ຕໍາຫລວດແຂວງຫົວພັນຈັບຜູ້ຄ້າຢາເສບຕິດລາຍໃຫຍ່ພ້ອມຂອງກາງຢາໄອ 40 ກິໂລ
ເມື່ອບໍ່ດົນມານີ້, ເຈົ້າໜ້າທີ່ ປກສ ແຂວງຫົວພັນ, ສາມາດຈັບເປົ້າໝາຍຄ້າຂາຍຢາເສບຕິດລາຍໃຫຍ່ຢູ່ເຂດບ້ານນາທົ່ງຈອງ, ເມືອງຊຳເໜືອແຂວງຫົວພັນ ຄື: ທ້າວ ທອງສີຢ່າງ ອາຍຸ 62 ປີ, ພະນັກງານບຳນານຢູ່ບ້ານຊາຍຈະເລີນ ເມືອງຫ້ວຍຊາຍແຂວງບໍ່ແກ້ວ, ພ້ອມຂອງກາງຢາໄອສ໌ 40 ກິໂລ, ຢາບ້າ 78 ພັນເມັດ ແລະ ເຮໂຣອິນ 2 ແທ່ງ, ພ້ອມໂທລະສັບມືຖື 1 ເຄື່ອງ, ຈຶ່ງໄດ້ຢຶດໄວ້ເປັນຫລັກຖານເພື່ອດໍາເນີນຄະດີຕາມລະບຽບກົດໝາຍ.
ຜ່ານການສືບສວນ-ສອບສວນຂອງເຈົ້າໜ້າທີ່ຜູ້ກ່ຽວໄດ້ຮັບສາລະພາບວ່າ: ເສບຕິດດັ່ງກ່າວເປັນຂອງຕົນແທ້, ໂດຍໄດ້ຊື້ມາຈາກຂະບວນການດຽວກັນ ເພື່ອຈະເອົາໄປຂາຍໃຫ້ຜູ້ສັ່ງຊື້ທີ່ເມືອງຊຳເໜືອ, ພໍມາຮອດຈຸດນັດໝາຍກໍຖືກເຈົ້າໜ້າທີ່ຈັບຕົວກ່ອນ.
ປັດຈຸບັນ, ຄະດີຢາເສບຕິດລາຍນີ້, ເຈົ້າໜ້າທີ່ພວມເລັ່ງຂະຫຍາຍຜົນຫາຜູ້ຮ່ວມຂະບວນເພື່ອຕິດຕາມຕົວມາດຳເນີນຄະດີຕາມກົດໝາຍໂດຍໄວ.
ໄຟຟ້ານະຄອນຫລວງເລັ່ງສ້ອມແປງລະບົບຕາຂ່າຍຫລັງຖືກພະຍຸລະດູຮ້ອນພັດຖະລົ່ມ.
ວັນທີ 26 ມີນານີ້, ທ່ານ ຄຳມະນີ ອິນທິລາດ ລັດຖະມົນຕີກະຊວງພະລັງງານ ແລະ ບໍ່ແຮ່, ໄດ້ລົງຊີ້ນຳໃຫ້ຝ່າຍປະຕິບັດການໄຟຟ້ານະຄອນຫລວງວຽງຈັນ ເລັ່ງແກ້ໄຂສ້ອມແປງໄຟຟ້າ ແລະ ຕາຂ່າຍໃຫ້ສຳເລັດໂດຍໄວ, ພາຍຫລັງໄດ້ຮັບຜົນກະທົບໜັກຈາກພະຍຸລະດູຮ້ອນພັດເຂົ້າບໍລິເວນນະຄອນຫລວງວຽງຈັນໃນຕອນແລງວັນທີ 25 ເມສານີ້, ຊຶ່ງເຮັດໃຫ້ໄຟຟ້າ ແລະ ຕາຂ່າຍຫລາຍແຫ່ງເປ່ເພ.
ທ່ານ ເຄນ ເທບພະວົງ ຫົວໜ້າຝ່າຍປະຕິບັດການໄຟຟ້ານະຄອນຫລວງວຽງຈັນ ໄດ້ລາຍງານໃຫ້ຮູ້ວ່າ: ຕາມການລົງກວດກາສະພາບການຕົວຈິງ, ໃນຄວາມເສຍຫາຍໜັກຈາກພາຍຸດັ່ງກ່າວຄື: ເຂດສະໜາມບິນສາກົນວັດໄຕ, ເຂດເສັ້ນທາງໜອງບຶກ ແລະ ເຂດບ້ານໜອງປິງ ສົ່ງຜົນໃຫ້ເສົາໄຟຟ້າແຮງກາງ ຫັກ 20 ກວ່າຕົ້ນ ແລະ ມີໝໍ້ແປງ 5 ຈຸດໄດ້ຮັບຄວາມເສຍຫາຍ. ນອກນັ້ນຍັງມີຕາຂ່າຍແຮງຕ່ຳ 0,4 ກິໂລໂວນ ໄດ້ຮັບຜົນກະທົບໃນຈຳນວນ 147 ບ້ານເກີດໄຟດັບເປັນຊົ່ວຄາວ, ຍ້ອນພະຍຸໄດ້ພັດເອົາສິ່ງປຸກສ້າງທີ່ບໍ່ໄດ້ມາດຕະຖານມາທັບໃສ່ຫລັກເສົາໄຟ ແລະ ອື່ນໆ, ແຕ່ແນວໃດກໍດີ, ພາຍຫລັງເກີດເຫດຝ່າຍປະຕິບັດການໄຟຟ້ານະຄອນຫລວງ ກໍໄດ້ລະດົມກຳລັງລົງສ້ອມແປງຢ່າງຮີບດ່ວນ, ມາຮອດປັດຈຸບັນສຳເລັດແລ້ວເກືອບ 90% ແລະ ໃນມື້ນີ້ຈະເລັ່ງສ້ອມແປງໃຫ້ສຳເລັດ ແລະ ໃຫ້ໃຊ້ໄຟຟ້າໄດ້ຢ່າງປົກກະຕິ.
ໃນໂອກາດນີ້, ທ່ານລັດຖະມົນຕີກະຊວງພະລັງງານ ແລະ ບໍ່ແຮ່ ກໍໄດ້ຊີ້ນຳໃຫ້ຝ່າຍປະຕິບັດການໄຟຟ້ານະຄອນຫລວງວຽງຈັນເອົາໃຈໃສ່ເພີ່ມທະວີຕິດຕັ້ງເສົາໄຟ ແລະ ລະບົບຕາຂ່າຍທີ່ໄດ້ຮັບຜົນກະທົບນັ້ນໃຫ້ສຳເລັດໂດຍໄວ ແລະ ຮັບປະກັນຄຸນນະພາບຄວາມປອດໄພ.
