ຊັບພະຍາກອນທຳມະຊາດແລະສິ່ງແວດລ້ອມນະຄອນຫຼວງຍອມຮັບມີພະນັກງານບາງຄົນລະເມີດກົດໝາຍ ຂາດຈັນຍາບັນ ກຽມປິດບັນຊີແລ້ວ
ພະແນກຊັບພະຍາກອນທຳມະຊາດ ແລະ ສິ່ງແວດລ້ອມນະຄອນຫຼວງວຽງຈັນ, ຫຼັງມີການປັບປຸງອົງການຈັດຕັ້ງນັບແຕ່ຂັ້ນຫົວໜ້າພະແນກໄດ້ສຳເລັດ ກໍເລັ່ງກວດກາພາຍໃນເຫັນບັນຫາຍໍ້ທໍ້ຫຼາຍຢ່າງທີ່ຈະໄດ້ແກ້ໄຂ ແລະ ມີພະນັກງານບາງຄົນເຄື່ອນໄຫວລະເມີດກົດໝາຍ ແລະ ຂາດຈັນຍາບັນໃນການເຮັດບໍລິການໂດຍມີການສົມທົບກັບອົງການປົກຄອງທ້ອງຖິ່ນກົດໜ່ວງທ່ວງດຶງເພື່ອຮຽກຜົນປະໂຫຍດໃນການໂອນຫຼືອອກໃບຕາດິນ.
ທ່ານ ບຸນທາມ ພຸດທະວົງສາ ເປີດເຜີຍຕໍ່ນັກຂ່າວພວກເຮົາວ່າ: ນັບແຕ່ມາຮັບໜ້າທີ່ເປັນຫົວໜ້າພະແນກບໍ່ພໍທໍ່ໃດເດືອນ ກໍສາມາດກວດກາເຫັນບັນຫາຕ່າງໆທີ່ຊໍາເຮື້ອມານານ ທີ່ສົ່ງຜົນກະທົບຕໍ່ອົງກອນຊັບພະຍາກອນທຳມະຊາດ ແລະ ສິ່ງແວດລ້ອມ, ຄືມີພະນັກງານບາງຄົນເຄື່ອນໄຫວຜິດຕໍ່ລະບຽບກົດໝາຍ, ບໍ່ມີຈັນຍາບັນມີການກົດໜ່ວງທ່ວງດຶງ ເພື່ອຮຽກຮ້ອງຜົນປະໂຫຍດຕ່າງໆເຮັດໃຫ້ເສຍພາບພົດບົດບາດສ່ວນລວມ, ການລົງພິສູດຫຼັກຖານມີການສົມຮູ້ຮ່ວມຄິດກັບອົງການປົກຄອງທ້ອງຖິ່ນ ວັດແທກຫຼອກລວງ ເຮັດໃຫ້ເກີດມີບັນກາຕາມພາຍຫຼັງ, ຊຶ່ງປັດຈຸບັນພະແນກກໍ່ໄດ້ມີການຮ່ວມມືກັບອົງການກວດກາ, ກວດສອບການປະຕິບັດໜ້າທີ່ຂອງພະນັກງານ ແລະ ສາມາດຮູ້ແລ້ວພະນັກງານທີ່ເຮັດແບບນັ້ນ ຊິ່ງກຳລັງລໍຖ້າການປະຕິບັດລະບຽບວິໄນໄວໆນີ້.
ປັດຈຸບັນ, ທາງພະແນກກຳລັງເລັ່ງດ່ວນປັບປຸງພະນັກງານ, ສະມາຊິກພັກ ໃຫ້ມີຫຼັກໝັ້ນຕໍ່ແນວທາງປ່ຽນແປງໃໝ່ຂອງພັກ ສ້າງໃຫ້ກາຍເປັນຄົນທີ່ມີຈັນຍາບັນສິນທຳປະຕິວັດ, ມີຄວາມຮັບຜິດຊອບຕໍ່ໜ້າທີ່ບັນລຸໄດ້ 5 ດີຄື: ເຮັດໜ້າທີ່ບໍລິການຮັບໃຊ້ປະຊາຊົນດີ; ສ້າງລາຍຮັບດ້ານວິຊາການດີ; ສ້າງຖັນແຖວພະນັກງານ, ສະມາຊິກພັກດີ; ຕ້ອງເປັນພະນັກງານລົງຮາກຖານດີ; ເປັນກົມກອງປະຢັດມັດຖະຍັດດີ. ພ້ອມຈະເປີດບໍລິການຜ່ານປະຕູດຽວ, ທຸກຄົນທີ່ມາໃຊ້ບໍລິການຕ້ອງກົດປຸ່ມຄິວລໍຖ້າບໍ່ເວັນຮອດພະນັກງານພາຍໃນ ເພື່ອເຮັດໃຫ້ການບໍລິການມີຄວາມເຂັ້ມແຂງ, ວ່ອງໄວທັນຕາມກຳນົດເວລາ.
