ທີມຊາດຍິງລາວ ຊະນະ ກໍາປູເຈຍ 3-1

ນັກກິລາຍິງທີມຊາດລາວລົງສະໜາມຄັ້ງທໍາອິດສາມາດເອົາຊະນະທີມຊາດກໍາປູເຈຍ 3-1 ປະຕູ ຂອງການແຂ່ງຂັນບານ​ເຕະຍິງຊີງແຊ້ມອາຊຽນ ລຸ້ນອາຍຸ 16 ປີ ຫລື AFF U-16 GIRLS’ CHAMPIONSHIP 2018 ຢູ່ປະເທດອິນໂດເນເຊຍ ໃນລະຫວ່າງວັນທີ 1-13 ພຶດສະພາ 2018.

ການແຂ່ງຂັນໄດ້ເລີ່ມຂຶ້ນໃນເຄິ່ງເວລາທໍາອິດ ນັກກິລາທີມຊາດລາວເປັນຝ່າຍທີ່ຫລິ້ນເກມບຸກເຂົ້າຫາທີມຊາດກໍາປູເຈຍ ແຕ່ບໍ່ສາມາດຍິງປະຕູໄດ້ ຈົນເຂົ້າເຄິ່ງເວລາທີ 2 ທີມຊາດລາວ ສາມາດຍິງປະຕູໄດ້ 3 ປະຕູ  ຈາກນາງ ອິນທິ ຄູນສີ 2 ປະຕູ ນາທີ 43, 66 ແລະ ນາງ ເປ້ ພົມພັກດີ ນາທີ 68 ຈົບເກມ ທີມຊາດລາວ ສາມາດເອົາຊະນະ ທີມຊາດກໍາປູເຈຍ 3-1. ຂະນະຜົນອີກຄູ່ຫນຶ່ງໃນກຸ່ມດຽວນັ້ນ ທີມຊາດໄທ ຊະນະ ເຈົ້າພາບ 4-1.

ສໍາລັບຕາຕະລາງການແຂ່ງຂັນ ທີມຊາດລາວ ຍັງຈະລົງສະໜາມອີກ 2 ຄັ້ງຄື: ວັນທີ 4 ພຶດສະພາ ເວລາ 16:00 ໂມງ ພົບ ໄທ ແຂ່ງຂັນຢູ່ສະໜາມ ATHLETIC JAKA BARLING 1; ສ່ວນວັນທີ 6 ພຶດສະພາ ເວລາ 16:00 ໂມງພົບ ອິນໂດເນເຊຍ ແຂ່ງຂັນຢູ່ສະໜາມ ATHLETIC JAKA BARLING 1.

ການແຂ່ງຂັນຄັ້ງນີ້ມີທີມເຂົ້າຮ່ວມທັງໝົດ 9 ປະເທດ ແບ່ງອອກເປັນ 2 ກຸ່ມ ຄື: ກຸ່ມ ເອ ປະກອບມີ : ຟີລິບປິນ, ມຽນມາ, ຫວຽດນາມ, ມາເລເຊຍ ແລະ ສິງກະໂປ, ສ່ວນກຸ່ມ ບີປະກອບມີ : ໄທ, ກຳປູເຈຍ, ລາວ ແລະ ອິນໂດເນເຊຍ ( ເຈົ້າພາບ )