ຫລວງພະບາງ ຢູໄນເຕັດ ຫຍັບຂຶ້ນອັນດັບ 2 ຫລັງຊະນະ ສະຫວັນ ຢູໄນເຕັດ 4-0
ສະໂມສອນຫລວງພະບາງ ຢູໄນເຕັດ ຫຍັບຂຶ້ນອັນດັບທີ 2 ຫລັງຈາກເອົາຊະນະ ສະໂມສອນ ສະຫວັນ ຢູໄນເຕັດ 4-0 ໃນວັນທີ 6 ພຶດສະພາຜ່ານມານີ້ ທີ່ສະໜາມກິລາແຫ່ງຊາດ ຫລັກ 16 ຂອງການແຂ່ງຂັນເປບຊີ ລາວພຣີເມຍລີກ 2018. ຂະນະທີ່ສະໂມສອນ ປກສ ເອັຟຊີ ລົງຢູ່ອັນດັບທີ 4 ຈາກອາທິດຜ່ານມາຢູ່ອັນດັບທີ 2.
ສະໂມສອນຫລວງພະບາງ ຢູໄນເຕັດ ຖືວ່າເປັນສະໂມສອນທີ່ໜ້າຈັບຕາ ເພາະເປັນສະໂມສອນນ້ອງໃໝ່ທີ່ເຂົ້າຮ່ວມການແຂ່ງຂັນເປບຊີ ລາວພຣີເມຍລີກ 2018 ຕະຫລອດການແຂ່ງຂັນສາມາດສ້າງຜົນງານທີ່ໂດດເດັ່ນຈົນຫຍັບຂຶ້ນຢູ່ອັນດັບທີ 2 ຂອງຕາຕະລາງຄະແນນປະຈໍາອາທິດນີ້. ສະໂມສອນ ຫລວງພະບາງ ຢູໄນເຕັດ ລົງສະໜາມ 6 ຄັ້ງ ຊະນະ 2 ຄັ້ງ ສະເໝີ 3 ຄັ້ງ ເສຍ 1 ຄັ້ງ ລວມມີ 9 ຄະແນນ ຫຍັບຈາກອັນດັບທີ 4 ຂອງຕາຕະລາງຄະແນນອາທິດຜ່ານມາເປັນອັນດັບທີ 2 ປະຈໍາອາທິດນີ້.
ສ່ວນສະໂມສອນ ປກສ ເອັຟຊີ ລົງຢູ່ອັນດັບທີ 4 ຈາກອາທິດຜ່ານມາຢູ່ອັນດັບທີ 2 ຂອງຕາຕະລາງ ຈາກການລົງສະໜາມ 3 ຄັ້ງ ຊະນະ 2 ຄັ້ງ ເສຍ 1 ຄັ້ງ ລວມມີ 6 ຄະແນນ.
