ສປຊ ແລະ ບໍລິສັດມາເລເຊຍ ພັດທະນາແອັບຊ່ວຍຜູ້ລີ້ໄພ
ກົວລຳເປີ 25 ເມສາ: ສຳນັກງານຂ້າຫລວງໃຫຍ່ຜູ້ລີ້ໄພແຫ່ງສະຫະປະຊາຊາດ ແລະ ບໍລິສັດມາເລເຊຍ ອອກແອັບພິເຄເຊິນສະມາດໂຟນ ໂດຍມີຈຸດມຸ່ງໝາຍເພື່ອໃຫ້ທຸກຄົນເນັ້ນໜັກເຖິງບັນຫາ ແລະ ສະແດງຄວາມເຫັນໃຈຕໍ່ຜູ້ລີ້ໄພທົ່ວໂລກ.
ແອັບມືຖືທີ່ໃສ່ຊື່ວ່າ: Finding Home ໄດ້ຮັບການພັດທະນາຈາກບໍລິສັດເກຣມາເລເຊຍ ໂດຍອ້າງອີງເລື່ອງຈິງຂອງໄວລຸ້ນສາວຊາວມຸສລິມມຽນມາທີ່ຕ້ອງອົບພະຍົບອອກຈາກເຮືອນ ແລະ ມາດຳລົງຊີວິດຢູ່ມາເລເຊຍ. ທ່ານ ຣິຊາດ ທາວລິສ ຜູ້ແທນສຳນັກງານຂ້າຫລວງໃຫຍ່ ສປຊ ກ່າວວ່າ: ແອັບຜູ້ລີ້ໄພຈະເຮັດໃຫ້ຜູ້ໃຊ້ໄດ້ເຂົ້າໃຈຊີວິດໃນແຕ່ລະວັນຂອງຜູ້ລີ້ໄພທີ່ຕ້ອງເດີນທາງເພື່ອສະແຫວງຫາຄວາມໝັ້ນຄົງປອດໄພໃນຊີວິດ. ສຳນັກງານຂ້າຫລວງໃຫຍ່ຜູ້ລີ້ໄພ ສປຊ ລາຍງານວ່າມີຜູ້ຂໍລີ້ໄພ ແລະ ຜູ້ລີ້ໄພກວ່າ 150.000 ຄົນຢູ່ມາເລເຊຍ ເຊິ່ງໃນຈຳນວນດັ່ງກ່າວມີ 36.000 ຄົນອາຍຸບໍ່ຮອດ 18 ປີ.
