ໄຟເຍືອງທາງມືດ ບັນຫາແກ້ໄຂໄດ້ ແຕ່ບໍ່ເຮັດ
ສະບາຍດີ ເພື່ອນຜູ້ອ່ານທີ່ຮັກແພງ, ຫລາຍຄົນກໍອາດຈະເປັນຫ່ວງ ເຖິງວ່າປັດຈຸບັນການພັດທະນາພື້ນຖານໂຄງລ່າງຕົວເມືອງ ກໍຄືຖະໜົນຫົນທາງຕ່າງໆໄດ້ມີການຂະຫຍາຍຕົວໄວສົມຄວນ ໂດຍສະເພາະໃນຕົວເມືອງໃຫຍ່ດັ່ງນະຄອນຫລວງວຽງຈັນ ເພື່ອອຳນວຍຄວາມສະດວກໃຫ້ແກ່ການໄປມາຫາສູ່ຂອງປະຊາຊົນ, ແຕ່ຄຽງຄູ່ກັນນັ້ນ ກໍຍັງມີຫລາຍຖະໜົນ, ຫລາຍເສັ້ນທາງຍັງຕົກຢູ່ໃນສະພາບມືດມົວທີ່ມີຄວາມສ່ຽງກໍ່ໃຫ້ເກີດອຸປະຕິເຫດ ແລະ ເປັນຈຸດບອດໃຫ້ແກ່ຜູ້ບໍ່ຫວັງດີສວຍໂອກາດກະທຳໃນສິ່ງບໍ່ດີຕ່າງໆ. ດັ່ງຢູ່ຖະໜົນ 450 ປີ ເຊິ່ງເປັນຖະໜົນໃຫຍ່ສ້າງຂຶ້ນເພື່ອຂໍ່ານັບຮັບຕ້ອນວັນສ້າງຕັ້ງນະຄອນຫລວງວຽງຈັນຄົບຮອບ 450 ປີ ເມື່ອປີ 2010 ຜ່ານມາ, ແຕ່ແລ້ວຈົນມາຮອດປັດຈຸບັນກໍຍັງມີຫລາຍຈຸດໃນເສັ້ນທາງດັ່ງກ່າວຍັງບໍ່ມີໄຟເຍືອງທາງ ຫລື ບາງບ່ອນມີລະບົບໄຟເຍືອງທາງ ແຕ່ກໍຖືກຊຸດໂຊມມາຫລາຍປີແລ້ວ ແລະ ຍັງບໍ່ໄດ້ຮັບການແກ້ໄຂ ແລະ ປົວແປງຄືນແຕ່ຢ່າງໃດ ອັນເປັນຕົ້ນເຫດພາໃຫ້ເກີດອຸປະຕິເຫດໃນເສັ້ນທາງດັ່ງກ່າວນັບມື້ມີຫລາຍ ຈົນຫລາຍຄົນໃຫ້ຂະໜານນາມວ່າເປັນເສັ້ນທາງມໍລະນະ. ໃນຄວາມຈິງກໍເປັນແນວນັ້ນແທ້ ແລະ ຜ່ານມາກໍມີສື່ມວນຊົນໄດ້ສ່ອງແສງມາຫລາຍແລ້ວ, ແຕ່ຈົນມາຮອດປັດຈຸບັນກໍຍັງບໍ່ທັນມີພາກສ່ວນກ່ຽວຂ້ອງໃດເຂົ້າມາປົວແປງ. ໃນຂະນະທີ່ເມື່ອເດືອນມີນາຜ່ານມາ ກໍມີກອງປະຊຸມປຶກສາຫາລືຮ່ວມລະຫວ່າງຮອງເຈົ້າຄອງນະຄອນຫລວງວຽງຈັນ ແລະ ບັນດາຂະແໜງການກ່ຽວຂ້ອງ ຄືພະແນກໂຍທາທິການ ແລະ ຂົນສົ່ງ, ອົງການບໍລິຫານ ແລະ ພັດທະນາຕົວເມືອງ, ເຈົ້າໜ້າທີ່ຈະລາຈອນ ແລະ ອຳນາດການປົກຄອງຕົວເມືອງຕ່າງໆໃນນະຄອນຫລວງວຽງຈັນ ເພື່ອແກ້ໄຂ ແລະ ຈັດສັນຄວາມເປັນລະບຽບຮຽບຮ້ອຍຂອງຕົວເມືອງ ໂດຍສະເພາະແມ່ນການນຳໃຊ້ທາງຍ່າງເປັນບ່ອນຈອດລົດ ແລະ ຂາຍເຄື່ອງຕ່າງໆ ແລະ ໃນຂະນະນັ້ນ, ທ່ານຮອງເຈົ້າຄອງ ກໍໄດ້ແນະນຳໃຫ້ຂະແໜງໂຍທາເອົາໃຈໃສ່ສ້າງສິ່ງອຳນວຍຄວາມສະດວກຕ່າງໆໃຫ້ແກ່ການສັນຈອນໄປມາໃນຕົວເມືອງດີຂຶ້ນກວ່າເກົ່າ ມີທັງການປົວແປງລະບົບໄຟອຳນາດ, ປ້າຍເຕືອນຈະລາຈອນ, ໄຟເຍືອງທາງ ແລະ ການແຕ້ມເສັ້ນຈະລາຈອນໃຫ້ມີຄວາມຮັບປະກັນດີຂຶ້ນ, ແຕ່ແລ້ວຈົນມາຮອດປັດຈຸບັນມີຫລາຍໜ້າວຽກກໍຍັງບໍ່ມີຄວາມຄືບໜ້າ. ດັ່ງໄຟແສງສະຫວ່າງໃນຕົວເມືອງ ເພື່ອເຮັດໃຫ້ການຈັດຕັ້ງປະຕິບັດຄຳຂວັນ 6ສ ຂອງນະຄອນຫລວງວຽງຈັນປາກົດຜົນເປັນຈິງ ດັ່ງ ສ.ສະຫງົບ, ສ.ສະຫວ່າງ, ສ.ສີຂຽວ, ສ.ສະອາດ, ສ.ສະເໜີ ແລະ ສ.ສີວິໄລ.
