ກອງປະຊຸມປຶກສາຫາລືການຈັດຕັ້ງເປົ້າໝາຍພັດທະນາແບບຍືນຍົງ

ໃນວັນທີ 27 ເມສາ ນີ້, ກອງເລຂາຄະນະຊີ້ນໍາລະດັບຊາດ ວ່າດ້ວຍການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ ຮ່ວມກັບ ອົງການສະຫະປະຊາຊາດ, ໄດ້ຈັດກອງປະຊຸມປຶກສາຫາລືກ່ຽວກັບຜູ້ມີສ່ວນຮ່ວມໃນການຈັດຕັ້ງປະຕິບັດວາລະປີ 2030 ເພື່ອການພັດທະນາແບບຍືນຍົງ ກະກຽມໃຫ້ແກ່ການຮ່າງບົດລາຍງານແຫ່ງຊາດແບບສະໝັກໃຈ, ຂຶ້ນທີ່ຫໍປະຊຸມແຫ່ງຊາດ ໂດຍການເປັນປະທານຮ່ວມຂອງທ່ານ ນາງ ຄຳເພົາ ເອີນທະວັນ ຮອງລັດຖະມົນຕີ ກະຊວງການຕ່າງປະເທດ ແລະ ທ່ານ ນາງ ກາຣີນາ ອິມໂມເນັນ ຜູ້ປະສານງານອົງການສະຫະປະຊາຊາດ ປະຈຳລາວ ແລະ ມີຜູ້ຕາງໜ້າຈາກພາກສ່ວນກ່ຽວຂ້ອງຕ່າງໆເຂົ້າຮ່ວມເປັນຈໍານວນຫຼາຍ. ເພື່ອປຶກສາຫາລື ແລະ ຊຸກຍູ້ໃຫ້ປະກອບຄຳຄິດເຫັນໃສ່ຮ່າງບົດລາຍງານແຫ່ງຊາດແບບສະໝັກໃຈ (VNR) ຊຶ່ງເປັນສະບັບທຳອິດຂອງລາວ ທີ່ຈະນຳໄປລາຍງານຕໍ່ກອງປະຊຸມເວທີການເມືອງລະດັບສູງ (HLPF) ຂອງອົງການສະຫະປະຊາຊາດໃນກາງເດືອນ ກໍລະກົດ 2018 ນີ້ທີ່ນິວຢອກ ສະຫະລັດອາເມຣີກາ. ນອກນັ້ນຍັງໄດ້ລາຍຄວາມຄືບໜ້າຂອງການຈັດຕັ້ງປະຕິບັດບັນດາເປົ້າໝາຍການພັດທະນາແບບຍືນຍົງ (ປພຍ) ຢູ່ລາວ, ໂດຍຍົກໃຫ້ເຫັນເຖິງສະພາບລວມຂອງຜົນສຳເລັດທີສາມາດປະຕິບັດມາໄດ້, ສິ່ງທ້າທ້າຍ ແລະ ທິດທາງໃນການຈັດຕັ້ງປະຕິບັດ ໃນຕໍ່ໜ້າ, ຊຶ່ງບັນດາຜູ້ເຂົ້າຮ່ວມໄດ້ຕັ້ງໜ້າປຶກສາຫາລື ແລະ ປະກອບຄຳຄິດເຫັນໃສ່ຮ່າງບົດລາຍງາຍຢ່າງຫ້າວຫັນ ເພື່ອໃຫ້ບົດລາຍງານສະບັບນີ້ມີເນື້ອໃນຄົບຖ້ວນສົມບູນ ແລະ ສອດຄ່ອງກັບສະພາບຄວາມເປັນຈິງຂອງພັດທະນາໃນລາວ.

ໃນໂອກາດດັ່ງກ່າວ, ທ່ານນາງ ເພັດສະໝອນ ສອນ ຮອງຫົວໜ້າສູນສະຖິຕິແຫ່ງຊາດ ໄດ້ສະແດງຄວາມຂອບໃຈຕໍ່ຜູູ້ເຂົ້າຮ່ວມທີ່ປະກອບຄຳຄິດເຫັນຢ່າງມີລັກສະນະສ້າງສັນກົງໄປກົງມາ ແລະ ກອງເລຂາ ປພຍ ຈະນຳເອົາບັນດາຄໍາຄິດເຫັນດັ່ງກ່າວໄປສືບຕໍ່ພິຈາລະນາດັດປັບຮ່າງບົດລາຍງານດັ່ງກ່າວໃຫ້ສົມບູນຂຶ້ນ ເພື່ອຂໍການອະນຸມັດຈາກລັດຖະບານ ກ່ອນຈະສົ່ງໃຫ້ອົງການສະຫະປະຊາຊາດ.