ປິງປ໋ອງກຽມສົ່ງນັກກິລາເຂົ້າຮ່ວມແຂ່ງຂັນທີ່ໄທ

ສະຫະພັນປິງປ໋ອງແຫ່ງຊາດລາວ ກຽມສົ່ງນັກກິລາທີມຊາດລາວ ຈໍານວນ 2 ຄົນເຂົ້າຮ່ວມການແຂ່ງຂັນລະດັບສາກົນ (Road to Buenos Aires 2018 Senes-Asia) ທີ່ຈະຈັດຂຶ້ນຕົ້ນເດືອນພຶດສະພານີ້ ທີ່ປະເທດໄທ.

ທ່ານ ນາງ ດາລາວອນ ມະນີຈັນ ຄູຝຶກນັກກິລາປິງປ໋ອງທີມຊາດລາວ ໃຫ້ສໍາພາດວ່າ: ພາຍຫລັງໄດ້ຮັບການຄັດເລືອກຂອງສະຫະພັນປິງປ໋ອງແຫ່ງຊາດລາວແລ້ວ ພວກເຮົາກໍໄດ້ຝຶກຊ້ອມນັກກິລາທີມຊາດຢ່າງເຕັມທີ່ ໂດຍເລີ່ມຝຶກທຸກໆມື້ເວລາ 16:00-18:00 ໂມງ ເພື່ອກຽມຄວາມພ້ອມເຂົ້າຮ່ວມການແຂ່ງຂັນປິງປ໋ອງລະດັບສາກົນ (Road to Buenos Aires 2018 Senes-Asia) ທີ່ຈະຈັດຂຶ້ນລະຫວ່າງວັນທີ 7-8 ພຶດສະພານີ້ ທີ່ປະເທດໄທ. ການແຂ່ງຂັນຄັ້ງນີ້ ສະຫະພັນປິງປ໋ອງແຫ່ງຊາດລາວ ຈະສົ່ງນັກກິລາທີມຊາດ 2 ຄົນເຂົ້າຮ່ວມຄື: ທ້າວ ສອນປະເສີດ ມໍລະສິນ ແລະ ນາງ ສີມີລັນ ຈັນນະວົງ ເຊິ່ງທັງສອງຄົນຈະເຂົ້າແຂ່ງຂັນລາຍການດ່ຽວຍິງ ແລະ ດ່ຽວຊາຍ. ສໍາລັບການເຂົ້າຮ່ວມລາຍການດັ່ງກ່າວນີ້ ພວກເຮົາຕັ້ງຄວາມຫວັງໄວ້ສູງພໍສົມຄວນ ເພື່ອໃຫ້ຜ່ານເຂົ້າຮອບໃຫ້ໄດ້.