ເລືອກຕັ້ງມາເລເຊຍ 2018 : ມານດາແຫ່ງການເລືອກຕັ້ງທັງປວງ
ການເລືອກຕັ້ງທົ່ວໄປຄັ້ງທີ 14 ຂອງມາເລເຊຍ ໃນວັນທີ 9 ພຶດສະພານີ້ ໄດ້ຮັບການຂະໜານນາມວ່າ “ມານດາແຫ່ງການເລືອກຕັ້ງທັງປວງ” (Mother of All Elections) ເພາະການກັບເຂົ້າມາມີບົດບາດຜູ້ນຳຝ່າຍຄ້ານຂອງທ່ານ ມະຫາເທ ໂມຮຳໝັດ ອາຍຸ 92 ປີ ອະດີດນາຍົກລັດຖະມົນຕີ ທີ່ຄອງອຳນາດຍາວນານກວ່າທົດສະວັດ ແລະ ຫົວໜ້າພັກແກນນຳລັດຖະບານອຳໂນ (United Malays National Organisation – UMNO) ປະກາດຊີງຕຳແໜ່ງນາຍົກລັດຖະມົນຕີຈາກທ່ານ ນາຈິບ ຣາຊັກ ຮັກສາການນາຍົກລັດຖະມົນຕີ ແລະ ຫົວໜ້າພັກອຳໂນຄົນປັດຈຸບັນ.
ບັນຫາໃຫຍ່ຂອງທັງສອງຝ່າຍຄືການຊ່ວງຊີງສຽງຂອງຜູ້ມີສິດອອກສຽງກຸ່ມ “ພູມີບຸດ” ຫລື “ບຸດຂອງແຜ່ນດິນ” ປະຊາກອນສ່ວນຫລາຍຂອງປະເທດ ເຊິ່ງສ່ວນຫລາຍເປັນຊາວມາເລເຊຍເຊື້ອສາຍມາລາຢູນັບຖືສາສະໜາອິສລາມ ໂດຍຕົວເລກຈາກສຳນັກງານສະຖິຕິແຫ່ງຊາດມາເລເຊຍປີ 2018 ລະບຸວ່າ: ປະຊາກອນກຸ່ມນີ້ມີອັດຕາສ່ວນສູງເຖິງ 68,8% ຂອງພົນລະເມືອງທັງໝົດ 28,7 ລ້ານຄົນ.
ຜົນສຳຫລວດຄວາມເຫັນຂອງປະຊາຊົນຈາກອົງການທັງໃນ ແລະ ນອກປະເທດ ສະຫລຸບຜົນການເລືອກຕັ້ງໄປໃນທາງດຽວກັນວ່າ: ຝ່າຍຄ້ານນຳໂດຍທ່ານ ມະຫາເທ ມີທ່າອ່ຽງຈະຊະນະຄະແນນສຽງ popular vote ຫລາຍຂຶ້ນ, ແຕ່ທ່ານ ນາຈິບ ຣາຊັກ ແລະ ແນວຮ່ວມພັກລັດຖະບານຈະຍັງໄດ້ບ່ອນນັ່ງສ່ວນຫລາຍໃນລັດຖະສະພາຢູ່.
The battle to lead Malaysia is personal. Upcoming elections pit Prime Minister Najib Razak against his 92-year-old former mentor.
For more, sign up to @bpolitics' Balance of Power newsletter https://t.co/sooloWCHh4 pic.twitter.com/tlHZ0KEHGQ
— Bloomberg (@business) April 30, 2018
ລາຍງານການສຳຫລວດຂອງຫລາຍກຸ່ມຊີ້ວ່າ: ການຊະນະເລືອກຕັ້ງຈົນຕັ້ງລັດຖະບານໄດ້ຂອງຝ່າຍຄ້ານຈະເປັນຈິງກໍຕໍ່ເມື່ອມີສິ່ງມະຫັດສະຈັນເກີດຂຶ້ນ, ແຕ່ບໍ່ວ່າຜົນການເລືອກຕັ້ງຈະເປັນແນວໃດ ການເລືອກຕັ້ງທົ່ວໄປຄັ້ງທີ 14 ຂອງມາເລເຊຍຄັ້ງນີ້ເປັນກໍລະນີສຶກສາທີ່ດີສຳລັບປະເທດເພື່ອນມິດ ໃນການສ້າງຄວາມເຂົ້າໃຈຂໍ້ດີຂໍ້ບົກຜ່ອງຂອງການຕໍ່ສູ້ທາງການເມືອງໃນລະບົບພັກການເມືອງທີ່ມີພັດທະນາການຢ່າງຕໍ່ເນື່ອງ ແລະ ສຳຄັນທີ່ສຸດ ຄືເປີດໂອກາດໃຫ້ສ້າງຄວາມເຂົ້າໃຈຕໍ່ທັດສະນະຄະຕິກ່ຽວກັບປະຊາທິປະໄຕຂອງປະຊາຊົນໃນສັງຄົມມາເລເຊຍນຳອີກ.
