ຄະດີຄາດຕະກຳຍິງສາວຫວຽດນາມຢູ່ເມືອງຄຳເກີດມີຄວາມຄືບໜ້າກວ່າ 60%
ຕາມການໃຫ້ສຳພາດຂອງທ່ານພັນໂທ ກົງຈັນ ຫົວໜ້າກອງບັນຊາການ ປກສ ເມືອງ ຄຳເກີດແຂວງບໍລິຄຳໄຊ ຕໍ່ນັກຂ່າວໜັງສືພິມລາວພັດທະນາໃນວັນທີ 8 ພຶດສະພານີ້ ໃຫ້ຮູ້ວ່າ: ຜ່ານຈາກການສືບສວນ-ສອບສວນເຫດການຄາດຕະກຳຍິງສາວສັນຊາດຫວຽດນາມຢູ່ບ້ານຫ້ວຍແກ້ວໜຶ່ງເມືອງຄຳເກີດ ແຂວງບໍລິຄຳໄຊ ແມ່ນມີຄວາມຄືບໜ້າແລ້ວຫລາຍກ່ວາ 60% ແລະ ພວມກຳລັງເລັ່ງຕິດຕາມຕົວຄາດຕະກອນກໍ່ເຫດມາດຳເນີນຄະດີໃຫ້ໄດ້ໂດຍໄວ.
ເຈົ້າໜ້າທີ່ ໃຫ້ຮູ້ວ່າ: ພາຍຫລັງໄດ້ຮັບແຈ້ງເມື່ອບໍ່ດົນມານີ້, ມີເຫດໄຟໄໝ້ຮ້ານຂາຍເຄື່ອງແຫ່ງໜຶ່ງຢູ່ບ້ານຫ້ວຍແກ້ວ, ຈຶ່ງໄດ້ນຳເອົາລົດມອດໄຟເຂົ້າໄປສະກັດກັ້ນ, ໂດຍໃຊ້ເວລາປະມານ 20 ນາທີ ຈຶ່ງດັບມອດໄຟໄວ້ໄດ້, ຈາກນັ້ນ, ໄດ້ກວດກາສະຖານທີ່ເກີດເຫດພົບເຫັນມີຜູ້ເສຍຊີວິດ 1 ຄົນຄື: ນາງ ຫງຽນທິເຕີ່ຍ ອາຍຸ 51 ປີສັນຊາດຫວຽດນາມ, ອາຊີບຄ້າຂາຍ ໃນສະພາບນອນຄຸກເຂົ່າຂວໍ່າໜ້າຢູ່ກັບພຶ້ນ, ພ້ອມທັງມີຜ້າປົກຫຸ້ມໄວ້, ເຈົ້າໜ້າທີ່ຈຶ່ງໄດ້ນຳເອົາສົບຜູ້ກ່ຽວມາສັນນະສູດຫາສາເຫດການເສຍຊີວິດ ແລະ ໄດ້ພົບວ່າ: ຜູ້ກ່ຽວບໍ່ໄດ້ເສຍຊີວິດຍ້ອນຂາດອາກາດຫາຍໃຈ ແຕ່ຍ້ອນຖືກຄາດຕະກຳ, ໂດຍຮ່າງກາຍມີບາດແຜຕາມຕົນຕົວ ແລະ ບໍລິເວນຫົວ ຄ້າຍຄືຖືກຂອງມີຄົມຟັນ, ເຊິ່ງເປັນສາເຫດເຮັດໃຫ້ເສຍຊີວິດ.
ຈາກການສືບສວນ-ສອບສວນຄະດີດັ່ງກ່າວ ເຈົ້າໜ້າທີ່ສັນນິຖານວ່າ: ເປັນການຄາດຕະກຳ ແລ້ວວາງເພີງເພື່ອອຳພາງຄະດີ, ຊຶ່ງໃນມື້ເກີດເຫດຜູ້ກ່ຽວໄດ້ອາໃສຢູ່ຄົນດຽວ, ໂດຍສາມີ ແລະ ລູກໄດ້ເດີນທາງເມືອຢາມບ້ານທີ່ ສສ. ຫວຽດນາມ ແລະ ຜ່ານການເອົາຄຳໃຫ້ການພະຍານໃກ້ຄຽງ ແລະ ກ້ອງວົງຈອນປິດຢູ່ໃກ້ຈຸດເກີດເຫດ, ໄດ້ພົບເຫັນຜູ້ຕ້ອງສົງໃສຄົນໜຶ່ງ, ຊຶ່ງປັດຈຸບັນ ກຳລັງເລັ່ງຮວບຮວມຂໍ້ມູນຫລັກຖານ ເພື່ອຕິດຕາມຕົວຄົນຮ້າຍມາດຳເນີນຄະດີໂດຍໄວ.
