ່ານມາ ເຫັນວ່າເພີ່ມສູງຂຶ້ນ, ໂດຍສະເພາະຜູ້ຕິດເຊື້ອພະຍາດ ສ່ວນໃຫຍ່ຈະເປັນຜູ້ໃຫຍ່ກວມ 80%, ແນວໃດກໍດີ ທາງສາທາລະນະສຸກແຂວງ ໄດ້ເອົາໃຈໃສ່ ໃນການສະກັດກັ້ນ ການລະບາດຂອງພະຍາດດັ່ງກ່າວ ໂດຍການລົງໂຄສະນາ ໃຫ້ສຸກສາລາໃນແຕ່ລະເມືອງ ໃຫ້ເອົາໃຈໃສ່ສ້າງຂະບວນການສະກັດກັ້ນ ການລະບາດມັນ ໂດຍສະເພາະການເຮັດອານາໄມສະພາບແວດລ້ອມທຳລາຍແຫລ່ງເພາະພັນຂອງຍຸງລາຍ, ນອກຈາກນີ້ ກໍຕ້ອງຮັກສາອານາໄມບ່ອນຢູ່ອາໃສໃຫ້ສະອາດ ແລະ ປົກປິດອຸ່ມແອ່ງນ້ຳໃຫ້ດີ ເພື່ອບໍ່ໃຫ້ຍຸງລາຍມາວາງໄຂ່ໃສ່.
